Ayera mainta, e dentista Hendrik Marsman a denuncia den medionan local un supuesto caso di un tecnico dental cu ta trahando como specialista, algo cu segun Marsman a bisa no ta permiti pa ley, cu ta indica cu un tecnico dental mester di un carta di referencia di un dentista e por haci trabou den boca.

Marsman a sigura cu e persona aki ta publica su trabounan y ta haci publicidad riba rednan social, pa lo cual Marsman a denunci’e caba y ta bisa cu e persona aki no a bay universidad y cu tampoco ta un specialista.

“Un dentista ta wak e patologia, ta wak si bo tin malesa di carni di djente, e ta wak si bo tin piedra of caries prome cu pone algo den bo boca, y akinan e meneer aki no ta academico; e no ta dentista, e no por wak esey. E por traha solamente cu un carta di referencia di dentista,” Marsman a sigura.

Tambe el a sigura cu Recherche kier scucha su persona tocante un carta interno di DVG cu Marsman a publica na unda por lesa con ta fix un diploma di un curso cu no ta acepta na Merca ainda pa por traha na Aruba cu boca di hendenan y trapa riba leynan existente, manera e ta bisa.

Den e carta aki manera Marsman a señala, ta bisa cu Arubig lo bin den futuro y cu ley nobo, loke ta nifica cu no mag di traha como tecnico dental na Aruba sin cu tin algun regla of palabracion cu e organisacion di dentista.

Tin ley cu ta bisa cu tecnico dental mester un orden di dentista y asina cu tin un djente den boca e no mag di traha den boca di pashent, “esey ta e ley existente y esey ta e ley cu IVA mester aplica. Nan mester tuma medida contra hende cu ta bisa cu nan tin cierto opleiding, pero IVA ta drumi.” El a bisa.

Den su opinion, Inspectie Volksgezondheid Aruba (IVA) tin cu implementa leynan existente y Directie Volksgezondheid Aruba (DVG) por pone e maneho na unda Marsman ta sigura cu algo a bay robes cu e persona aki: “por ta nan a bis’e bay traha den boca numa, pasobra nos ta bay cambia ley den futuro. No ta asina e cos ki ta bay na Aruba; boso tin cu cambia e ley prome.”

Marsman a afirma den su declaracion cu segun IVA, nan logra papia cu e tecnico dental aki y nan splik’e cu e no mag di haci publicidad, “pero e ta bay riba Facebook y gaña pueblo grandemente. E ta pone un historia cu ta academico y un specialista; e ta misleid pueblo.”

Ademas, Marsman ta sigura cu e persona aki ta haci trabounan dental cu no por haci, specialmente dentadura completo di flexite cu segun su experiencia, e ta caba cu tur weso, door cu weso no por cu presion, “pero mi ta compronde cu su nivel di estudio e no por sa esey.”

Igualmente, Marsman ta declara cu “e persona aki ta traha aparato contra roncamento y ta haci hopi publicidad di esey riba rednan social cobrando entre 1.250 pa 1.500 florin, cu un modelo bieu cu no ta flexibel ta malo pa kaakgewricht di e pashent.”

Tin version nobo cu ta flexibel cu e pashent mes por ahusta na cas y esey tin un costo di 650 florin na dentista, “con e como un tecnico dental ta traha y bende un model anticua na 1.250 hasta 1.500 florin? Loke ta pone bo pensa caba si e ta eynan pa yuda pueblo cu prijs mas abou of no,” el a expresa.

Den su opinion, IVA mester atende e caso aki y mester stop e tecniconan dental pa traha den boca y cobra prijsnan dobel cu un dentista por cobra: “e trahamento di cos den boca sin autorisacion di dentista ta un peliger pa salud dental y nan ta cobra mas caro cu e dentista mes. Mi ta sigur cu masha tiki dentista lo duna e tecnico aki un orden awor.”

Conforme na loke Marsman ademas a afirma, e persona en cuestion aki no ta traha pa AZV sino riba su mes “cu tambe ta un cos di lamenta pasobra no tin control riba dje.”

Marsman tambe ta conoci pa motibo cu den pasado el a trece dilanti un otro denuncia di un dentista cu na juni di aña 2022 a wordo deteni riba sospecho di falsificacion y di a realisa actonan den cuido medico en contra di Ley di Calidad den Cuido Medico (Landsverordening Kwaliteit in de Gezondheidszorg). El a keda deteni ocho dia y a wordo poni den libertad despues.

Ministerio Publico a cera e caso penal contra A.A.K na juli di 2022 cu un multa unda el a paga e suma maximo di 25.000 florin. Si lo a yega asina leu cu a hiba A.A.K dilanti Corte, e lo a posiblemente haya un castigo den forma di trabao pa comunidad y/of un multa. Segun Ministerio Publico, pagando e suma maximo ta cuadra cu e seriedad di e hechonan y un caso penal no tabata necesario mas.

Di esaki, Marsman a señala cu hopi hende ta puntra ken a haci robes den caso aki: “Pueblo mag di haya sa e investigacion di IVA tocante e caso aki di kico a bay robes y si esaki no lo pasa mas? Hopi pashent di e persona aki a keda perhudica.” El a finalisa.

Redactor di Bon Dia Aruba den proximo dianan lo tuma contacto cu Inspectie Volksgezondheid Aruba tocante e caso aki pa asina ey nan tambe duna na banda di medaya y trece dilanti informacion di esaki.