image.jpeg

ORANJESTAD- Den e edicion di awe por aprecia un prome resumen (parcial) di e encuesta bao di auspicio di e proyecto Confronting Caribbean Challenges (CCC) teni den ultimo lunanan di 2015 na e seis islanan den Caribe, liga na Hulanda. Un di e conclusionnan positivo cu por saca ta cu en todo caso na Aruba, compara cu e otro islanan, tin un opinion bastante balansa di nos situacion frente e otro islanan, Hulanda (y Reino Hulandes), politica local y supervision di Reino. 

No ta un sorpresa realmente cu na tur e islanan e encuestadonan ta expresa un desconfiansa considerabel ora ta trata nan opinion tocante nan politiconan local. Esey por ta un motibo pakico un mayoria grandi ta haya supervision di Hulanda (Reino Hulandes) deseabel. Na Aruba 75,4% di e entrevistadonan ta haya supervision necesario, mientras cu na e otro islanan e ta menos pero den tur caso un mayoria grandi ta na fabor. Esey ta bira ainda mas fuerte ora ta haci seguidamente e pregunta encuanto supervision financiero. Aki un parti mas grandi ainda di e contestanan na Aruba tabata na fabor di supervision: 76,1% di e total ta di e opinion aki. Esey no ta significa cu na e otro islanan e opinion general ta tanto diferente. Na Curaçao por ehemplo tambe un 61% ta haya supervision general necesario y 67% den caso di supervision financiero. 

Un pregunta importante haci den e encuesta – cu no a aparece den nos resumen di awe –   tabata si e persona ta considera cu cos ta miho o no compara cu 5 aña pasa. Den e caso di Aruba e pregunta ta haya un conotacion diferente, pasobra no tin e referencia na e cambionan den structura estatal di 10-10-10, manera na e otro islanan. Na Aruba por supone anto cu e entrevistadonan ta referi na e situacion socioeconomico y politico ora nan haya un pregunta asina. Ta remarcabel cu e grupo mas grandi ta duna un opinion negativo: 46,9% di e total ta haya cu e situacion ta menos bon of hopi menos bon cu cinco aña atras. Solamente un minoria di 22% ta haya cu e situacion ta miho of hopi miho. Ora ta trata di nan situacion personal, e panorama ta cambia y un grupo mas chikito di 31,1% ta bisa cu cos a bira mas malo pa nan mes.

Por interpreta esaki di diferente manera. Por bisa cu e situacion empeora ta djis e percepcion di e persona di e situacion general, pasobra e mes no a bay atras. E tin e opinion aki anto a base di loke e ta tende y lesa den prensa y ta scucha di otro hende? Mientras cu su mes situacion personal ta parce di contradeci esaki? Pero con esey por ta si mayoria di prensa na Aruba ta fielmente comprometi cu e gobierno actual? Di unda e individuonan aki ta saca e informacion cu cos na Aruba ta menos bon cu cinco aña pasa, aunke nan lo ta consciente cu e situacion aki no a toca nan? Den e sentido aki e resultadonan di e encuesta aki ta ‘food for thought’ y mester conduci na mas investigacion serio y imparcial. Pa politico local en todo caso ta bon pa tuma nota di esaki, pa e simpel motibo cu no semper ta e situacion real ta conta, sino mas bien con un persona ta experencia e situacion.

Pero, kico por conclui di e resultadonan di e encuesta, no solamente na Aruba, pero na e otro islanan tambe. Cu e poblacion generalmente no tin tanto confiansa den su politiconan local, pero esey den e mundo aki no ta nada straño. Lo bo mester bay te na Noord Korea pa bo haya un encuesta unda hende ta gaba nan gobierno di turno, anto forsosamente so. Esey ta mira den prensa tambe. Tin biaha prensa ta haya e critica cu nan ta critica gobierno mucho hopi, bueno, esnan cu ta critica gobierno anto y no ta alaba nan dia den dia afo. Pero esey tur caminda tambe ta asina; esun cu ta sinta eynan, cu ta den e ‘driver’s seat’, ta e mester soporta critica.  

Sin embargo, tin un punto cu ta resalta y esey ta cu riba tur isla, y Aruba mas cu tur otro, mester di e supervision di madre patria como proteccion contra mal gobernacion di nan mes politiconan. Na e politiconan ey e mensahe ta cla y raspa, y aki ni welga di hamber no ta yuda. Tampoco e yoramento tocante un areglo di conflicto cu ta un deseo cu absolutamente no ta yama ningun reaccion di simpatia cerca pueblo. Y pakico no? Pasobra conflicto di interpretacion di Statuut ta surgi ora tin un situacion di mal gobernacion caba, y intervencion di e nivel superior di gobernacion den Reino ta inminente. No por ta asina cu nos como ciudadano mester mira supervision como proteccion di un banda, y ora tin problema mira Hulanda como e malhechor. Den e sentido aki pueblo en general ta mustra mas sentido comun cu mayoria di nos politiconan.