Varios ciudadano a expresa nan descontento recientemente tocante e manera cu careteranan ta ser drecha na Aruba, cuestionando pakico algun caretera ta haya mantencion mas cu un biaha, mientras otro careteranan, cu segun nan ya tin hopi tempo den mal estado, ta keda sin atencion.
Segun e algun ciudadano a expresa, tin situacion caminda algun caretera ta ser drecha mas cu un biaha, mientras otro careteranan den diferente bario no ta haya reparacion na tempo. Esaki a crea percepcion den comunidad cu e proceso di seleccion no ta cla of husto.
Adicionalmente, algun ciudadano a mustra disgusto pa motibo cu durante e bishita di Su Mahestad Rey Willem-Alexander, tabata visibel cu infrastructura den e rutanan cu e Rey a pasa a haya mantenemento rapido. Segun nan, esaki ta contrasta cu careteranan den diferente bario cu pa hopi tempo ta wardando pa ser drecha.
Bon Dia Aruba a tuma contacto cu Departamento di Obra Publico (DOW) pa haya mas claridad riba e proceso cu ta determina cual caretera ta ser drecha of asfalta prome, si tin prioridad, y con ta ser dicidi entre yena buraco of haci reparacion completo di un caretera.
Den un reaccion, representante di DOW a confirma cu careteranan principal tin prioridad den e proceso di mantencion. Entre otro, nan a menciona rutanan importante manera caretera pa aeropuerto, L.G. Smith Boulevard y e area di hotelnan como ehempel di careteranan cu ta haya atencion prome.
Pa loke ta trata reparacion di buraconan, DOW a indica cu esaki por tuma lugar na cualkier momento, dependiendo di disponibilidad di material manera asfalt. Segun nan, no tin un momento fiho pa esaki, sino e decision ta basa riba condicionnan practico y disponibilidad.
Pa loke ta criterio pa asfalta un caretera completamente, DOW a indica cu varios factor ta ser considera. Entre nan ta e tipo di caretera, e condicion actual di e wegdek (superficie di caretera), e frecuencia di reparacionnan anterior, e edad di e asfalt, y tambe e reparticion geografico.
Mientras DOW ta mantene cu tin criterio cla pa determina prioridad, hopi ciudadano ta sigui insisti cu tin careteranan den estado critico cu mester atencion urgente. Nan ta enfatisa cu mas aleu di planificacion y criterio tecnico, tin un necesidad inmediato pa atende situacionnan cu por representa peliger pa conductor y peatonnan. Pa nan, e cuestion principal ta no solamente con ta scoge cual caretera pa drecha, sino cu e ritmo di e reparacionnan mester acelera pa preveni mas daño, accidente y frustracion den comunidad.
