Recientemente Aruba su nomber a resona na Costa Rica den e competencia Panamericano Cadet di taekwondo na unda dos atleta a logra medayanan di brons despues di 10 aña sin por a logra esaki den un competencia Panamericano Cadet.

Bon Dia Aruba a combersa cu coach Monica Pimentel di Impact Taekwondo Aruba y coach di e atletanan cu a representa Aruba na Costa Rica, ken a conta con e competencia a bay, con e preparacion tabata y kico ta e siguiente plannan pa e atletanan aki.

Pimentel ta conta cu e competencia na Costa Rica a bay hopi bon na unda atletanan Kianna Krosendijk y Anabella Fernandes a representa Aruba den Panamericano Cadet den categoria di 12 pa 14 aña.

Den e categoria aki Anabella Fernandes a logra un medaya di brons den categoria di 55 kilo. “Ta hopi bon pa Aruba pasobra ultimo biaha cu nos gana un medaya Panamericano den Cadet tabata mi kier sa 10 aña pasa”, Pimentel a bisa.

El a remarca cu esaki tabata un sorpresa inespera, pero sigur agradabel, mirando cu recientemente Aruba a sali di e pandemia di COVID-19 y pa e muchanan bay competi den un competencia asina grandi, e no tabata spera pa medaya pasobra ta prome biaha tambe cu e muchanan ta competi den un campeonato asina grandi. “Pa nos e ta un gran logro y tambe un sorpresa hopi bunita”.

Apart di e medaya di brons cu Fernandes a logra den e categoria 12-14 aña, 55 kilo, den e competencia ‘open tournament’, cu ta un ranked tournament, tur dos atleta a logra medaya di brons den e categoria di 59 kilo.

Pa loke ta e preparacion di e atletanan, Pimentel a splica cu mirando cu e muchanan no ta infantil mas y ta den e categoria di edad un tiki mas grandi, e oranan di training a aumenta y esaki tabata inclui cu nan mester train dos biaha pa dia, mainta prome cu nan bay scol y despues di scol, ariba algun dia.

“Esey ta un cambio pa nan, pero ta asina mes e ta ora cu bo ta bira mas grandi, bo cantidad di training tambe ta subi. E preparacion a bay mas intenso di loke nan mes ta custuma cune, pero mi ta contento cu nan a tuma e desafio aki y hunto cu e mayornan tambe nos a bay pe. Si nan tin cu lanta trempan, e coachnan y mayornan tambe tin cu lanta trempan tur dia, e ta un sacrificio di tur hende”, el a agrega.

Ya caba a wordo anuncia cu e siguiente campeonato Panamericano lo tuma luga otro aña den luna di februari na Las Vegas. Pimentel a subraya cu nan ta spera cu nan por bolbe gana medaya of bin cu un miho resultado otro aña.

Preparacion pa otro aña ta cuminsa trempan tambe, Pimentel a comenta cu nan tin pensa, probechando di vakantie grandi, bay cu e muchanan un training camp na Mexico y wak tambe si nan por haci un otro competencia preparatorio prome cu e campeonato mes.

Tocante e diferencia di asisti un training camp afo of preparacion completo na Aruba mes, Pimentel a splica cu na Aruba no tin hopi ‘fogeo’, algo cu no ta pasa solamente den e deporte di taekwondo, pero otro deportenan tambe. Fogeo kiermen cu no tin hopi competencia of muchanan pa bringa contra dje pa practica y p’esey e parti di training afo ta hopi importante den e preparacion di e muchanan. “E ora nan ta haya e oportunidad di practica cu otro hende y haya mas confiansa. Mi ta kere e ta miho si e muchanan tin mas fogeo”, Pimentel a finalisa.