Hobennan di Aruba tambe ta birando victima di traficacion di hende

E demanda pa actonan sexual, pero tambe labor barata ta e motornan pa traficacion di hende na Aruba, segun e Trafficking in Persons Report 2022 di Departamento di Estado di Merca. Y den e ultimo cinco aña, traficadornan di hende a probecha di victimanan domestico y stranhero na Aruba. Particularmente a probecha di hende muhe Venezolano, y adultonan stranhero den labor forsa na Aruba, particularmente den e area di servicio y construccion.

Hopi Venezolano cu ta yega Aruba ta keda mas largo cu nan visa ta permiti, y hopi ta keda sin documento legal y ta core e riesgo pa bira victima di traficacion. Famia, doño di negoshi y criminalnan ta abusa di algun di e Venezolanonan aki, pa medio di labor domestico, construccion y prostitucion.

Gerentenan Chines rond di e isla tambe ta haci nan mes culpable na labor forsa, particularmente cu personanan di China kendenan ta traha na supermercadonan, mientras cu negoshinan di doñonan di India y famianan ta pone homber di nan mesun pais suheto na trabao forsa den tienda y servicio domestico.

Famianan Arubiano di otro banda, ta tene hende muhe di Caribe y Sur America mara na forsa laboral, den servicio domestico. Ningun di e gruponan aki ta haya e pago, e descanso y dianan liber cu pa ley nan tin derecho di dje.

Pero asina mes, aunke cu tin tur e indicacionnan, poco biaha e casonan aki ta resulta na un penalisacion criminal pa e traficadornan y esaki ta haci cu Aruba tin un caminda pa cana pa actua contra sclavitud moderno.

Segun Departamento di Estado di Merca, Gobierno di Aruba a aumenta su esfuerso pa proteha victimanan di traficacion di hende un poco. A raporta cu a identifica siete potencial victima, entre nan cuater cu tabata abusa pa trabao di sex y tres pa abuso di labor. Esaki tabata na 2021 cu ta tres mas cu e potencial victimanan identifica na 2020. Di e siete victima aki, tres tabata mucha muhe (menor di edad), tres hende muhe y dos hende homber. Nan tabata di Colombia, Republica Dominicana, Finlandia y Venezuela.

A evalua otro siete pa indicadornan di traficacion, compara cu 10 na 2020, pero a determina cu nan tabata victima di otro tipo di crimen. Gobierno a indica cu un organisacion internacional a identifica otro cuater victima di traficacion, los di e sietenan cu Aruba mes a señala. Aruba a categorisa e personanan aki como potencial, victima presumi of victima confirma. Pero, no a duna servicio of asistencia na esnan cu tabata considera victimanan potencial. Ta trata personanan cu tipicamente ta asocial cu investigacionnan preliminario. Gobierno ta brinda sosten social na esnan cu ta presumi of ta victima confirma.

Di otro banda, e hecho cu Gobierno ta mara e status di victima y acceso na servicio na e caso criminal asocia contra e traficador, ta nifica cu si no presenta cargo, e asistencia na victima tambe ta cay afo. Esaki ta un punto critico, esta cu pa victimanan por haya ayudo, nan mester ta conecta na investigacion of caso penal andando. Asina Gobierno a raporta cu a referi un posibel victima pa ayudo na 2021. E victima a nenga estadia (shelter) pero a ricibi asistencia basico y no a deport’e. Pero ora fiscalnan a determina pa sigui cu e cargo di contrabanda, en bes di traficacion di hende, e asistencia social aki tambe a cay afo. Den e periodo analisa, ningun victima a asisti Gobierno den persigui su traficador.

Gobierno tin un acuerdo cu organisacionnan civico pa facilita identificacion di potencial victimanan di traficacion memey di e gruponan migrante mas vulnerable, y ta haci esaki door di permiti e personanan aki keda anonimo. E NGOnan e ora ta encarga pa duna servicio y asistencia social durante e fase inicial di e investigacion. Di otro banda, ningun victima a haci uso di e mecanismo aki pa raporta e crimen cometi contra nan na 2021.

E grupo di trabao contra traficacion di hende, TMMA, a sigui duna tur autoridad hudicial y personanan di servicio social cu e lista di indicadornan di e señalnan mas comun di traficacion di hende. Esaki ta banda di e codigonan cu Reino Hulandes a crea. Asina Aruba a logra evalua migrantenan indocumenta basa riba e indicadonan di traficacion durante entrevistanan.

Sinembargo, observadornan cu a raporta na Departamento di Estado a expresa preocupacion cu e persona di e centro di detencion (Huis van Bewaring) y cu otro personal no tabata suficiente ekipa pa identifica casonan di traficacion di hende. Gobierno a bisa di a train 320 personal di Huis van Bewaring, Departamento di Integracion y Maneho di Stranhero (DIMAS), Inmigracion y otronan den e cadena di stranheria pa reconoce e indicadornan y referi victimanan pa asistencia. Tin un mecanismo basico pa referencia y ta trahando riba un protocol cu te na fin di e periodo di reportahe no tabata completa.

CMMA

Di otro banda, e Centro di Coordinacion Traficacion y Contrabanda di Hende Aruba, CMMA si a establece un grupo di trabao hunto cu actornan social y civil pa coordina identificacion y referencia di victima. Di e forma aki por yuda victimanan, adulto y mucha cu estadia di emergencia, pero tambe acomodacionnan pa tempo mas largo pa victimanan femenino adulto. Segun Coordinador Nacional Jeannette Richardson Baars, e trabaonan pa e centro di cuido nobo, pa victimanan masculino y famianan ta sigui y mester keda cla pronto.

Aruba ta duna victimanan stranhero e mesun derecho y proteccion cu local y ley ta autorisa extension di ayudo temporario di migracion di tres pa seis luna, y ta hasta permiti victimanan cambia di dunado di trabao si ta sospecha cu ta abusa di nan. A pesar di esaki, Aruba no a raporta ningun caso di victimanan cu a haci uso di e beneficionan aki y mas bien a indica cu mayoria victima cu a dicidi pa no testigua contra e traficadornan, a bolbe nan pais, cu excepcion si un regreso sigur tabata imposibel. Aunke cu ley ta permiti victimanan ricibi compensacion te cu 50 mil florin na daño fisico y emocional, ningun a haci uso di e posibilidad.

Prevencion

E esfuersonan pa preveni traficacion di hende, aunke leve, a aumenta y e Coordinador Nacional (Jeannette Richardson Baars) ta sigui guia e esfuersonan, hunto cu CMMA. Pero e plan di accion nacional 2018-2022 falta recursonan financiero dedica pa su implementacion, cu ta nifica cu hopi di e actividadnan tabata basa riba alocacion financiero ad hoc, cu ayudo periodico di Reino Hulandes. Esaki a limita e capacidad y stabilidad di e esfuersonan na nivel di persecucion, proteccion y prevencion.

Departamento di Estado di Merca a aplaudi e video cu CMMA a produci unda a ilustra e vulnerabilidad di hende pa bira victima di traficacion y tambe a percura pa entrenamento di oficialnan riba e responsabilidad di e gruponan di trabao encarga pa preveni, detecta y persigui traficacion di hende.

Hobennan di Aruba ta birando victima

Locual ta un otro tendendencia preocupante y esaki ta algo cu e Coordinador Nacional Jeannette Richardson Baars tambe a señala recientemente ta cu gruponan di traficadornan ta pusha criminalidad, unda e traficadornan ta forsa victimanan pa comete crimen, sea den benta di droga y/of prostitucion. Richardson Baars a bisa cu tin biaha te hasta ta e mesun famianan ta haci esaki cu menornan di edad, pa forsa nan haci actonan cu ta contra ley.”E por ta pobresa, pero nos a nota un aumento di e casonan aki,” e Coordinador Nacional di Traficacion y Contrabanda di Hende a bisa. Esey ta haci e trabao di CMMA y e otro gruponan di trabao contra Traficacion y Contrabanda di hende mas crucial cu nunca.