Aruba ta drentando un fase decisivo den su desaroyo economico, ya cu reformanan nobo, inversion y partnershipnan regional dentro di Reino Hulandes ta cuminsa haya forma. Un relato di progreso recien cu Secretario di Estado pa Interior y Relacionnan di Reino, Eddie van Marum a manda pa presidente di Tweede Kamer ta delinea con Aruba, hunto cu Corsou y Sint Maarten, ta nabega retonan structural di hopi tempo mientras ta pone e base pa un mayor resiliencia economico y autosuficiencia. Pa Aruba e mensahe ta cla: mientras vulnerabilidadnan ta keda, e proximo añanan lo ta critico den traduci reformanan den forsa economico duradero.
Como un economia insular chikito, Aruba ta confronta limitacionnan inherente. Dependencia halto di importacion, economianan di escala limita, exposicion na shocknan externo y un dependencia pisa riba turismo ta sigui defini su realidad economico. E caracteristicanan structural aki no ta nobo, pero desaroyonan mundial recien a amplifica nan impacto. Tensionnan geopolitico creciente, presion riba cadenanan di logistica mundial y e urgencia creciente di adaptacion climatico a subraya e necesidad pa Aruba diversifica su economia y fortifica su fundeshinan institucional.
Den cuadro di Reino, Aruba ta participando den un conhunto amplio di reforma bou di e asina yama Landspakketten, e paketenan di reforma acorda cu Hulanda den e consecuencianan di e crisis di COVID-19. Segun e relato di progreso, Aruba a haci avancenan palpabel den mehoracion di su clima empresarial y di inversion, modernisacion di legislacion y fortificacion di administracion publico. E reformanan aki no ta djis ahustenan tecnico; nan ta destina pa kita bareranan di hopi tempo cu a stroba crecemento di sector priva y a descurasha inversion.
Un di e desaroyonan mas significativo pa e comunidad empresarial di Aruba ta un mehoracion di acceso na financiamento. Cu e apertura di e schema BMKB-ACS, empresanan chikito y mediano riba e isla awor por obtene credito respalda pa garantia di gobierno pa medio di financiadornan acredita. Pa hopi empresario Arubiano, acceso na capital pagabel tabata un obstaculo persistente, particularmente pa start-ups y empresanan innovativo cu ta cay pafo di e perfilnan tradicional di prestamo. E disponibilidad di financiamento garantisa ta marca un paso importante pa un ecosistema empresarial mas inclusivo.
Na mesun momento Aruba ta trahando riba modernisacion di su cuadro regulatorio den areanan manera ley di competencia, proteccion di consumidor, proceduranan di licencia y legislacion di privacidad. E reformanan aki ta diseña pa aumenta transparencia, reduci peso administrativo y alinea regulacionnan local mas estrecho cu normanan internacional. Pa inversionista y negoshinan local mescos, claridad regulatorio ta un condicion clave pa planificacion a largo plaso y crecemento sostenibel.
Reforma di mercado laboral ta un otro pilar central di e agenda economico di Aruba. Mescos cu su bisiñanan Caribense, Aruba ta lucha cu desigualdad di habilidad, scarsedad di labor den sectornan specifico y un dependencia pisa riba labor migrante. E Secretario di Estado ta subraya esfuersonan continuo pa modernisa legislacion laboral, mehora mediacion laboral y acelera admision di trahadonan stranhero caminda experticio local no ta disponibel. E medidanan aki, segun e mandatario, ta particularmente relevante pa e sector di turismo di Aruba, sistema di cuido di salud y industrianan tecnico, tur di cual ta depende di un suministro constante di trahadonan cualifica.
Reforma di enseñansa ta hunga un rol complementario den e proceso aki. Pa medio di iniciativanan manera e Alianza Strategico di Enseñansa, Aruba ta trahando pa fortifica e aliniacion entre enseñansa y necesidadnan di mercado laboral. E meta ta pa sigura cu e hobennan Rubiano ta miho prepara pa sectornan emergente, entre otro servicionan digital, energia renobabel y hospitalidad avansa. Cu tempo, ta anticipa cu e acercamento aki lo reduci dependencia riba labor importa y aumenta participacion local den segmentonan di balor mas halto di e economia.
Transformacion digital mas y mas ta ser mira como un catalisador pa diversificacion economico riba Aruba. Den su carta Secretario di Estado van Marum ta señala cu esfuersonan di digitalisacion ta ser intensifica den henter e partinan Caribense di Reino, incluyendo e fortificacion di e funcionnan di hefe di informacion, modernisacion di luganan di trabou digital y actualisacion di legislacion estadistico. Pa Aruba, mehoracion di gobernacion digital y disponibilidad di datonan ta esencial no solamente pa miho trahamento di politica, pero tambe pa haci posibel cu negoshinan por opera mas eficiente y haya acceso na mercadonan internacional.
Transicion di energia ta un otro area unda Aruba ta para na un momento pivotal. E carta ta confirma cu inversionnan financia pa medio di e presupuesto di SDE di Hulanda pronto lo cuminsa riba Aruba, enfocando riba refuerso di red, almacenamento di bateria y sistemanan di almacenamento di energia. E proyectonan aki ta destina pa sostene integracion mas aleu di fuentenan di energia renobabel y reduci e dependencia di e isla riba combustibelnan fosil importa. Pa Aruba, cu pa hopi tempo a posiciona su mes como un frontrunner den energia renobabel dentro di Caribe, e inversionnan aki ta tanto un necesidad economico como strategico. Costonan di energia mas abou y seguridad di energia mas grandi por mehora competitividad den varios sector.
Pa loke ta trata seguridad di cuminda, Reino a destina 24 miyon euro pa fortifica seguridad di cuminda riba henter e islanan, incluyendo Aruba. E financiamento aki lo sostene tanto iniciativanan priva como publico dirigi riba impulsa produccion di cuminda local, mehora logistica y mehora resiliencia contra interupcionnan di suministro externo. Pa Aruba, unda mayoria di cuminda ta ser importa, hasta aumentonan modesto den produccion local y mehoracion di cadenanan di suministro por tin un impacto significativo riba stabilidad di prijs y disponibilidad di cuminda.
Tambe Secretario di Estado Van Marum ta pone e desaroyo economico di Aruba den un contexto regional mas amplio. Despues di e evento regional di “Taking the Reins”, awor Aruba ta forma parti di un plataforma structura den cual tur seis isla Caribense di Reino ta colabora riba temanan manera acceso na financiamento, comercio regional, fortificacion institucional y e transicion berde. E plataforma aki ta reuni regularmente y ta inclui partnernan di sector priva, señalando un cambio pa un politica economico regional mas coordina.
Sosten di institutonan internacional ta fortalece e acercamento regional aki mas ainda. Pa medio di contribucionnan financiero di Hulanda, Aruba y su partnernan tin acceso na asistencia tecnico di e Centro di Asistencia Tecnico Regional di Caribe di Fondo Monetario Internacional (IMF). E sosten aki ta enfoca riba areanan manera maneho financiero publico, administracion di impuesto, estadistica y politica macroeconomico, tur di cual ta crucial pa tumamento di decision basa riba evidencia y sostenibilidad fiscal.
A pesar di e desaroyonan positivo aki, e mandatario a subraya riesgonan persistente. Aruba ta keda hopi dependiente di turismo, loke ta hacie vulnerabel pa fluctuacionnan den demanda di biahe mundial y shocknan economico externo. Adicionalmente, bareranan comercial nobo, cambionan den politica comercial di Merca y tensionnan den e region mas amplio por afecta gastonan di importacion y fluho di bishitante pa e isla. E tensionnan geopolitico continuo entre Merca y Venezuela ta ser menciona specificamente como un fuente potencial di incertidumbre economico pa sur di Caribe.
Mirando pa futuro, e carta ta enfatisa cu hopi di e programanan di inversion y presupuestonan di reforma actual ta temporal of ta bay caduca den e proximo añanan. E realidad aki ta pone presion riba Aruba pa priorisa reformanan cu por entrega beneficionan duradero dentro di tempo y capacidad administrativo limita. Fortalece infrastructura vital, mantene finanzas publico sano y sigui inverti den educacion y cooperacion regional ta ser identifica como condicionnan esencial pa resiliencia a largo plaso.
Pa Aruba, e trayecto pa dilanti lo depende di su habilidad pa converti e compromisonan di politica den resultadonan concreto. E fundeshinan ta ser poni a traves di mehoracion di mecanismonan di financiamento, reforma regulatorio, digitalisacion y inversion den energia. Toch e exito final di e iniciativanan aki lo ser midi door di si nan ta conduci na un economia mas diversifica, oportunidadnan di empleo local mas grandi y vulnerabilidad reduci na shocknan externo.
Mientras cu Reino ta sigui redefini su maneho pa cu desaroyo economico den Caribe, Aruba ta haya su mes na un crusada critico. E escogencianan haci awor, y e velocidad y consistencia cu cual reformanan ta ser implementa, lo forma e trayectoria economico di e isla pa decadanan binidero.
