Fundacion pa Hende Muhe den Dificultad (FHMD) ta desea di mira un minister hopi dedica y concerni cu e tema di violencia domestico y problemanan social den un siguiente gobierno.

E fundacion ta keto bay trahando duro pa realisa e proyecto di team multi disciplinario cu lo consisti di cooperacion entre diferente instancianan, hunto cu un number di tres cifra (hotline) pa yama y entrega keho.

“Lo mi ta desea un minister cu ta hopi concerni cu e tema aki, pa e sa kico ta hungando den e comunidad aki. Y tambe e consecuencianan cu tin ora cu tin violencia domestico,” coordinador di FHMD, Magaly Maduro ta bisa Bon Dia. E fundacion ta hopi gradicido na minister Paul Croes kende segun sra. Maduro, el a haci un bon trabao den e area social y ta lamenta tur locual ta pasando rond di dje na momentonan aki.  “Ora cu tin violencia domestico e consecuencianan no ta solamente na plaso corto, e tin hopi influencia. E por haci hopi daño.”

“Un dokter cu mi a combersa cu ne algun dia pasa a bisa mi cu e mes tabata testigo di violencia domestico. Awor cu el a pasa 50 aña di edad, ainda e ta sufri di e consecuencianan ey. Pues laga nos ta hopi cauteloso y consciente di loke nos ta haci. Cu loke cu wordo haci awe, tin consecuencianan pa hopi decada ainda y tin hende ta muri bay cu e traumanan,” sra. Maduro ta splica.

Pues e fundacion no ta worry si e siguiente minister encarga cu asuntonan social ta femenino of masculino cu asumi e responsabilidad aki. Ta trata di e trabao y comprension di locual ta pasando. “Pasobra ta un responsabilidad bo ta tuma riba bo mes si bo kier trata cu asuntonan social, sea consciente di kico ta pasando riba nos isla. Pa motibo cu tin hopi problema social. Nos tin rapportnan traha caba y no mester inventa ningun wiel nobo.”

Sra. Maduro ta sigui splica cu nos mester corda cu e problemanan cu ta cuminsa den hogar, bo ta sinti e na scol unda cu e mucha entre otro no ta produci suficiente. Den e parti laboral, e hende homber of muhe cu a wordo maltrata no ta produci suficiente of manera cu e mester por produci. “Pues nos mester midi tur e cosnan aki pa wak con nos ta bay traha pa nos mesun comunidad. E muchanan lantando aworaki ta e dokternan y profesionalnan di mañan. Nan ta esunnan cu lo tin cu bay goberna nos isla tambe. Laga nos bay cuminsa pone mas atencion na e hobennan y hende muhenan.”

Team multi disciplinario
Na comienso di e aña aki den luna di april, Fundacion pa Hende Muhe den Dificultad a dialoga cu diferente instancia den un di dos encuentro pa cuminsa combati violencia domestico. A tene un mainta informativo pa traha un  team multi disciplinario cu lo por interveni y atende cu cualkier persona, sea hende muhe of hende homber, cu ta haya nan mes den un situacion di violencia domestico. E plan ta pa esaki bira un cooperacion nacional entre instancianan manera departamento di Asuntonan Social, Slachtofferhulp, otro fundacionnan y mas partidonan pa combati e fenomeno di violencia domestico. “Despues di e dos encuentronan aki nos a saca afo cu tin bastante trabao pa haci pa nos yega na e protocolnan,” sra. Maduro ta bisa.

Prome cos cu nan mester haci ta haya e gobierno pa  mira e importancia di un team manera esaki. “E ta tuma hopi mas tempo di loke den nos entusiasmo a pensa nos lo haci pero e no ta traha asina. E tin di haber cu asina hopi factornan, indicadornan y actornan cu ta hunga un rol. Pues nos ta trahando riba dje. Nos no a drumi ni tuma vakantie. Nos ta topa otro na diferente reunionnan pasobra nos kier haci e cos aki bon.” E fundacion tabata tin asina un gana pa keda cla cu esaki mesora pero cosnan no ta bay asina lihe. “Mi tin e speransa cu pa comienso di otro aña cu nos ta asina leu cu e ta mas cristalisa. Y cu nos por traha conhuntamente pa stop e violencia contra e hende en general; contra hende muhe, muchanan, hombernan y famianan den nos sociedad. Mi ta hopi optimista di esey.”
Hotline pa keho violencia domestico
Manera nos a informa tambe algun luna pasa, e fundacion a pidi colaboracion cu Setar pa un number di telefon di tres cifra pa e bira facil pa yama e hotline aki pa entrega keho.  Nan a pidi pa e number 170 pero nan no ta sigur cu esaki ta bay bira asina ainda. Pues esaki ta un idea te ainda pa haya e cifranan di telefon 170 cu e slogan ‘pa bo drecha bo cuenta’. No bo cuenta di banco pero bo cuenta den bo cas, bo mes como ser humano, bo famia, y con nos ta mira nos mes como sociedad aki par di aña, segun e fundacion ta splica.

E directiva ta keto bay trahando riba esaki pasobra nan ta haya e parti aki sumamente necesario. Sra. Maduro: “Nos ta e unico riba e isla aki cu ta e instancia corecto pa e problema aki pues nos ta esun cu ta bay trek e.” Lo tin mester kisas di haci adaptacion na algun leynan segun e fundacion, pero tin leynan caba cu e fundacion por traha cu ne unda cu mester djis ta na altura di nan y con pa trata cu nan. “Cada partido envolvi den e caso aki tambe Ministerio Publico, Cuerpo Policial, tur mester ta na altura di nan tareanan y con pa ehecut’e. Anto esey ami no tin cu bay bisa nan, pasobra nan tambe sa con esaki ta hinca den otro.”