Despues cu ayera mainta un tip valioso a keda entrega na Departamento di Salud Publico, inspector di seccion Warenkeuring en Hygiëne di DVG a sali pa haci inspeccion riba un container di webo cu segun informacion ta contene webo daña.
A resulta cu e tip cu DVG a ricibi tabata uno veridico. E container cu DVG su inspector a logra topa cune en berdad tabata contene webo cu lamentablemente tabata daña. DVG mesora a pone beslag riba e container y a duna instruccion pa esaki wordo destrui.
No ta conoci pa DVG cuanto webo daña por a subi mercado prome cu ayera 7 di mei, pa cual motibo ta informa y alerta comunidad pa ta consciente na momento di cumpra y/of come webo.
Por detecta un webo daña door di:
- Buta esaki den un glas cu awa, si e webo flota ta indicacion cu e webo no ta bon.
- Holor, webo daña ta hole stinki.
- Textura, si na momento di habri e webo e ta hopi awa of tin descoloracion e no ta bon.
