Dentista Hendrik Marsman ta trece dilanti su preocupacion tocante universidad di dentista cu ta daña nomber di Aruba

Durante su conferencia di prensa recien dentista dr. Hendrik Marsman a trece dilanti algun punto di preocupacion relaciona cu e sector di cuido dental na Aruba. Un di e puntonan aki ta tin di haber cu operacion di un universidad di medicina y dentista, cu segun Marsman, ta dañando nomber di Aruba.

“Esey ta un neishi di problema. Supuestamente e ta un estudio di dentista, pero ami cu a studia na Hulanda, mi sa kico ta un curriculum di un estudio di dentista y loke tin eynan ta crackerjack opleiding,” el a expresa.

Segun dentista Marsman ta indica na e universidad en cuestion tin dentista ta traha cu a bin for di India, a haya permiso di DIMAS pa traha como profesor pa duna les, pero nan ta traha den boca di pashent y nan no tin AruBIG. El a indica cu nan lo a aplica pa AruBIG, pero no a hayele pasobra e diploma cu nan tin nan no por traha cune na Aruba.

Segun el a conta e dentista cu ta traha na e universidad a trata un pashent, a cobrele y despues a sali un email anonimo pa Instituto di Calidad cu a termina na un bishita pa informa e dentista aki cu e por traha den boca di pashent y a stop cu esey.

Dentista Marsman a agrega cu segun el a compronde aworaki nan a contrata un negociante Arubiano cu ta emplea dentista. El a indica cu e negociante aki a emplea un dentista di Colombia y ta huur un parti di e universidad pa trata pashent.

Dokter Marsman a remarca cu loke ta preocupante p’e ta cu Inspectie Volksgezondheid ta exigi cu dokternan mester mantene den secreto e dossier di pashentnan cu tin datos personal, pero segun rumornan cu a yega cerca dje, e hendenan di e fundacion cu ta den directiva tin acceso na e dossier di e pashentnan pa wak kico ta ser haci y kico ta ser paga pasobra nan ta cobra comision pa esey pasobra nan ta duna e inversionista Arubiano e espacio pa wak pashent eynan.

“Tur dia 15 di luna ami tin cu paga omzetbelasting, mi tin cu paga mi AOV etc. Nos tur na Aruba, nos ta keha hopi cu nos tin cu pag’e, pero eynan ta free for all. Bo ta haya profesornan ta bin traha, nan no tin cuenta di banco y ta ser paga cash. Despues di 12 luna nan ta bay y mi ta puntra mi mes con nan ta haya e placa cash ey, con esey ta bay cu banco y ken ta paga e cosnan ey pasobra si tin opgaaf di tercero, ya nan a bay. Ken ta paga esey pasobra nos tur tin cu paga nos parti. Mi kier pa DIMP bay check kico ta pasando eynan, cu AZV y SVB,” el a remarca.

Di otro banda tin un parti cu ta mas tristo. Dentista Marsman a indica cu e universidad ta cobra 60 mil dollar pa aña pa e studiantenan sigui e estudio eynan, y ta un estudio di cinco aña. Pues semester uno ta costa 19.500 dollar, semester dos igual y semester tambe.

El a splica cu algun studiante di e universidad a manda email pa diferente instancia reclamando cu nan a ricibi carta di e universidad bisando cu nan no lo por participa den nan examen final di e semester cu nan ta den si nan no paga prome e suma di e siguiente semester. Pues si nan no paga adelanta, nan no por participa den examen. Esaki, segun dentista Marsman por ser mira como cu e studiantenan ta secuestra y ta ser “blackmailed” pa e universidad, y pa motibo di esaki algun studiante a haya stress y bandona e estudio.

Pa loke ta trata e parti practico di e estudio na unda e studiante tin cu siña ranca djente, bora djente, pone vulling, siña tur e materialnan, el a indica cu mester di un luga caminda e studiantenan por train y mester tin supervision. Esey no tin na Aruba pa e studiantenan di e universidad aki, segun el a indica. El a menciona cu nan a purba haya e clinica di Aruba pero no a bay bon, despues a purba cu Universidad del Bosque na Colombia, pero no a logra tampoco.

El a indica cu segun e por a compronde aworaki nan lo ta bezig ta check algo na Africa pa manda e studiantenan. “Mi pregunta ta si nan ta bin di Canada, dicon nan no ta hacie na Canada. Kico ta e problema eynan? Pasobra nan no ta acredita niun caminda, e diploma aki no ta acredita niun caminda y Aruba tampoco ta reconoce,” el a remarca.

Pero loke si tin na Aruba, el a agrega, ta un carta di minister di Salud cu ta bisa cu ora hende tin e diploma di e universidad aki nan por tuma e boardexamen na Merca of Canada y si pasa esey nan por traha na Aruba como dentista. “Mi ta duda cu e estudio y curriculum cu nan tin, nan lo pasa e examen ey den futuro,” el a subraya.

Dentista Marsman a expresa cu e situacion aki ta dunando Aruba un mal nomber y cu ademas nan ta haci hopi cos cu no mag. Segun el a indica e universidad ta bisa Douanne cu e carganan cu ta bin pa nan ta donacion y asina no ta paga invoerrechten. El a haci un yamada pa investiga si e rumornan aki ta cuadra y cu nan ta importa cosnan como donacion.

“Mi ta haya hopi straño con hendenan di afo ta bin Aruba haci negoshi, keda sin paga e primanan social, y cu nan ta importa cos sin paga invoerrechten. Pero mi ta kere mester bin investigacion di Douanne, di DIMP, y Inspectie mester wak e dentista sin permiso sin AruBIG y Dienst Onderwijs mester cera e universidad pasobra e ta malo pa nomber di Aruba y nan ta estafa e studiantenan sigu mi pasobra no tin niun estudio clinico,” el a bisa.

El a indica, referiendo na e carta cu studiantenan a manda, cu den e carta aki e studiantenan ta splica cu nan no ta hayando nada di loke nan a ser priminti. Nan a ricibi hopi promesa di e universidad, pero nada no ta pasando. “Esaki no ta bon pa Aruba. Nos ta hiba Aruba na halto y hendenan aki ta bin di afo y haci baina akinan,” el a finalisa.