Aunke horcan Larry ta pasa leu di Aruba, den fin di siman Aruba a sinti un clima diferente c uta relaciona cu e horcan menciona.

Diasabra tabatin basta yobida y pisa den oranan despues di merdia pa atardi cu a causa hopi acumulación di awa. E yobida aki tabata algo cu por a spera, según pronostico haci door di Meteo Aruba, y cual pronostico ta valido te cu awe tardi 6’or. Meteo a informa cu e tempo lo por ta generalmente nubla y por spera yobida pasahero y leve.

E yobida di tanto diasabra atardi como diadomingo mainta a bay compaña pa un biento hopi fuerte. Awe mainta rond di 9’or e tempo a cera y por a mira un shelo scur y despues e yobida, cual tabata pasahero, manera e pronostico.

Meteo a bisa cu por spera biento modera te basta fuerte for di direccion, y cu ta midi entre 4 pa 5 nudo, cual ta 20 te cu 39 km pa ora) of ora di fuere e por ta entre 11 y 21 nudo.

Segun nan a splica, tin hopi instabilidad den e region cu ta causa cu tin biaha ta mira e tempo hopi cera, scur, cu yobida, y cual ta disparce despues di un rato. E situacion general di tempo por trece cu ne humedad y instabilidad den region cu por induci temporalmente basta nubia den proximo 24 ora. Esaki lo por produci awacero pasahero te breve cu chance tambe pa lamper cu strena. Localmente awacero por ta fuerte y causa molester.

Esaki lo tin su efecto tambe riba e condicionnan maritimo y estado di lama, principalmente na e partinan zuid, noord y noordwest cu olanan te cu 6 pia.

Nan a adverti tambe cu durante diadomingo laat y dialuna por bay sinti algo di labadera na costanan oost te noord produci pa horcan Larry cu por haci e parti di costa aki poco bruto. P’esey ta bay un advertencia pa propietarionan di boto chikito pa tene cuenta cu esaki.

Horcan Larry ta situa riba Atlantico central, na un distancia basta grandi oost di islanan ariba y ta move west-noordwest. Larry mes ta solamente un molester pa navegacion maritimo.

Nan pronostico di tempo pa proximo tres dianan ta: parcialmente nubla cu un awacero pasahero te breve. E biento lo ta for di direccion oost y modera te basta fuerte; fuerte te posiblemente duro den rafaga..

LEAVE A REPLY

Please enter your comment!
Please enter your name here