Ayera, BFO (Bureau di Investigacion Financiero) di Cuerpo Policial di Aruba a realisa un accion dirigi, den cuadro di un investigacion financiero cu ta bin andando, cu ta hiba e nomber di ‘Venkel’.
Ministerio Publico (OM) a informa mediante un comunicado di prensa cu e accion a tuma lugar den colaboracion estrecho cu otro departamentonan di Polis y cu RST (Recherchesamenwerkingsteam).
A detene un total di cuatro sospechoso y a ristra dos cas y tres local comercial.
Durante e accion, a confisca varios cargado di dato, cantidadnan grandi di placa cash y autonan.
OM a informa cu e pareha ta sospecha di a laba cantidad grandi di placa via criptovaluta.
Criptovaluta ta placa digital, den cual e almacenamiento y transaccionnan ta core via un red di computer, sin supervision di banco.
Juist pasobra e transaccionnan hopi biaha ta bay anonimamente y a traves di fronteranan internacional, ta mas dificil pa rastrea di unda e placa ta origina.
E tecnologia di criptovaluta por ser abusa pa move ganashinan criminal pafor di bista di proveedornan di servicio of di autoridadnan, cu e meta pa cubri e ganashinan procedente di crimen, OM a informa.
Ministerio Publico ta considera labamento di placa como un di e pilarnan principal di criminalidad cu ta mina sociedad. “Labamento di placa ta no solamente un delito financiero, sino tambe e motor di crimen organisa. Sin e posibilidad pa usa nan ganashinan ilegal, criminalnan ta perde nan motibo principal pa comete crimennan: placa! Pa e motibo ey, e lucha contra labamento di placa ta no solamente un lucha contra cifranan riba un cuenta bancario of den computer, sino un lucha contra e infrastructura completo di mundo baho,” OM a bisa den su comunicado.
Ministerio Publico ta traha di cerca cu varios partner pa combati labamento di placa na manera efectivo.
E accion di ayera, segun OM, ta subraya cu fluho di placa criminal, sin importa con sofistica e por ta, no ta fuera di alcance di Polis.
