Den CAft su reaccion riba e reportahe di ehecucion presupuestario pa di dos kwartaal di 2019, e organo di supervision ta mustra cu Aruba no ta cumpli cu e norma pa gastonan di personal acorda entre Hulanda y Aruba na november di 2018. Esaki ta pasobra CAft ta considera gasto di personal cu ta bin di e fondo di Crisisplan Social (SCP) como gasto di e pais.

E organo di supervision no a haya horea di parti di gobierno riba nan recomendacion pa resolve e punto aki. Den conferencia di prensa ayera mainta, minister di finanzas Xiomara Ruiz-Maduro a duna un splicacion riba e puntonan cu CAft a trece dilanti, ademas di duna su propio reaccion riba e puntonan treci pa CAft. E mandatario encarga cu finanzas ta argumenta cu tin politiconan na Den Haag cu ta pensa cu ‘nos a lanta e fondo di Crisisplan Social pa haci fiesta cune y pa parti regalo’.

Ruiz-Maduro no ta di acuerdo cu esaki, basando su mes riba e propio cifranan cu CAft ta uza den nan rapport, unda ta indica cu 25% di e fondonan di Crisisplan Social te awo ta gasta. “Bo no por bisa cu nos ta partiendo cen, pasobra nos ta andando responsablemente cu e plan social den un pais cu aworaki ta conoce un crisis social.” Sin inclui e SCP, Aruba a gasta 478.6 miyon na personal. E gastonan di personal cu a bin di e fondo di SCP den prome mita di 2019 ta consisti di 1.2 miyon florin, cu un total di 4.7 miyon disponibel pa henter aña 2019. Pues di e manera aki, pasobra ta agrega e 478.6 miyon na 4.7 miyon di e gastonan di personal di SCP, surpasando e norma di 479 miyon cu 4.3 miyon.

CAft kier pa gobierno plania pa por yega na evaluacion di accountant den 2020
Un di e recomendacionnan cu CAft a haci den su carta ta regarda e acuerdo cu Hulanda, den cual ta indica cu pa 2020 Aruba mester ricibi un evaluacion positivo di accountant riba e situacion financiero di gobierno. CAft a pidi pa gobierno di Aruba cuminsa traha plan di e di 3 kwartaal caba, pa asina CAft por mira con ta bay yega na cumpli e exigencia aki, cu Aruba a bay di acuerdo cune.

Mester bay compensa pa ‘sugar tax’
Banda di esaki, CAft ta mira cu mayoria di entrada cu gobierno a ricibi ta coriendo di manera proyecta y cu cosnan ta bayendo den bon direccion, cu excepcion di RDA, cual mester yega na un entrada di dividend di 14 miyon y tambe cu e 16.7 miyon proyecta di entrada cu e ‘sugar tax’, cual awo CAft a ricibi e notificacion cu no a implementa manera plania den cuminsamento di juli 2019. Pa ambos lo mester compensa e entradanan proyecta.