Den carnaval muchanan no mag di bira victima di falta di responsabilidad di adulto

Dianan di carnaval a cuminsa y mayornan mester ta mas consciente tocante nan yiu durante e temporada aki, asina tambe como pa percura cu muchanan chikito menor di 5 aña no lo asisti pa paradanan grandi y tampoco esnan un tiki mas grandi no por keda pa oranan largo wardando riba un parada. 

Bon Dia Aruba ta trece e topico aki dilanti di un manera informativo pa splica cu tocante temporada di carnaval cu a cuminsa caba  y cada mayor kier disfruta di e temporada aki tambe ta importante pa nan sa cu ta existi diferente fundacion na Aruba cu informacion valioso cu ta conscientisa e mayornan di e importancia di cuida muchanan durante carnaval.

Esaki tambe tin diferente factor cu ta hunga un rol pa loke ta trata e cuido di muchanan durante e temporada aki, ta recomenda cu mayornan cu tin yiu bou di 4 aña pa nan no asisti pa carnaval, mayornan tin e opcion unda diferente crèchenan of pasantia ta duna servicio pa nan cuida e muchanan durante e paradanan.

Fundacion pa Nos Muchanan por ehemplo, tin un lista pa cu esaki y mayornan por acerca te fundacion pa nan por haya servicio durante carnaval y zorg pa muchanan chikito no bay pa paradanan di carnaval.

E mesun mayornan por acerca te luganan ey pa wak si ta confortabel of sigur pa laga nan yiu durante nan asistencia pa e parada y e programacion cu nan tin di actividad cu muchanan lo bay haci, si tin un familiar cu no ta bay carnaval por cuida e mucha y si e mucha ta confortabel pa keda eynan, pasobra ta un persona cu e conoce y ta sinti su mes sigur. Si no tin opcion, e ora e fundacion tin e lista.

Ademas, esaki ta responsabilidad di cada mayor, muchanan chikito no por keda pa oranan largo pa warda riba un parada, y pa e motibo aki nan tin diferente informacion y tambe posternan riba e fundacionnan cu ta duna na e mayornan e informacion necesario pa zorg pa muchanan por ta proteha durante temporada di carnaval.

Den caso cu e mayor ta dicidi di hiba su yiu pa un parada den solo, mayornan mester percura pa nan ta bisti cu paña fresco, percura pa nan tin un stoel pa sinta, ta tapa nan cu pechi of sombre y pa nan tin sunblock cu ta hopi importante, zorg tambe pa nan ta bon alimenta y hidrata durante e momento di e parada, wak pa e muchanan keda patras di e baricada, corda cumpra earplugs pa nan, cuido di oido ta sumamente importante pa nan.

Tambe e parti di siguridad ta igualmente importante, pa motibo cu muchanan tambe por perde y cosnan por pasa, mayornan por percura pa pone pa nan un label of algun identificacion cu informacion den caso cu nan lo perde otro persona por yama e mayornan.

Tambe, mayor por proteha su yiu ora tin un evento publico asina grandi na unda e mama of e tata por usa un ‘safe word’, si un mucha ta sinti su mes incomodo of si e ta sinti cu e ta den un situacion insigur, e por bisa e safe word pa yuda, no laga nan papia cu hende desconoci, mester preveni e muchanan di no mag di ricibi nada di otro hende cu nan no ta conoce.

Por saca un potret cu actividad ey lo cuminsa pa asina tin un descripcion mas miho acaso e mucha ta wordo separa di su mayor, siñ’e pa busca ayudo cerca un adulto di confiansa si acaso e lo perde.

Di mesun manera, mayornan mester splica e peligernan di diferente cosnan cu por sosode durante e parada y tambe si nan ta perde por acerca te polis y splica pa nan cu e ta perdi.

Si muchanan ta asisti pa un grupo den parada, ta importante cu mayornan mester ta informa si e grupo tin un baño, si muchanan tin alimentacion, si tin un number di emergencia y si nan ta zorg pa tin un caha di emergencia pa motibo cu muchanan lo por cay durante e parada.

Carnaval ta un fiesta di alegria tanto pa adulto como pa e muchanan, ta importante pa menciona den actividadnan asina grandi unda muchanan ta asisti pa nan keda e prioridad, muchanan no mag di keda te oranan laat riba caya, mas ainda sabiendo cu dia despues nan tin scol, nan mester di nan soño pa por bay scol nan tempo y descansa.

Na Aruba, alcohol ta sigui como un di e prome causa di e problemanan social, pa e motibo aki tampoco ta conveniente pa muchanan asisti na un evento na unda mayoria di hende ta consumi alcohol ya cu por origina un situacion lamentabel, tanto pa e mucha como pa e mayor.