(AP) – Gobierno di Spaña tabata kier manda un mensahe luna pasa cu su accion contra Airbnb: cu e economia Spaño y su mercado di vivienda no ta un “free for all” cu ta balora ganashi mas cu autoridad, un minister a expresa na The Associated Press diamars.
E gobierno a duna ordo na Airbnb pa kita casi 66,000 cas na huur for di e plataforma, cual segun e gobierno ta den violacion di reglanan local pa medio di no nombra su numbernan di licencia, pone e number di licencia incorecto of no specifica e doño di e apartamento. Airbnb ta apelando e decision.
Spaña ta un di e paisnan mas bishita na mundo. Aña pasa, e pais Sur Europeo di un poblacion di 49 miyon, a ricibi un record di 94 miyon bishitante internacional.
Sinembargo un problema di vivienda accesible cu ta particularmente grave na ciudadnan manera Madrid y Barcelona a causa rechaso creciente na huurnan di vakantie pa termino corto. Airbnb ta posiblemente e actor mas conoci y visible.
E gobierno Spaño ta bisa cu ambos ta relaciona: e subida di Airbnb y otro companianan di huur y e costo di vivienda y huur pa cas den aumento. “Obviamente tin un conexion entre e dos hechonan aki,” minister di Derecho di Cosumidor Pablo Bustinduy a conta AP. “E no ta un relacion linear, e no ta e unico factor afectando e,tin varios otro, pero e ta obviamente un di e elementonan cu ta contribuyendo.”
Un rapport recien di Bank of Spain a bisa cu e pais tin un escasez di 450,000 cas. Den e hot-spot turistico di e islanan Canario y Balearic, mita di e viviendanan disponible ta acomodacion pa turistanan of propiedadnan cu ta pertenece na personanan cu no ta residente, segun e rapport.
“Turismo ta seguramente un parti vital di e economia Spaño. E ta un sector strategico y importante. Sinembargo di mesun manera cu tur otro actividad economico, e mester ta haci den un manera sostenible,” Bustinduy a bisa. “E no por pone den peligro e derechonan constitucional di e pueblo Spaño. Nan derecho na un hogar pero tambe nan derecho na bienestar.”
E pais a mira varios manifestacion grandi cu a atrae miles di persona pa exigi mas accion di gobierno riba vivienda. Posternan cu ta inclui uno bisando “Saca Airbnb for di nos barionan” na un marcha recien na Madrid ta señala cu e rabia ta creciente. “Mester haya un balans entre e derechonan constitucional di e pueblo Spaño y actividadnan economico en general,” Bustinduy a bisa.
Gobiernonan regional na Spaña tambe ta atacando e problema. Aña pasa, Barcelona a anuncia un plan pa cera tur 10,000 apartamento licencia den e ciudad como propiedaddi huur di termino cortico pa aña 2028 pa asina salbaguardia e suministro di vivienda pa residentenan full-time.
Airbnb a bisa cu mientras e apelacion ta pasa door di corte, ningun propiedad na huur lo keda inmediatamente kita for di e website.
Den respuesta na Spaña su orden, Airbnb a bisa cu e plataforma ta conecta doñonan di propiedad na esnan cu ta huur pero e no tin obligacionnan di supervision, aunke e ta rekeri e anfitrionnan demostra cu nan ta cumpli cu leynan local. Bustinduy a bisa cu Spaña su accion recien ta refleha un deseo na spana, pero tambe otro caminda, pa tene companianan tecnologico manera Airbnb na cuenta.
“Tin un bataya andando tocante responsabilidad,” Bustinduy a comenta. “E naturalesa digital di e corporacionnan multinacional extraordinariamente poderoso no mester ta un excusa pa falta di cumplimento cu regulacionnan democraticamente estableci.”
Bustinduy, ken ta pertenece na e coalicion den gobernacion su partido iskierdista Sumar, a descarta e idea cu e gobierno Spaño su accion contra Airbnb lo desencurasha turistanan di bishita e pais.
“E lo encurasha estadianan mas largo, e lo encurasha turismo responsable y lo preserva tur cos cu nos tin den e pais bunita aki, cual ta e motibo dicon tanto hende kier bini aki,” el a comenta.
E minister tambe a critica aerolineanan di costo abao. Spaña a pusha contra permiti e tipo di aerolineanan aki cobra pasaheronan pa ekipahe di man. Aña pasa, el a duna boet na 5 aerolinea, incluyendo RyanAir y easyJet, un total di 179 miyondollar pa ekipahe di man.
“E principio tras di e accionnan aki semper ta mescos: proteha e derecho di consumidornan,” Bustinduy a bisa. “Corporacionnan poderoso, sin importa con grandi, mester adapta nan modelo di negoshi na regulacionnan existente.”
