E Departamento Arubiana-Caribiana di Biblioteca Nacional Aruba ta carga un importancia sumamente profundo pa e historia di nos isla. E ta describi como un caha di tesoro cultural unda por haya documentonan original, escrito y produccion cu ta forma parti di e memoria colectivo di tur Arubiano. E departamento aki ta conserva historia social, cultural, politico y economico.

Parti di e responsabilidad di e departamento aki ta di colecciona, warda, organisa y preserva e herencia documenta di Aruba y exhibi esaki pa henter comunidad por disfruta di esaki.

Bon Dia Aruba a bishita e departamento aki y a comparti cu Zetsia Ponson, ken ta un specialista di informacion y cu ta traha den e Departamento Arubiana-Caribana.

Sra. Ponson a splica cu e departamento di Arubiana-Caribiana ta unda “nos ta colecciona, warda y preserva tur locual a wordo skirbi tocante Aruba, sea door di un Rubiano of persona di afo. Nos tin e herencia documental di Aruba.” El a conta tambe cu e parti di Caribiana ta nifica cu “e no ta Aruba so, sino Aruba, Boneiro, Corsou, Saba, St. Maarten, St. Eustatius, un coleccion chikito di Surinam y un coleccion mas grandi di e Islanan Ariba.”

E departamento di Arubiana-Caribiana, ta conta cu varios coleccion diferente.

Coleccion Nacional

Cumpliendo cu e tarea di conservacion di e patrimonio, a crea e departamento di Arubiana unda ta colecciona tur buki y documento cu ta papia di Aruba of a ser skirbi pa un persona cu a nace of biba na Aruba manera entre otro manuscrito, pamfleta, buki, corant, video, potret y tur loke ta un creacion intelectual. Tambe ta tene un coleccion di Aruba cu a publica den exterior.

Den e coleccion aki, ta compila informacion den diferente tereno manera arte, musica, deporte y politica. Un coleccion valioso ta e coleccion di revista y corant local ademas di e medio audiovisual di Aruba. Den e medio aki ta inclui video, pelicula, diapositivo y potret. Tin porcion di e material cu ta proteha y ta usa solamente cu metanan di investigacion.

Coleccion “Antiguo”

E departamento di Arubiana tin bukinan y documentonan antiguo cu ta data te cu aña 1600. E bukinan cu tin den e coleccion aki tin un balor historico cu ta sumamente grandi pa nos paisnan.

Coleccion Antilliana, Caribnana y di Surinam

Den e coleccion aki tin tanto buki, revista, foyeto y te hasta un seleccion di recorte di actualidad cual a ser saca for di revista y algun corant cu tin informacion tocante e islanan den Caribe Hulandes, Surinam y e resto di e region di Caribe. Un parti di e coleccion aki tambe ta trata Aruba den e periodo prome cu Status Aparte.

Coleccion Hartog

Dr. Johan Hartog tabata e prome persona cu tabatin e funcion di bibliotecario na Aruba. E ta un persona cu tambe ta conoci pa su bukinan unda e ta conta historia di e 6 isla. Su coleccion tin un balor indispensable pa Aruba, mirando cu e ta contene mapanan bieu, recorte di articulonan tocante Aruba y demas documentonan historico. E herencia di Sr. Hartog a bira parti di e coleccion cu por mira na Arubiana.

Coleccion Ito Tromp

E coleccion aki ta consisti di varios documento etnografico, cual ta historia oral, investigacionnan y partitura di musica di compositornan, manuscrito di Rufo Wever, un gran cantidad di poema y algun storia di autornan cu nunca a ser publica. E coleccion a bira un parti di Arubiana na momento cu e Departamento pa Cultura y Educacion a cera na fin di aña 1985.

Publicacion di gobierno

Den e coleccion aki por haya rapport, relatonan anual y otro publicacionnan di diferente departamento gubernamental y demas instancianan no gubernamental. Den e coleccion aki ta ofrece por ehempel, documentonan cu por data te hasta aña 19000, e relatonan di Parlamento tanto di Antiya Hulandes como di Aruba y tambe “Landscourant Aruba.”

Coleccion digital

Actualmente, Arubiana ta den un proceso di digitalisacion di tur su documentonan. Na e departamento, tin computer disponible unda por lesa y busca informacion di un forma digital. Tin revistanan manera Scol i Komunidat, corant manera Arubaansche Courant di 1948 pa 1967 y corantnan mas reciente, diferente tipo di rapport, coleccion di potret y te hasta diferente tesis.

Coleccion Lago

E departamento tin un coleccion extenso di Lago, cual ta consisti di entre otro mas di 20,000 imagen, documento, material audiovisual, buki, corant, corespondencia, artefacto y articulo. Tambe tin material cu ta digital tocante lago manera articulonan cu a publica den corantnan di exterior.

Ademas di e varios coleccion, tambe ta conta cu maneranan di buskeda di antes manera Kaartenbakken. Sra. Ponson a splica cu “prome cu Google nos tabatin kaartenbakken. Nos no a laga nan bay nunca. E no ta actualisa mas pero tin algun coleccion cu ta coleccion cera manera Ito Tromp, Sr. Hartog. Cada bes cu mi bay un pais y mi topa nan kaartenbakken, prome cos cu mi ta haci ta busca Aruba.”

Aunke e varios coleccion cu Arubiana-Caribana ta conta cune tin un balor un poco mas aumenta den uso pa investigadornan, studiantenan di nivel secundario y mas avansa, escritor, artistanan tambe e tin importancia pa tur esnan cu ta interesa y ta busca un inspiracion den nos patrimonio cultural. Tur hende ta bon bini na e departamento aki. Algo sumamente conveniente y accesibel ta cu no tin mester di un miembresia pa por lesa of consulta e material cu tin, aunke mester tene na cuenta cu den e departamento aki no ta fia, pues tur loke tin di haber cu e coleccionnan fisico mester ta presencial, sinembargo si por saca un copia.

Un parti cu ta un poco di lamenta ta e falta di uso cu como comunidad nos ta duna na e herencia cultural aki. Sra Ponson a comenta cu esaki ta posiblemente debi na e hecho cu poco di nos realmente sa cu e departamento aki ta existi, expresando cu “nos ta un departamento di biblioteca nacional … nos tin for di 2018 den un gebouw separa, aunke en total nos tin 38 aña den existencia. Mi ta kere hopi hende no sa cu nos ta existi y esey mester sali afo.”

Aunke e plataforma digital ta traha sumamente bon, e ta un experiencia completamente unico y diferente presencial. Mira personalmente e articulonan cu nos ancestronan a laga atras pa nos por identifica nos mes y conecta cu nos historia of simplemente conoce e isla na un nivel mas profundo como bishitante, ta algo indispensable. Pa por atende cu esaki, e departamento ta preparando, entre otro, un exhibicion tocante Sr. Johan Hartog, ken anteriormente nos a menciona como e prome persona cu tabatin e funcion di bibliotecario na Aruba.

E departamento aki ta un joya cual su balor ta incalculabel y ta lamentabel cu recientemente esaki a cay victima di vandalismo. Sra Ponson a conta cu 2 siman atras “diabierna mainta mi a yega y semper mi ta pone ketel yen’e cu awa pero mi a ripara cu no tin awa.” El a tuma ocntacto cu WEB sinembargo nan a informa cu no tabatin trabao andando den e area y tur cos ta mustra bon di nan banda, pues Sra. Ponson a bay check e meter e saki tabata cera. “Ora mi a habri e meter, awa a cuminsa basha bay riba caya,” y despues di investigacion rond a bin topa cu a bay cu “un 20 meter di tubo di koper.” E sospechosonan aki a purba drenta paden tambepa medio di saca un di e luznan “pero mi ta kere e distancia di plafond pa abao ta grandi y nan no tabatin trapi of nan a wak e censor den e skina.” A causa di esaki e departamento a keda algun dia sin awa pero danki na un respuesta y accion rapido nan por a sigui cu e operacionnan diario.

Mientrastanto, a tuma algun medida di seguridad manera cambia e luznan pafo y di pone camara pafo tambe. Aunke e ta algo lamentable y cu no mester a sucede, un parti positivo cu por saca di esaki ta cu e por yuda den mira unda por tin debilidad den seguridad y tuma medida pa evita casonan mas severo den futuro.

Tur loke tin di haber cu e historia di tanto Aruba como su rumannan isla ta algo di balora y mas den e formato aki unda nos por tende directamente for di esnan cu a bin prome cu nos, kendenan a laga atras tur loke nan a siña y colecciona tocante nos isla. Haci uso di tur e hermentnan aki lo yuda nos profundisa nos conexion cu Aruba, y inevitablemente, nos identidad y amor pa nos isla lo crece.