Prome Minister di Aruba, Evelyn Wever-Croes, durante su conferencia di prensa ayera a menciona algun plannan di desaroyo cu tin riba mesa, diferente accion cu ta tumando luga for di diferente ministerio, pa e districto di San Nicolas.

El a comenta, manera ta conoci caba, cu un di e accion pa desaroyo di San Nicolas ta den man di Minister di Turismo y Salubridad Publico, Dangui Oduber cu ta trahando riba diferente desaroyo turistico, cu entre otro e proyectonan na Baby Beach y Rodgers Beach. “Mi ta kere cu eseynan ta trece desaroyo bunita, e no ta caminda e mester ta ainda, pero bo ta mira cu poco poco e ta bayendo pa dilanti,” el a indica.

Minister di Asuntonan Economico, Comunicacion y Desaroyo Sostenible, Geoffrey Wever tambe ta trahando riba desaroyo economico general di San Nicolas y Minister di Labor, Integracion y Energia, Glenbert Croes ta trahando riba e vision energetico.

Wever-Croes a splica cu na San Nicolas nan mester keda concentra riba aspecto di energia. El a remarca cu refineria manera antes tabata conoci den pasado no lo tin mas pasobra esey no tin un viabilidad mas, pero, segun el a indica, e minister di energia ta trahando riba otro tipo di refineria, otro tipo di industrianan energetico riba e mesun tereno cu ta di e refineria aworaki.

El a menciona cu fin di februari minister di energia ta presenta e proposicionnan cu a wordo haci door di e comision cu el a instala y na e momento ey nan lo tin un bista tambe di cuanto tereno, cu aworaki ainda ta den e refineria di RDA, tin cu keda pa e desaroyo di industria di energia.

El a agrega cu no ta tur e tereno ta bay keda pa e industria di energia, pero e resto di e tereno ta bay wordo traspasa pa wordo maneha door di Minister Geoffrey Wever cu ta bay busca otro tipo di desaroyo economico pa San Nicolas. Den luna di maart lo tin e combersacion pa cu e topico aki.

 

“Bo ta mira cu tin diferente atencion ta wordo poni,” el a bisa. Pa loke ta trata su ministerio, Ministerio di Infrastructura, el a señala cu nan ta mirando e tema di iluminacion pa haci tur e barionan mas sigur y Minister di Husticia y Asunto Social, Rocco Tjon tambe ta trahando riba e aspecto aki.

E aspecto di infrastructura di caretera y di mehora e aspecto di e centro di ciudad tambe ta algo cu nan ta trahando riba dje. “Kiermen tin hopi atencion,” e mandatario a enfatisa.

LEAVE A REPLY

Please enter your comment!
Please enter your name here