E cultura Arubano a mira varios desaroyo substancial durante curso di un siglo. Cu e introduccion di e refineria Lago den comienso di siglo 20, sigui pa e di dos Guera Mundial y e incentivo general di independencia politico durante mita di e siglo, e identidad cultural di e isla a cuminsa tuma forma y desde e tempo aki a desaroya via influencianan tanto local como internacional.
Den e era pre-industrial di siglo 19, no por bisa hopi tocante e identidad cultural di e isla. Formando parti ainda di e teritorio colonial di Hulanda e tempo aki, ademas di no tin un autonomia ni economico ni politico (mirando cu Corsou tabata e centro di comercio, bida cultura y maneho politico di Nederland Antilles e tempo aki), e poblacion chikito di Aruba tabata consisti mas tanto di agricultornan y piscadornan, kendenan tabata cuida di nan cria y cultivo of tabata bay pisca pa provee pa nan famia.
Manera Quito Nicolaas a comenta den e articulo “Historia di Literatura Arubiano: E Bida Cultural”, “durante e periodo pre-industrial, no tabatin actividad economico significante cu por a crea un ambiente cultural, cu solamente un manera pa genera ingreso e tempo aki pa e sub existencia di famianan Arubiano.”
Te e introduccion di e Lago Refinery na San Nicolas den 1928, e isla a mira un ‘boom’ chikito den manifestacionnan cultural y entretenimento, mientras agricultornan a laga e bida di cunukero atras pa traha den e refineria, cual a resulta den e adkisicion di un pilar economico diferente pa Aruba.
Prome cu esaki, entretenimento y manifestacionnan cultural tabata experiencia mas tanto den parokianan local y e isla su ‘elitenan’, kendenan hopi biaha tabata tuma parti den actividadnan cultural y di entretenimento rond di e isla, manera bay cinema of reuni pa comparti poesia diadomingo despues di misa.
Bida literario
Durante e siglo 19 y te cu 1940, tampoco tabatin hopi rasgo di un clima cultural pa e sector di literacia cultural riba e isla. Educacion primario a keda introduci riba e isla den mita di siglo 19, sigui pa educacion secundario y educacion di nivel mas halto den fin di añanan 30 y 40.
No ta te cu mita di añanan 1950, cu e introduccion di e acuerdo E.R.N.A den 1951 y e firmamento di e Statuut den 1954, cual a permiti mas espacio pa y control riba e desaroyo cultural y economico di Aruba, cu e bida literario riba e isla a cuminsa crece substancialmente compara cu e decadanan prome. Esaki tabata den respuesta na e institucionnan local estableci den 1940 pa crecemento cultural y literario, sinembargo esey ainda no a hala e atencion di e publico general.
1950 a trece cune un ‘boom’ den produccion literario riba e isla, manera esnan di V.S Piternella, ademas di esun di autornan migrante manera Jose Ramon Vicioso y Rings William Rufus, kendenan tambe a contribui na e desaroyo literario di e isla. E movemento literario tabata promovi mas aleu pa emisoranan local manera Voz di Aruba y Radio Kelkboom, cu nan emision regular di obranan literario.
E añanan 1950 y 60 tambe a mira e influencia di culturanan internacional, specialmente esun di Merca. Durante e tempo aki, a causa di e influencianan internacional ademas di e prosperidad continuo di e refineria, tradicionnan cultural na Aruba a cuminsa tuma forma y bira amplio, mientras diferente conceptonan mundial y local a keda introduci den e sociedad Arubano. Cu e establecimento di stacion di television local Tele-Aruba den 1963, y cu tempo y posibilidadnan, programanan local manera “Nos Tera” a cuminsa presta mas atencion na e cultura Arubano y a traha pa forma un consciencia cultural dentro di e comunidad.
E aña 1960 tambe a mira e subida di autornan local y artistanan, kende tabata mas confortabel cu e produccion di obranan den nos idioma, Papiamento, pero ken tambe tabata produci obranan den Spaño, Ingles y Hulandes.
E fenomeno nobo aki tabata den respuesta na e interaccion entre crecemento economico, prosperidad individual, bida cultural y expresion literario.
Siglo 21
Awendia, influencia internacional den nos cultura ta prevalente ainda, specialmente esnan di Latino America, Merca y Hulanda. Sinembargo, tambe ta existi un identidad cultural fuerte y tradicionnan cu ta exclusivo na e cultura Arubano, hopi biaha manifestando durante celebracionnan tradicional manera Dia di San Juan, Dia di Himno y Bandera, campamento durante Pasco y hopi mas.
Cu e popularidad di rednan social den e ultimo decada, bosnan artistico, specialmente esnan di generacionnan mas hoben, a bira mas prevalente ainda y facilmente accesibel pa e comunidad di Aruba via plataformanan online manera Facebook, Instagram y TikTok.
