Den e Gran final di Copa Noord HEINEKEN 2025: Dos team invicto ta topa otro unda Royal Power Tat Fat ta derota Salbabo 9-2 pa titula Campeon. Jomark Flanegin ta sali MVP!

Copa Noord 2025 dedica na Johannes “Poy” Flanegin, Alvaro Barrios, Nel Frank y Francis Arcaya a continua y diadomingo ultimo riba dia di Tata na veld di Kudawecha.

Diadomingo merdia 12 pm den semi final Royal Power ta elimina Stingers cu score di 12-5 y ta mantene nan invicto 5-0 pa garantisa un lugar den e Gran Final mientras un rato despues pa 2 pm Salbabo ta elimina Calabas Blue Jays 10-9 den un wega yena cu emocion unda Salbabo tambe mantene nan invicto 5-0 y ta pasa pa e Gran Final. Pa 4pm e Gran Final a inicia cu e protocol cantando e Himno di Aruba cu un veld di Kudawecha carga cu fanaticada y sigur mester bisa cu Salbabo a yena e parke cu fanaticada bisti cu nan T’shirt cora.

Den bom di promer inning Royal Power ta rally tempran den e partido anotando 4 careda riba batasonan oportuno di Eldrick Dijkhoff, Gillian Wernet, Kelvin Silvania, Keith Hooker y Jerieel Rafael. Salbabo ta anota un careda den cabez di segundo inning y den cabez di 3 inning Salbabo ta score un careda mas pa corta e ventaha 4-2. Royal Power ta amplia e score den bom di 3 inning cu un careda pa hasi e wega 5-2 mientras den bom di 4 inning Royal Power ta bolbe rally a bataso limpio pa 3 careda y ta pone mas presion riba Salbabo aumentando e score 8-2. Pa seya e victoria Royal Power a logra anota un careda den bom di 6 inning pa asina e wega termina 9-2.

Ambos ekipo a drenta final invicto 5-0 unda Royal Power a termina e torneo 6-0 mientras Salbabo cu ta mira atras riba un torneo fabuloso y exitoso na e manera cu nan ekipo a perform den Copa Noord apoya pa e masa cora di Noord y ta termina cu 5 victoria y 1 derota(5-1) cu cara na laira. Resultado final Royal Power 9 careda, 16 hit, 1 error y ta laga 9 coredor na base. Salbabo 2 careda, 10 hit, 0 error y ta laga 8 coredor den circulacion. Jomark Flanegin ta cubri henter e ruta y ta pone e victoria riba su nomber como pitcher ganador y banda di esaki Jomark Flanegin ta bira e MVP di Copa Noord 2025 merecidamente. Elwin Falconi pitcher habridor pa Salbabo ta resulta pitcher perdedor ricibiendo relevo di Charli Pulido den di 3 inning. Mihor bateadornan pa Royal Power a resulta Eldrick Dijkhoff 4-3, Keith Hooker 3-3, Kelvin Silvania y Jerieel Rafael ambos a bay di 2-2.

Pa Salbabo a destaca na plato Daniel Fernandes 3-3, Aigil Brete 4-3, Gerard Eckmeyer y Charli Pulido di 2-1. Na final bou ritmo di Tsunami kende a trese un artista internacional e famoso Skinny Banton pa canta na veld di Kudawecha a bay over pa parti demas premionan individual. Alexander Groeneveldt di Stingers a bay cu e trofeo di Champion Homerun kende ta e unico cu a saka e bala un biaha pafopr di parke den e promer buelta. Marcel Duran di Super Plus ta titula Champion Batter cu 8-6 pa un averahe di 750. Jomark Flanegin MVP.

Salbabo ta ricibi su trofeo di Sub Campeon acompaña pa na fanaticada celebrando sin fin mientras Royal Power Tat Fat a ricibi su trofeo di Campeon Copa Noord 2025 cual ta bira Royal Power su di 8 titulo di Copa Noord mientras nan tin tambe 4 titulo di sub campeon. SV Royal Power y Comision Organisador ta gradisi tur ekiponan cu a participa, tur fanaticada cu a yega tereno pa apoya nan ekipo y tur e ekiponan cu a hunga weganan amistoso durante e torneo. Danki ta tur cu a yuda den cualkier forma. Pabien Copa Noord 2025! Pabien bario di Noord.

Copa Noord a re-activa despues di 5 aña (desde 2020) den Gran Forma.