Departamento di Asunto Social cu ayudo financiero adicional pa aña escolar nobo pa esunnan den bijstand

Dialuna mainta den un conferencia di prensa, vocero di Departamento di Asunto Social (DAS), Jesseline Soto-Garcia hunto cu Sr. Rudy Wester, hefe suplente di e seccion di bijstand, a duna informacion riba e ayudo financiero adicional cu e personanan den bijstand lo haya pa e aña escolar nobo.

Den luna di october tur persona entre 3 y 24 aña di edad cu ta den bijstand y cu ta bay scol regular durante dia, lo ricibi un ayudo financiero extra pa e aña escolar nobo. “E persona cu ta ricibi of cu tin derecho ariba e ayudo aki, mester ta un persona cu ta ricibiendo e 250 florin tur luna for di bijstand y cu tabata ariba payroll di bijstand pa luna di september, e ultimo pago cu a tuma luga diasabra cu a pasa”, Sra. Soto-Garcia a bisa.

E ayudo financiero extra aki ta consisti di dos parti, Sra. Soto-Garcia ta splica. E prome parti ta wordo yama ‘schooluitkering’. E parti aki ta consisti di un suma di 220 florin pa cada mucha te cu un suma di 800 florin maximo pa cada famia. Ta bay paga e ayudo aki cu e siguiente pago di bijstand riba dia 9 di october. E di dos parti di e ayudo ta loke ta wordo yama ‘ouderlijke bijdrag’, cu ta consisti di un suma di 120 florin pa cada mucha. Ta paga e suma aki directamente na scol y e famia no ta ricibi e suma aki hunto cu e pago di luna di october.

“E suma di 120 florin aki ta wordo paga directamente na e scol. Esaki ta pa yuda cubri e gasto di contribucion di e mayor na cada scol. Ta importante pa bisa cu si e contribucion di e mayor na un scol ta mas caro cu 120 florin pa aña, ta e 120 florin maximo lo wordo paga. Si e suma ta menos cu 120 florin, e suma cu e scol ta pidi ta loke ta wordo paga. Atrobe ta hopi importante pa bisa cu e suma aki ta bay directamente na e scol, pues e famia no ta ricibi esaki den e pago di october”, Sra. Soto-Garcia a splica.

Pa por ricibi e ayudo financiero extra aki, Sra. Soto-Garcia ta splica kico e rekisitonan ta pa por aplica y tambe con proceso di aplicacion pa e ayudo aki ta. “Manera nos tur sa scol a habri siman pasa diaranson. Desde e dia ey y durante e siman aki, cada famia por pasa na nan scol pa busca e formulario di DAS”, el a bisa.

E ta remarca tambe cu aunke tin scolnan cu ta e-mail e formulario aki, ora e mayor ricibi esaki mester print e, yena e formulario y mester entrega personalmente na e departamento. “Bo por e-mail e tambe pa nos departamento, pero mester acudi personalmente segun e schedule di entrega.”

Mescos cu aña pasa, e aña aki un biaha mas DAS lo traha cu un schedule di entrega y esaki ta principalmente pa evita aglomeracion. Desde dialuna 13 di september te cu diabierna 17 di september por haci entrega di e formulario di scol. Sra. Soto-Garcia a duna un splicacion di con precisamente e proceso di entrega ta hinca den otro.

“Tras di bo carnet di bijstand, bo ta wak e letter cu ta sigui tras di e letter o, y a base di esey bo ta bay wak riba ki dia bo persona mester pasa na nos oficina situa na San Nicolas, ex-Centro Medico pa entrega e formulario. Cada letter tin nan dia specifico y e diabierna 17 di september nos a tene habri pa tur persona cu pa un of otro motibo no por a bin riba nan dia stipula, alsnog tin e posibilidad pa trece riba diabierna. Pues nos ta haci nos maximo esfuerso un biaha mas y nos ta pidi tur persona pa por fabor cumpli cu esaki pa asina e seccion di bijstand tambe por cumpli cu bo sin ningun problema den luna di october 2021”.

El a splica tambe cu si en caso un persona no cumpli cu e entrega di formulario, esaki ta nifica cu e bijstand di e persona aki lo keda blokia, e persona no lo ricibi e 250 pa cada mucha manera ta custumber cu ta ricibi tur luna y tambe ora ahusta back e suma, dia cu e persona haci entrega di e formulario, lo ahusta e suma pero sin forsa retroactivo.

Sra. Soto-Garcia a menciona tambe cu normalmente ta duna e ayudo aki den luna di september pasobra normalmente scol ta habri den luna di augustus. Mescos cu aña pasa gobierno a cambia e fecha di e apertura di scol pa september y ley specificamente ta bisa cu unabes scol habri, e famia mester entrega e comprobante cu e mucha ta bay scol pa e por ricibi e ayudo aki. “Pa e motibo ey e aña aki nos a haya nos un biaha mas ta schuif e ayudo pa luna di october. Nos tur sa cu pa ora scol cuminsa bo tin gasto, dus e ta cay fastioso, pero nos ta bay cumpli cu e ayudo aki pa luna di october”, el a señala.

“Mi tin cu remarca cu lamentablemente den e pago cu a pasa siman pasa diasabra, tur persona cu tabata ricibi e 250 florin, no a ricibi esaki, y esaki no ta paso nos a decido ‘hey nos ta kit’e for di e pago di bijstand’, pero nos tin cu ehecuta e ley manera cu e ta wordo bisa, dus p’esey mes e pago a baha, pero e pago ta wordo ahusta pa e pago di october 2021”, el a agrega.

Sr. Rudy Wester, hefe suplente di e seccion di bijstand, tambe a a enfatisa cu e tardansa pa duna e ayudo extra aki a bin simplemente door di e cambio di fecha di e apertura di e scolnan. “E tardansa ta bin di decisionnan politico cu ta wordo haci, decisionnan cu lamentablemente pa via di e pandemia hopi cos a wordo cambia”, el a bisa. “Hopi cos por a wordo preveni pero un cu otro no tabata den espacio pa hacie, pero nos ta traha cu un sistema, nos ta traha cu un maneho y segun locual no haya como instruccion nos ta ehecuta”.

Pa locual ta trata e cantidad di persona na Aruba cu ta ricibi bijstand, Sr. Wester a bisa: “Door di e pandemia a bin mas hende acerca cu ta bay haci cu e budget, of e tanto hendenan na placa y na hende a bira mas. Pero nos ta mira si un caida den e hendenan cu a cuminsa haya trabao y nan cuminsa stop, pero e ta hopi. Nos ta papia di mas di 3 miyon florin pa luna y e cantidad di hende ta entre 2000 pa 3000 hende”.