(AP) – Australia su departamento di Defensa lo kita tur camara di vigilancia cu a ser crea pa companianan cu ta relaciona cu e partido comunista for di nan edificionan, e gobierno a revela diahuebs despues cu Merca y Britania a tuma decisionnan similar.
E corant Australiano a reporta diahuebs cu por lo menos 913 camara y sistemanan di entrada electronico desaroya y fabrica pa companianan Chino manera Hikvision y Dahua ta den oficinanan di gobierno incluyendo e departamento di defensa. Hikvision y Dahua ta parcialmente propiedad di China su partido comunista cual ta den mando actualmente. “Unda cu nos mira e camaranan aki particularmente, nan lo keda kita,” Marles, ken ta Minister di Deefnsa, a conta Australian Broadcasting Corp. “Tin un problema aki y nos lo lidia cu esaki.”
Ora a puntra pa comentario tocante Australia su decision, vocero di e ministerio encarga cu asuntonan den exterior Mao Ning a critica loke el a yama “practicanan eroneo cu ta daña e concepto di siguridad nacional y ta abusa e poder di estado pa discrimina contra companianan Chino.”
Sin menciona Australia pa nomber, Mao a bisa cu e gobierno Chino semper a “encurasha companianan Chino pa inverti den exterior y coopera di acuerdo na e principionan di mercado y reglanan internacional y a base di cumplimento cu leynan local.”
