Diaranson siman pasa minister di Sector Primario Geoffrey Wever a publica un comunicado den cual a divulga un poco tocante e reunion cu United Farmers Association (UFA) cu a tuma luga recien. Den e comunicado manda pa gabinete AVP-FUTURO, a afirma cu UFA a mustra interes den e concepto di Agri-Innovation Park (AIP). Sinembargo, varios agricultor a subi red social pa denuncia e declaracion aki, expresando nan frustracion cu e comunicado a duna desinformacion tocante e sentimentonan berdadero di varios miembro di UFA tocante AIP.

E concepto di AIP a surgi na october 2024, unda minister Wever—minister e tempo ey den gabinete MEP-RAIZ—a “kick start” e proyecto cu e meta pa fortalece seguridad alimentario na Aruba. E proyecto ta encera un tereno di 36.000m2 na Santa Rosa unda lo instala greenhouses di glas cu tecnologia di ‘hydroponics’ pa agricultornan por huur y cultiva cuminda eynan. Esaki ta cay bao di e prome fase di e proyecto, y si logra ehecuta e di cuater, por mira un expansion di e tereno pa 100.000m2.

E metodo aki ta ser usa na Hulanda caba, y ta buscando pa implementa esaki pa Aruba. Pa por realisa e proyecto aki adecuadamente, minister Wever a regla pa un investigacion, unda Santa Rosa, compania di greenhouse PRIVA y TWO a studia riba con pa optimalisa cultivo comercial den e sector di Agricultura na Aruba. Segun e rapport a conclui, Aruba por realisa un balor agrega di 111,8 miyon florin pa aña si reemplasa cierto importacion cu produccion local.

Segun un comunicado di e ministerio encarga, “E modelo cu ta wordo proponi – cu produccion centralisa den e futuro Agri-Innovation Park (AIP) – ta brinda un plataforma comparti pa e agricultornan por produci sin e carga di necesidad di inversion capital cuantioso pa por cuminsa.”

A enfatisa cu AIP lo ofrece entre otro, un greenhouse moderno y infrastructura; servicionan logico y sosten tecnico; oportunidad pa formacion, investigacion y innovacion y espacio pa agricultornan estableci y agricultornan nobo.

Sinembargo, ta parce cu tin miembro di e sector Agricola cu no ta di acuerdo cu e metodo nobo aki.

Desde e publicacion recien tocante e reunion di UFA cu minister Wever, un usuario a subi riba Facebook pa denuncia desinformacion cu a ser publica y alabes conta su banda di e storia.

Segun e usuario—di ken su identidad nos lo mantene priva—ta conta, e ta un miembro di UFA y tambe a participa den e reunion cu minister Wever. Manera e ta conta, e reunion tabatin e meta pa trece puntonan di prioridad pa e asociacion.

United Farmers Association (UFA) ta un plataforma unda miembronan agricultor por reuni pa pone atencion riba cierto puntonan importante pa nan operacion diario. Esaki ta inclui entre otro, tereno, awa y materialnan necesario pa cultivacion. E asociacion tin miembronan di diferente tipo di agricultura, por ehempel hydropnics, sintropics, cultivacion tradicional, micro greens etc.

Segun e usuario ta confirma, na ningun momento UFA a toca e tema di AIP durante e reunion—al menos no cu tur miembro presente. E miembro ta splica cu desde minister Wever a presenta e concepto aki, ya el a enfrenta preocupacion di varios agricultor—specialmente for di esnan cu ta usa e metodo tradicional di planta den tera. Es mas, e miembro ta splica cu durante e presentacion di e concepto aki, e encuentro a bira un debate unda varios a trece nan critica dilanti.

E miembro di UFA ta splica cu e oposicion ta principalmente pa via cu hopi ta haya cu e metodo di greenhouses no ta adecua pa mayoria agricultor aki na Aruba. Manera a menciona, e greenhouse lo utilisa e metodo di hydroponics, cual ta un sistema cu ta cicla awa cu nutriente pa muha e mata.

E problema di AIP, manera e ta bisa, ta cu e no ta ofrece un plataforma pa mayoria agricultor beneficia di dje. Manera e miembro a bisa: “E no ta pa nos.”

E usuario tambe a trece su preocupacion cu kico lo pasa si no tin suficiente local pa yena e espacio di AIP. E miembro ta preocupa cu si no tin suficiente local, gobierno lo busca hende di afo, cual na final di dia no lo trece ningun beneficio pa Aruba, segun e miembro. E sentimento aki a ser afirma pa Sra. Kinsasha van der Bliek, miembro di partido RAIZ y di tambe UFA. Den un relato di opinion, van der Bliek a conta cu ora agricultornan a expresa nan oposicion pa e proyecto, “Wever a finalisa haciendo cla na nos, ‘…si boso no cultiva den e sistemanan aki, nos lo mester busca cultivadornan di afo pa si bin haci uso di nan…’.”

E frustracion cu a surgi siman pasa ta bin for di e hecho cu e comunicado di minister Wever ta bisa un cos, mientras cu e realidad no ta cuadra. E miembro ta hasta afirma cu otro miembronan tambe ta sinti cu e comunicado no tabata corecto den su interpretacion di e reunion.

A expresa cu tin frustracion di parti algun miembro di UFA pa con e ministerio lo aloca e placa cu Aruba lo haya pa e sector aki—parti di un inversion di Hulanda pa tur seis isla den Reino. Tambe a conta cu e minister no a papia cu tur agricultor concerni, sino solamente cu agricultornan den e tereno di hydroponics.

Manera e miembro ta bisa, pasobra no a tene un combersacion transparente cu agricultornan local, e maneho di e proyecto aki no a ser adecuadamente ehecuta.

Desde e prome publicacion di e usuario riba Facebook, otronan tambe a bin dilanti pa expresa na oposicion di AIP y a denuncia e desinformacion poni den comunicado di e ministerio.

Aunke e concepto di AIP tabatin como meta pa promove agricultura local y logra un manera sostenible pa garantisa seguridad alimentario, ta parce cu e proyecto aki ta causando un division den e sector di Agricultura, y ta poniendo confiansa di agricultornan den minister Wever su maneho di e proyecto den duda.