Un organismo di gobierno a corta e conexion di internet pa e fundador di WikiLeaks, Julian Assange, den e embahada di Ecuador na London, luga unda e ta como refugiado pa varios aña caba.
E conexion di internet di Julian Assange a keda corta intencionalmente pa un oficina di gobierno, WikiLeaks a skirbi riba Twitter.
Assange tin mas di 4 aña refugia na London, unda el a purba pa evadi vencimento di su fianza y evita su extradicion pa motibo di supuesto delitonan sexual, cu el a comete supuestamente varios aña pasa.
El a sufri limitacion di por move, pero esey no tabata impedimento pa traha, pasobra el a continua cu e publicacion riba Wikileaks, manera informacion relaciona cu e proceso di eleccion na Merca, y specificamente dato cu a spierta malestar na e campaña pa presidencia di Hillary Clinton.
Jake Sullivan, asesor di Hillary Clinton a solicita Trump, mediante comunicado, pa condena e “Watergate moderno”. El a bisa cu e ciberatake na e campaña di Clinton a bin for di Rusia, pa tal motibo nan ta supone cu campaña politica di Trump tin conexion cu Moscu y Wikileaks.
Gobierno di Barack Obama a investiga e atakenan aki, y nan a conclui e siman cu a pasa cu Rusia ta tras di e incidentenan aki. Merca a priminti un respuesta “proporcional” na Moscu, cu segun Obama a bisa, a participa den e situacion aki, cu e obhetivo di influencia resultado di e eleccionnan di november na Merca.
