Ayera mainta, parlamentario Mike de Meza (AVP) a presenta den corte cu su abogado, mr. Desiree Croes, pa un audiencia den e caso cu e parlamentario a entrega contra Ministerio Publico. Esaki pasobra Departamento di Impuesto a entrega un keho contra De Meza, pero OM no a duna De Meza ningun informacion.

Manera Bon Dia Aruba a reporta anteriormente, parlamentario y candidato pa minister den Gabinete AVP-Futuro, Sr. Mike de Meza a entama un caso contra Ministerio Publico, despues cu a bira conoci cu Departamento di Impuesto a entrega un keho contra De Meza. Pa motibo di e keho, OM mester a habri un investigacion penal contra De Meza.

Abogado Croes a bisa den prensa local cu nan a pidi OM informacion riba e acusacionnan, poniendo un deadline pa ricibi contesta di OM. OM no a contesta nan solicitud dentro di e periodo cu De Meza y su abogadonan tabata kier, y pa e motibo aki, a hiba OM corte.

E caso ta pa purba forsa OM, cu intervencion di un hues, duna De Meza y su ekipo informacion tocante e acusacionnan y kico ta e sospechonan cu tin contra e parlamentario.

De Meza: “Ami ta bringa e acusacionnan aparentemente cu tin of no tin contra mi”

A pesar cu e caso ayera tabata tras di porta cera, na salida, De Meza y Croes a duna algun comentario pa prensa presente.

“Hues a scucha nos hopi bon,” mr. Croes a bisa. “El a haci hopi pregunta na OM, cu OM no por a contesta. OM constantemente tabata sconde tras di e LIM,” el a agrega, referiendo na e ley conoci como Ley di Screening di Minister. “Ora un persona ta wordo cualifica como un sospechoso, e mester haya sa di kico e ta wordo sospecha. Y nos ta dos siman caba ta bayendo ta puntrando kico ta pasando, y akiden tampoco OM no por a contesta e pregunta. No por a duna ningun splicacion, e no por a ni contesta e hues su preguntanan.”

Sinembargo, Croes a bisa cu nan ta “hopi contento mes” cu e atencion di hues. Hues “a bisa cu e ta compronde e situacion cu De Meza ta na e momentonan aki, y el a pusha hopi den direccion di OM pa duna cierto informacion, pero OM constantemente ta bisa cu no por contesta.”

Tocante pakico ainda no por duna contesta, Croes a bisa cu OM “ta tira riba cu no tin suficiente placa, no tin suficiente hendenan cu ta traha. Y mi ta kere, si esaki ta hopi straño pa bo tende, cu un caso asina importante, cu tin un interes general, interes di gobierno, di Pais Aruba, cu no ta duna preferencia. Pasobra e caso aki ta un caso sumamente importante pa atende cune.”

Pa loke ta su expectativa, el a bisa cu “nos no ta pidi pa bo keda cla cune, pero nos ta pidi pa bo cuminsa cune. Pa bo bisa nos por lo menos de que se trata.”

De Meza a confirma cu OM no por a confirma ainda si e ta of no ta sospechoso.

De Meza ta considera cu “e ultimo dos siman, ultimo lunanan, ripitidamente nos a trece cosnan straño dilanti. Na cierto momento hasta nos a bisa hues tambe cu mi ta sinti cu esaki tambe tin hasta persecucion politico den dje.” Sinembargo, el a bisa cu e ta hopi satisfecho cu e manera con hues a trata e caso, “hopi habri, e tabatin hopi pregunta (…) Bo ta mira cu e ta mira cu en berdad esaki no ta un caso usual y ta mira tambe e importancia di haya claridad mas liher cu ta posible.” Pero asina mes, no por a haya ningun claridad ainda. “OM hasta a bisa cu e no por contesta riba e pregunta si realmente nan a informa prome minister” tocante e keho, De Meza a bisa. “Ni esey tabatin contesta riba esey,” Croes a agrega, indicando cu si a haya un e-mail bisando cu ora cu sigui cu e investigacion, lo yama nan. “Dus tin algo, pero nan no por bisa kico e ta.”

Croes a critica sinembargo cu e proceso di investigacion di OM ta para e proceso di nombramento di minister pa De Meza, siendo cu ni sikiera por bisa ainda si e ta un sospechoso. Esaki pasobra intencion di Gabinete AVP-Futuro ta pa De Meza asumi e cartera di Infrastructura, Energia y Telecomunicacion. Sinembargo, De Meza no a pasa e screening pa minister, y e mes a bisa cu tabata pa motibo di investigacion di DIMP cu ta parti di e proceso di screening. Awo e caso di OM ta complica mas e proceso.

Contestando kico e lo haci si e tabata den posicion di formador, De Meza a bisa cu “e ora mi lo mira e situacion anto mi lo tuma un decision.”

Bon Dia Aruba a puntra kico ta e plan awo relaciona cu e nombramento di De Meza como minister.
“Ami ta bringa e acusacionnan aparentemente cu tin of no tin contra mi. E camindanan ey mi ta cana,” el a contesta. “E nombramento di minister cu eseynan ta den man di prome minister [Mike Eman]. No ta den mi man.”

OM: Actualmente no tin ningun persecucion andando contra De Meza

Den un comunicado di prensa ayera mainta, OM a splica cu De Meza a haci su demanda a base di articulo 43 di Codigo di Procedimento Penal. Señor De Meza a afirma cu e formador a pone na haltura cu Ministerio Publico a califik’e como sospechoso, a base di un denuncia door di inspector. Cu e peticion aki, e ta pidi Hues pa duna Ministerio Publico ordo pa inform’e tocante e tipo y motibo di e sospecha contra dje.

Articulo 43 di Codigo di Procedimento Penal ta bisa cu un ciudadano por pidi Hues pa haya un solucion na momento cu surgi un problema pa cual no tin regulacion legal specifico, pero cu di tur manera mester wordo resolvi urgentemente. Den tal caso, Huez por tuma un medida concreto pa garantisa cu e proceso penal ta desaroya bon y husto. Pa respalda su peticion, e peticionario ta basa su argumentacion riba e Convencion Europeo di Derechonan Humano, e Staatsregeling y e Directiva 2012/13/EU di Parlamento Europeo y di e Conseho cu ta trata e derecho di haya informacion den procedimentonan penal. E directiva aki ta bisa cu tur persona cu ta wordo acusa pa un hecho castigabel tin derecho pa wordo informa tocante e tipo y motibo di e acusacion contra dje.

Sinembargo, segun OM, actualmente no tin ningun persecucion andando contra e peticionario. Tampoco a deten’e, ni invita pa ser scucha como sospechoso. Eseynan lo ta e momentonan caminda un mester pone un sospechoso formalmente na haltura cu e ta sospecha of acusa di comete un delito penal. Esaki ta aplica pa tur ciudadano cu ta sospechoso, incluso pa De Meza. Ministerio Publico no ta mira ningun motibo pa kita di e norma aki den caso di e peticionario en cuestion. Pa e motibo ey, Ministerio Publico ta para riba cu mester rechasa e peticion.

E procedimento di screening pa candidato-minister

Considerando e obligacion di confidencialidad cu ta aplica pa tur persona cu ta envolvi den e ehecucion Landsverordening integriteit ministers, Ministerio Publico no por haci ningun declaracion tocante e ponencia di e peticionario cu e ta formador lo a inform’e cu e ta sospechoso di un delito penal, segun e comunicado di OM. Ministerio Publico por unicamente indica den forma general, cu den e Landsverordening integriteit ministers, e legislador a encarga e Procurador-General pa haci un investigacion hudicial riba e candidatonan pa minister. Tambe e legislador a determina cu e Procurador-General mester saca un declaracion na e formador y na Gobernador, den cual ta indica si e candidato ta sospechoso di un delito den un investigacion activo. Pues e legislador ta determina e reglanan, e funcionnan legal y e obligacionnan di Ministerio Publico. E ciudadano mes ta determina e momento cu e ta presenta un denuncia.

Hues lo tuma su decision mas liher posibel, en todo caso dentro di un siman. E pregunta principal cu lo mester contesta ta si mester haci excepcion pa un candidato pa minister, en comparacion cu cualkier otro ciudadano di Aruba.