Den un conferencia di prensa di minister di Cultura y Finansa, Xiomara Maduro a informa cu dia 20 di october di 1987 Aruba a bira miembro asocia di United Nations Educational, Scientific and Cultural Organization (UNESCO) pa loke Aruba a cumpli 35 aña como miembro di e organisacion aki.

“Esaki sigur ta un momento pa nos para keto pa asina nos por wak den transcurso di aña con UNESCO y con Aruba a atende cu lo cual cu ta bira e membresia aki di Nacionnan Uni” minister Maduro a señala.

UNESCO ta un organisacion di Nacionnan Uni cu ta traha riba e tereno di educacion, ciencia, cultura, comunicacion y informacion e meta di UNESCO ta pa por crea un cultura di paz na mundo y sociedadnan den cual e categorianan ey ta e pilarnan central. UNESCO su netwerk local y internacional ta habri pa dialogo, intercambio di idea, compartimento di conocemento, tur esaki basa riba investigacion.

Como un ehemplo, den aña aki por a wak cu Associated Schools Project Network unda scolnan di Aruba por bira miembro pa asina Aruba tin cuater scol cu ta forma parti di UNESCO, alumnonan y maestronan por haya informacion pa nan por participa den nan actividadnan online pa crea un topico pa Aruba.

“Pais Aruba ta prepara su mes pa asina por haci e intercambionan cu scolnan miembro ta haci hunto cu entre otro cu Corsou y Hulanda, den Reino Hulandes. Aruba como miembro ta resorta como miembro bao oficina regional na Jamaica y tambe ta importante pa nos sa cu na Aruba a institui un comision nacional unda mi persona ta presidente di e comision,” el a bisa.

Pa prome biaha Aruba tambe tin secretariado formalisa unda por apunta un specialista pa cada area di trabou di UNESCO, e secretariado ta consisti di secretario general Marushka Tromp, tambe el a informa cu e aña aki Aruba tin e honor unda comite regional lo bini hunto pa e programa “Memory of the World” yama “Mowlac”, nan a acerca Aruba pa por ta e anfitrion di e 22 reunion anual pa den luna di november nan tur por bini hunto.

Nan a acerca Aruba pa motibo di e trabounan grandi cu a wordo haci riba tereno di digitalisacion y presentacion di “Nos Herencia” documental, “esaki sigur ta algo bunita caminda cu mas laat nos lo tende un tiki mas y tabata un trabou di nos profesionalnan di Biblioteca Nacional Aruba hunto cu Archivo Nacional Aruba y secretariado di UNESCO cu ta haci e parti akinan posibel”, minister Maduro a declara.

Di su parti Marushka Tromp a informa cu e meta cu esaki tin pa educacion ta pa crea un netwerk den tur nivel unda scolnan di UNESCO ta un pero tin mas, como universidadnan y scolnan profesional, promocion di idioma materno y multilingual, transformacion di educacion amplio, recursonan educacional mester ta habri pa tur hende ya cu esey ta un tema constante di UNESCO, manera el a sigura.

Riba ciencia natural nan ta wak e tema di investigacion oceanico, creamento di cooperacion, alerta y preparacion riba tsunami, aplicacion di programanan.

Pa loke ta trata ciencia social nan ta bezig pa percura e compliance di e convenio di antidoping, duna importancia na deporte como un di e instrumentonan cardinal den e sociedad, yega na un sociedad inclusivo cu igualdad di genero, participacion di hoben.

Den area di cultura, duna sosten na ora di delinea maneho di cultura cu e frame network cu UNESCO ta usa, traha riba educacion cultural, promove implementacion di convenionan di herencia cultural tangibel y intangibel y bou awa cu Aruba lo ratifica y ta usando caba y crea su data creativo.

Di ultimo, den e area di comunicacion ta e fortificacion di herencia documental y su digitalisacion, aplicacion di programanan como “Memory of the World”, promove media, yega na acceso liber pa informacion como prensa liber y profesional y promove uso di recomendacion di etica di inteligencia artificial.

El a pidi tur hende pa reflexiona riba e importancia riba kico tur kiermen traha hunto pa coopera y asina ey por tin sinergia, den tur e areanan “esey ta nos meta”, Tromp a señala.

E meta number 4 di desaroyonan sostenibel ta e transformacion di educacion, den e cuadro aki durante tempo di pandemia, UNESCO Aruba a haci posibel cu docentenan por a siña traha cu instrumentonan digital pa asina ey nan por a sigui duna nan lesnan online, e cursonan a wordo organisa door di UNESCO Jamaica, segun loke Nora Eleonora a splica.