Ayera mainta durante un conferencia di prensa e conocido dentista dr. Hendrik Marsman a trece dilanti algun punto di preocupacion relaciona cu cuido dental na Aruba. Un di e topiconan cu el a elabora riba dje ta trata tecniconan dental cu ta traha di forma ilegal den boca di pashentnan.

Dr. Marsman a splica cu den luna di april, Inspectie Volksgezondheid tabatin un reunion cu 45 trahado den salubridad riba tereno di cuido dental cu tabata inclui dentista, orthodentists y tecniconan dental. El a indica cu durante e reunion aki, Inspectie Volksgezondheid a splica cu nan a haci investigacion, a bishita diferente practica etc. hunto cu staf medico militar di dentista cu a yuda nan.

El a splica cu durante e reunion aki, tambe a confirma cu ley di Aruba ta bisa cu tecnico dental no mag traha den boca di hende, maske esaki no tabata duidelijk prome, pero awo si a keda confirma.

“Eynan mi a keda den shock, pasobra Aruba Dental Society pa hopi aña caba ta bisa esey pero niun hende ta actua. Awe mi kier eigenlijk bisa Inspectie Volksgezondheid, boso tin cu aumenta aplicacion,” el a remarca.

El a enfatisa cu Inspectie Volksgezondheid mester stop e tecniconan dental di traha den boca di pashent, pasobra nan no por diagnostica patologia, cancer, diabetes, djente cu buraco, infeccion na carni di djente, etc. Esey ta e dentistanan cu ta inscribi na AruBIG por hacie. E dentista por duna un verwijsbrief pa e tecnico dental por haci algo den boca, y e dentista mester wak e pashent back pa wak si e trabao ta bon haci.

“Tin un situacion di un trahamento den boca ilegal cu no ta conforme cu ley. Por bisa cu den pasado e cos ey a pasa, pero cos di pasado nos no ta tolera mas. Aworaki mester aplica e ley cu tin. Inspectie Volksgezondsheid tin tur nan informacion y nan tin cu simplemente manda nan un carta cu no por traha den boca mas,” el a agrega.

Dr. Marsman a splica tambe cu SVB na Corsou ta paga un tecnico dental alrededor di 300 florin pa traha un plancha pa e parti abao di e boca y nan ta paga e dentista su honorario. AZV ta haci mesun cos, solamente cu na Aruba prijsnan ta dobel, pues AZV ta paga mas cu 600 florin pa un set di plancha, mientras cu na Corsou ta mita prijs.

El a conta cu el e haya un caso di un pashent humilde cu a traha un set di plancha cerca un tecnico dental aki na Aruba y a paga 4.800 florin. E pashent a haya un areglo di pago seis biaha 800 florin, y a ricibi un set di plancha cu, segun el a indica, ta parce plancha pa cabay. “Eynan bo ta wak e calidad cu un tecnico ta traha, pero esun cu ta perhudica ta e pashent,” el a subraya.

El a enfatisa cu na Aruba mester yega na un prijs, pasobra un tecnico dental cu ta traha den boca mester cobra e prijs cu AZV ta paga y no dobel of tripel di loke un dentista ta cobra. Esaki ta un punto cu Dr. Marsman a indica ta un preocupacion grandi tambe na e momentonan aki na Aruba.

Dr. Marsman a splica cu Inspectie Volksgezondheid ta trahando pa formula un maneho, pero mientras nan ta haci esaki, el a remarca, nan mester saca un carta pa bisa e tecniconan dental y dentistanan cu e trahamento ilegal den boca door di tecnico dental mester caba na Aruba y traha asina riba calidad structural na Aruba.

El a subraya cu ta importante pa Inspectie Volksgezondheid actua y aplica e ley cu tin na vigor na Aruba. El a indica cu si kier cambia e ley despues pa laga e tecniconan dental traha den boca, mester cambia e ley prome y despues por laga nan traha den boca, pero no por laga sigui nan traha di manera ilegal manera cu ta sucede aworaki.