Diaranson, dia 10 di september, representante di Federacion di Trahadornan di Aruba (FTA) a reuni cu su miembronan di De Palm Tours mainta pa comparti informacion tocante e ultimo desaroyonan di dialogo cu gerencia di e empresa.

Manera representante di FTA, Ryan Giel, a confirma na varios medio di comunicacion, aki ta trata di un descontento di empleadonan cu gerencia di e compania, unda a señala cu, segun empleadonan, tin varios punto di preocupacion den maneho, incluyendo tratamento di empleadonan, problema cu camara y un falta di parti gerencia pa cumpli cu e acuerdo colectivo (COA) firma dos aña pasa.

Giel a menciona cu durante dialogonan, tabatin cierto problemanan chikito cu ta haya solucion, pero te ainda esnan mas grandi y preocupante ta keda sin ser atendi adecuadamente. Awor aki, despues di mas cu tres biaha bayendo den dialogo sin mira resultado, e sindicato a yega na su limite, y Giel a afirma cu no lo drenta mas den dialogo cu e empresa tanten cu no bin cu solucionnan pa e puntonan treci pa dilanti.

E representante tambe a enfatisa cu esaki no ta prome biaha e ta atende cu problemanan dentro di e compania, como cu el a acerca e compania dos pa tres biaha caba pa boga pa dos diferente departamento, esta esun di UTV/jeep y bus.

Durante e reunion informativo diaranson mainta, Giel a informa cu presidente di e federacion a haya yamada di abogado di e compania pa papia cu nan. Durante un reunion cu abogado, e abogado a menciona un rumor cu el a tende unda e sindicato y empleadonan lo bay para pa nan derecho, cual Giel a afirma tabata corecto. Giel a enfatisa cu el a manda carta na gerencia cu tur e puntonan di preocupacion, pero te ainda no a haya ningun contesta. Sinembargo, e unico carta cu e presidente di FTA a haya tabata relaciona cu problema di camara. Banda di esey, no a duna contesta mas riba e otro puntonan.

Abogado a bisa cu e carta ta vago, pero Giel a subraya cu esaki por ta vago pa e abogado, mirando cu e no a asisti e reunionnan, pero cu gerencia ta completamente consciente di kico e carta ta encera, mirando cu e sindicato tin ya dos aña ta atendiendo esaki cu e compania.

Cu e carta aki, Giel a conclui cu e no lo participa den dialogo te ora cu bin cu solucionnan concreto.

Pa purba alivia e preocupacionnan toch, Giel a pone como condicion cu pa e otro biaha e asisti un reunion cu gerencia, e ta anticipa cu e reunion lo inclui personanan di gerencia cu por tuma decision di biaha. Giel ta enfatisa cu esaki ta necesario pasobra no tin paz dentro di e compania—kiosk ta bringa entre nan mes, gerentenan ta bay den conflicto cu trahadornan y gerencia no ta scucha e empleadonan.

Giel a bisa cu si no por yega na un solucion pronto, e sindicato ta prepara pa intensifica nan accionnan y tuma e caso aki na corte. E reunion aki tabata planea pa diahuebs, 11 di september. Te ciere di edicion aki, no a tende mas di FTA pa e ultimo desaroyonan.

E mainta informativo aki ta sigui un accion organisa pa e sindicato dia 2 di september, unda Giel a conta medionan di comunicacion cu e empresa ta tuma decision inadecua sin consulta e empleadonan, siendo cu esakinan ta trece nan impacto riba e trahadornan. Durante e accion, tambe a conta cu e empresa ta presenta nan mes na dos diferente manera: Ora FTA ta presente, gerencia ta mustra habri pa tur posibilidad, pero den ausencia di e sindicato, e tono ta cambia pa empleadonan. Actualmente, segun Giel ta informa, shop steward di e trahadornan ta wordo menasa cu despedido pasobra e ta e persona mas “mondig”. FTA a afirma cu si gerencia despedi di e shop steward, e sindicato no lo acepta esaki.

Esaki no ta prome biaha cu e compania ta haya nan mes den un situacion cu FTA pa derecho di trahadornan. Na 2021, durante e pandemia, FTA a logra gana un referendum pa empleadonan di e empresa por bira miembro di e sindicato y asina habri caminda pa e sindicato por ta representante legal di e trahadornan—algo cu e tempo aya a splica a purba haci pa hopi tempo pero te cu e momento ey no a logra. E tempo aki tabata relaciona cu un seccion di e compania.

Potret di FTA.