Den conmemoracion di Dia di Accion Global pa clima; Climate Action Aruba ta pidi gobierno nobo uni lucha contra cambio climatico

Diabierna ultimo 24 di september, un grupo di casi 100 persona a participa den #ClimateActionAruba na unda nan a forma parti di un evento mundial cu 100 pais y mas di 780.000 persona a reuni pa exigi na nan gobierno actua awor.

Segun nan pagina di Facebook Climate Action Aruba, tabatin cuatro manera pa participa den evento aki na unda cu por firma un peticion na unda ta pidi pa Gobierno di Aruba actua riba crisis climatico y perdida di naturalesa, por a laga un par di sapato dilanti di parlamento diabierna ultimo pa asina laga conoci cu tambe ta colabora den actividad aki, agregando un nota of un borchi, saca un potret persona na cas, scol of un otro luga cu e hashtag #ClimateActionAruba y despues varios di nan a yega te parlamento di Aruba 4or di atardi teniendo na cuenta medidanan di prevencion pa Covid-19.

E obhetivo di esaki ta pa gobierno nobo lanta para y uni na e lucha contra cambio climatico y sigura e futuro di Aruba su naturalesa y tambe pa su pueblo lo ta miho protegi.

Nan ta indica cu “nos mester trata e Crisis Climatico manera un crisis di emergencia. E ta nos responsabilidad y obligacion moral pa tuma accion. Nos tempo ta cabando, nos no por acepta promesanan bashi mas. Nos gobierno tin e capacidad di yuda y stop esaki, y nos ta urgi tur hende pa lanta para cu nos. Nos futuro generacion ta depende riba e decisionnan cu tuma luga awo. Bo por yuda haci un diferencia door di firma e peticion aki pa laga Aruba su gobierno sa cu bo tambe ta preocupa”, e comunicado di peticion pa firma ta indica.

Pa finalisa, tambe nan a trece dilanti cu “Aruba semper a wordo conoci como nos  “One Happy Island”. Pero tin un Crisis andando cu ta menasa e existencia di nos isla. Cambio Climatico ta aki y nos no por ignora e situacion mas. Hasta riba un isla chikito manera nos “Dushi Tera”, nos a cuminsa wak y sinti e efectonan. Nos flora y fauna ta riba un presion pisa debido na e falta di proteccion y enforsa di leynan existente, nos maneho di desperdicio ta inexistente, recursonan valioso ta wordo perdi na dump, e falta di transporte publico eficiente ta causa un aumento di vehiculonan cu ta aumenta e emision di gas cu efecto invernadero (greenhouse gasses) , etcetera.