Despues di CAft, kico?

Durante bishita di ministro Plasterk a bin dilanti tambe e tema kico ta bay sucede cu supervision di Reino si otro aña e papel di CAft keda cumpli. Pa basta tempo caba e partido na mando ta duna señal cu e ora ey caminda ta habri pa nan dal bay atrobe, sin supervision di Reino. Loke si nan ta boga pe ta un organismo di control local, un ‘Camara di Presupuesto’ (Begrotingskamer), cu ta bay duna conseho na gobierno encuanto su presupuesto. Bo a lesa bon: duna conseho na gobierno!

Pero, no ta esey ta exactamente nos problema cronico? Cu nos tin mil y un forma di conseha gobierno, y na e manera mas cinico, sin duna argumento drechi, nan ta pone conseho un banda, bisando:”pero ta djis un conseho e ta, mi no mester sigui e conseho.” Loke ta lubida convenientemente aki ta cu den e tradicion di Reino Hulandes e organonan di conseho aki, manera cerca nos un Conseho Consultativo (Raad van Advies) o un Contraloria General (Algemene Rekenkamer) ta ser trata cu un respet masha grandi y ta desvia di nan consehonan unicamente cu un splicacion debido y al caso. E respet ta conta tambe pa presupuesto adecua pa e organismonan aki, percurando pa suficiente personal profesional na tur momento.

E 31 aña desde Status Aparte y e trato cu e dos organismonan aki a haya di e respective gobiernonan ta papia pa nan mes: asina no ta manera di haci. Anto nos no ta papia ainda di e intentonan di stroba por ehemplo Rekenkamer den cierto investigacion confidencial cu nan por y mester haci, cu no ta na agrado di e ehecutivonan. Un solo pregunta: pakico nunca nos por tin un debate drechi tocante e aspectonan aki di gobernacion deficiente? E oportunidad lo t’ey grandemente ora cu e gobierno actual bay presenta nan plan pa un begrotingskamer cu di inicio lo ta reduci na un organo consehero, cu no ta añadi nada na e structura actual, unda Raad van Advies ya caba tin e papel constitucional di conseha riba tur ley y por lo tanto riba ley di presupuesto.

Mester considera tambe cu tur esaki ta di conocemento Hulandes caba, y cu dificilmente nan ta bay di acuerdo cu otro farsa di conseho cu no lo tin ningun poder pa para plan descabeya di un gobierno. Y pakico nan no lo bay di acuerdo? Pa e simpel motibo cu na 2018 Aruba ta mes hundi den debe cu e ta awor! No mester lubida cu na 2017 ainda tin un deficit  pa cual mester fia placa pa cubri esaki. Esey ta implica cu en todo caso te 2017 nos debe publico lo ta creciendo, y a pesar di cierto actividad di rehabilitacion na e refineria, probablemente ta colga riba nivel di 80% di GDP ainda. Talbes cu nos ta asina custumbra caba cu nos ta den e zona di peligro financiero aki, cu nos ta lubida, un mas cu otro, cu e ta un zona di peligro, unda bo no mester ta como pais. Y naturalmente e gobierno actual cu a ocasiona e permanencia den e zona di peligro aki ta prefera pa nos lubida e realidad aki.

caft.jpg

Awor, gaña un parti di e electorado, cu ta tremendo pa yega 2018 cu un surplus chikito di 25 miyon florin (mas o menos 0,5% di GDP), ta facil. Pero esey no ta nada compara cu e suma astronomico di ‘eigen vermogen’ negativo di Afl. 2500 miyon, cu mester bay drecha den e proximo trinta, cuarenta aña. Nos debe di alrededor di 4000 miyon florin mester baha te nivel di 40% di GDP pa nos ta ‘on safe ground’ atrobe, cu otro palabra nos mester en todo caso deshaci di un 2000 miyon florin di debe. Como agravante nos tin un extra piedra di molina colga na nos garganta, e proyectonan PPP, cu un extra 100 miyon florin pa aña na pago obligatorio.

Atrobe, convence un parti di e electorado cu ‘djis aki nos ta libra di e Hulandesnan’ por ta facil. Convence e Hulandesnan y e parti creciente di ciudadano consciente di e problema financiero structural cu nos ta aden, esey lo ta otro storia. Esey ta conta sigur pa e caso ora cu Hulanda asumi responsabilidad internacional pa un prestamo cu nan ta pasa pa Aruba bao di condicion faborabel. Ta nan ta keda e fiado original, cu mester cumpli cu pago, bao tur circunstancia. Anto nan lo exigi cu Aruba mester cumpli cabalmente cu e condicionnan di e prestamo. Manera cu Hulanda a laga sa tempo cu a interveni den e asuntonan financiero di Aruba na 2014, “hamas lo permiti Aruba pone nos cara na berguensa internacionalmente a traves di un default”. Palabranan pronuncia pa representante di Hulanda den Caribe na su despedida algun aña atras. Supervision t’ey pa keda!

Asunto financiero di Aruba lo keda asunto di Reino pa hopi aña. Nos ministro di Financia por bisa cu CAft a drenta pa porta di atras. Supervision di Reino lo termina dia nan ta haya ta bon; e dia cu e preocupacion no t’ey mas.

 

You May Also Like

License 7-a ta pa Citgo… Y ArubaPero no hay plata…

Cu interes nos ta sigui e discusion entre nos prome ministro y e lider ...

E berdad tocante mercado laboral

E proximo fin di siman tin un evento grandi dedica na e persona desemplea, ...

Si medida ta inevitabel…

Tuma nan mas pronto posibel Cu e situacion financiero di gobierno ta sumamente dificil, ...

Den seis siman berguensa a somenta

A scoge un evento importante di campaña pa planea e ‘regreso’ di ministro Paul ...

Ta bira tempo pa re-inventa Y sigui planifica futuro

‘No hay mal que por bien no venga’. Un expresion cu nos tur conoce, ...

Nos ta bay pa ‘dump berde’?

Bario di Paradera a manece dialuna pasa den un muestra palpable di loke habitantenan ...