United States Southern Command (USSOUTHCOM), e unidad militar Mericano responsable pa operacion den Caribe, incluyendo Aruba, a confirma cu a detecta fenomeno di UAP – Fenomeno Aereo No-Identifica – den shelo di islanan ABC.
Den ultimo lunanan, riba rednan social tin cantidad di post di ciudadano local unda ta indica cu a mira fenomeno estilo UFO, cu formalmente den circulonan di gobierno y cientifico awo ta conoci como UAP. Esakinan ta inclui luz y obheto straño den shelo. Mayoria di nan tin un splicacion y ta keda identifica, por ehempel, como satelite di Starlink, cometa, of debris di misionnan espacial.
Sinembargo, tin algun cu no ta identifica asina facil.
Papiando cu prensa Mericano, un oficial di USSOUTHCOM, kende a solicita pa keda anonimo pasobra e no tabatin autorisacion pa papia di e asunto, a bisa cu “nos a detecta cantidad di UAP regularmente. Desde e mision na Venezuela na januari, tambe nos ta mira nan cerca di Corsou y Aruba.”
