Ayera a wordo conmemora Dia Internacional di Riñon. Un fecha cu casi a wordo neglisha debi na e ambiente cu tin rond di coronavirus. Sinembargo fundacion Kidneys 297 a percura cu e fecha importante aki no bay sin pena ni gloria, considerando cu hopi hende tin problema di riñon y malesa di problema di riñon a bira uno cronico na Aruba.

Miluska Sneek di fundacion Kidneys 297 a bisa cu -segun nan data- nos tin na Aruba mas cu 200 pashent ta dialisa. E ta un cifra alarmante, pasobra Aruba ta cay den e top 10 mundial di pashentnan cu ta wordo dialisa.

Tin biaha nos hendenan no ta para keto riba con importante e riñon ta. “E riñon ta un organo di nos curpa cu si bo no tin’e bo no por ta na bida. Bo ta muri entre 3 pa 10 dia.” el a bisa.

E aña aki, fundacion Kidneys 297 a dicidi cu nan lo enfoca riba bebemento di awa. Ta importante pa cambia e juice y bebidanan cu sucu cu mas bebemento di awa. P’esey nan ta buscado un manera pa conscientisa mayornan y scolnan, ya cu e muchanan no mester di e sorto di bebidanan cu sucu den dje. Mientras cu awa ta mas barata, e ta yuda e mucha hidrata mas, cuida su salud y tambe e mucha lo ta mas trankil.

 

Dilanti parlamento

Igualmente nan a informa cu diasabra awor, nan lo ta dilanti di parlamento repartiendo awa. El a bisa cu consumo di awa ta un di e elementonan primordial pa bo curpa. No solamente consumo di awa ta yuda bo riñon, sino bo curpa completo tambe.

Nan lo parti stickernan pa auto cu e lema nobo pa 2020: “Sin riñon bo no por biba bon.” Como fundacion nan kier conscientisa riba problema di riñon pa nos mes realisa pa kico nos riñon ta importante y kico bo por haci pa cuida bo mes prome cu bo yega na malesa di riñon.

Ya cu riba e fecha internacional aki tur hende ta para keto na e cuido di bo riñonnan. Na Aruba ta alarmante e cantidad di pashent cu ta dialisa – cu ta e tratamento cu bo ta haci ora cu bo ta haya bo cu e malesa di riñon. “Nos kier siña nos comunidad cu e ta cuminsa cu bo mes.”

Ta importante un bon alimentacion, kiermen kico bo ta come, y ohala di un forma saludabel. Sneek a indica cu ta parti di nos cultura cu nos ta gusta cos dushi y tambe pastechi. Pero nos tin 7 dia den siman y si un dia bo a come pastechi, bebe bo koffie y bo no a bebe suficiente awa, su dia siguiente bo por bebe bo awa y come mas saludabel cu fruta y berdura. E ta un forma pa balansa bo nutricion, pasobra bo curpa mester di esey. Tambe mester tene cuenta cu e parti di actividad fisico. Tur aña e fundacion aki ta organisa su caminata, cu e biaha aki lo tuma luga dia 10 di mei proximo.

E fundacion aki a wordo lanta pa Monet Jones, ken a haya su mes den un situacion, caminda un familiar di dje a confronta problema di malesa di riñon. Ora cu nan a bay busca informacion e tempo aya, nan a confronta e situacion di falta di informacion. E ora ey el a dicidi lanta e fundacion Kidneys 297 pa conscientisa y duna informacion tocante e problema di riñon.