Den un anuncio cu hopi ciudadano a spera pa aña largo, Minister di Infrastructura, hunto cu Minister di Turismo, Transporte y Labor, Wendrick Cicilia (AVP) a confirma oficialmente cu Gobierno di Aruba lo inicia un revision completo y modernisacion di e beach policy di e isla.

E revision ta dirigi na e Richtlijn Ruimtelijke Inrichting Stranden — conoci como e RRIS — e documentacion oficial di gobierno cu desde 2016 ta determina con beachnan publico di Aruba mester ser usa, dividi y protegi. Pa prome biaha den mas cu dies aña, e politica aki lo ricibi un actualisacion integral.

Kico ta e RRIS y con e a traha?

E Richtlijn Ruimtelijke Inrichting Stranden, of RRIS, ta e directiva di politica cu DIP (Directie Infrastructuur en Planning) ta usa pa evalua y aproba solicitud pa uso di beachnan publico na Aruba. E RRIS a keda anuncia oficialmente door di gobierno di Aruba riba 26 di augustus 2014, y a keda implementa na 2016. E documento ta cubri principalmente e districto di Westkust — e zona di costa cu ta core for di Bushiri te Arashi, e trayecto mas popular di Aruba.

E principio fundamental di e RRIS ta cla: “De stranden van Aruba behoren tot het publieke domein en moeten toegankelijk zijn en blijven voor iedereen, bewoner of bezoeker van ons land, op gelijke basis” — esaki ta indica cu beachnan di Aruba ta pertenece na dominio publico y mester keda accesibel pa tur hende di mesun manera, sea residente of bishitante.

E RRIS ta establece un sistema di zona pa e beach — incluyendo un zona di lama di 50 meter (conforme cu e Landsbesluit Openbare Wateren en Stranden) cu segun e ROP 2019 lo mester keda aumenta na 75 meter — hunto cu un bufferzone adicional di 75 meter. Operadornan di watersport y negoshi na beach ta ricibi permisonan di “precario” — licencianan temporal pa usa tereno publico — suheto na condicion estricto y renobacion anual.

Segun confirmacion huridico den diferente pronunciamento di corte, e RRIS no ta un ley formal sino un directiva di politica — cual na practica a significa cu e aplicacion di e reglanan tabata depende fuertemente di e boluntad politico di cada ministerio. E resultado: aña tras aña, residentenan a mira inconsistencia den aplicacion, confusion riba fronteranan di propiedad, y operadornan riba beach cu tabata actua sin of cu permiso inadecuado.

Un historia di frustracion: e problemanan cu a forsa e cambio

E anuncio di Minister Cicilia no ta bini den un bashi. Den añanan recien, Bon Dia Aruba a reporta riba un serie di incidente y tension riba beachnan publico di Aruba, cu hunto ta pinta un potret di un sistema di maneho cu a keda atras di e realidad di un isla cu turismo ta crece rapidamente.

E problema di palapa ta entre e mas persistente. Desde 2022 caba Bon Dia Aruba a busca claridad tocante e situacion di palapanan riba beach, y den juli 2024 — na pleno temporada halto — e controversia a bolbe den discurso publico. Turista, via gruponan popular riba Facebook, a reporta cu tabata cobra of intimida nan pa usa palapanan riba beach publico, cu algun hotel incluso tabata manda e-mail na huesped avisando cu parasol na beach ta costa entre $18 y $40. CEO di AHATA, Tisa LaSorte, a duna claridad indicando cu solamente e pida di beach cu ta den “erfpacht” di e hotel ta priva — pero e confusion a sigui pasobra e fronteranan fisicamente no ta marca cla pa ningun hende.

Na september 2024, un incidente na Baby Beach — unda un ciudadano local a confronta un turista y su famia pa a purba di usa un palapa cu e local a “reserva” — a ilustra con profundo e frustracion por yega. E turista a publica e encuentro riba rednan social, unda el a relata cu e señora local a bis’e cu si e no respeta su espacio, mester bandona e isla. Segun e publicacion, a yama polis dos biaha caba e mainta ey. E incidente a dividi opinion: algun ta compronde e causa di e activista local, pero practicamente tur hende a concorda cu e manera di actua no tabata e corecto.

Y na februari 2026 — practicamente na e mesun momento cu e anuncio di Minister Cicilia — Bon Dia Aruba a reporta riba e tendencia mas amplio di overcrowding turistico cu ta afecta no solamente e beachnan, pero tambe bisindarionan residencial. Areanan di Tres Trapi, Baby Beach y Mangel Halto, cu originalmente tabata ser considera refugio trankil pa localnan, awo ta inunda door di gruponan di UTV/ATV y tournan di boto.

Ciudadanonan a expresa nan preocupacion riba rednan social, cu comentarionan manera “esey lo mata naturalesa” y “ki dia Aruba lo mira cu nos no por practica turismo riba escala grandi na un isla di escala chikito.”

Kico lo cambia: e modernisacion di e RRIS

Segun e comunicado oficial di gobierno, e proceso di modernisacion di e RRIS lo atende cu varios punto concreto. Ta bay revisa y actualisa e guianan espacial di e directiva actual. Ta bay atende e retonan concreto di uso excesivo y saturacion di beach y ta bay introduci regulacion mas estricto y cla pa asina reduci e ambiguedad cu aña tras di aña a crea confusion y conflicto.

Notablemente, e modernisacion lo incorpora un beach adicional bao di e cobertura di e beach policy, ampliando e proteccion geografico mas leu di e Westkust tradicional. E meta ta un reparticion mas balansa y husto di e espacionan di beach riba henter Aruba.

Minister Cicilia a enfatisa un principio cu — segun su opinion — nunca mester a keda den duda: “Ningun beach na Aruba nunca lo ta propiedad di un hotel.” E declaracion ta dirigi claramente na e confusion persistente tocante fronteranan di propiedad y e practica di comercialisacion di espacionan publico. E minister a finalisa bisando: “Beach ta pa tur hende, awe y pa e generacionnan binidero.”

E proceso lo ta interministerial: DIP lo sirbi como e cuerpo tecnico pa sostene e revision, respalda tanto pa Ministerio di Turismo como pa Ministerio di Infrastructura. Aruba Tourism Authority a contribui cu financiamento parcial pa e proceso, un señal cu e sector turistico mes ta reconoce e necesidad di un maneho mas sostenible di e beachnan. Den e siguiente simannan, gobierno lo inicia un dialogo cu stakeholdernan relevante — hotelero, operador di tour, grupo ambiental, y representantenan di comunidad — pa sigura cu e beach policy nobo refleha un perspectiva amplio.

Importancia di e anuncio: un paso necesario, pero pregunta ta keda

Pa hopi ciudadano, e anuncio ta un reconocimento laat di algo cu ya nan tabata biba. E frustracion cu añas di inconsistencia den aplicacion, falta di claridad tocante frontera, y operadornan cu tabata actua sin permiso adecuado a crea un cierto nivel di desconfiansa publico cu no lo desaparece inmediatamente cu un comunicado di prensa. E preguntanan real lo haya contesta — of no — durante e proceso di consulta cu stakeholdernan y, eventualmente, den e texto revisa di e propio RRIS.

Entre e preguntanan cu por anticipa di ciudadano y activista: Ki beach nobo lo ser agrega bao di proteccion? Kico exactamente lo cambia den e sistema di permisonan di precario? Con ta bay aplica e regulacionnan mas estricto en practica? Y con ta bay defini y marca fisicamente e fronteranan entre beach publico y area concesiona pa hotel, di forma cu no ta laga espacio pa confusion?

Pa Aruba, un isla cu su economia ta depende profundamente di turismo pero cu su identidad cultural ta mara intrinsicamente na acceso liber na lama y beach, e balans entre oportunidad economico y derechonan publico ta un di e debatenan mas fundamental di nos momento. E modernisacion di e RRIS por ta un stap importante den e direccion corecto — pero e exito di e reforma lo ser midifinalmente no door di e anuncio, sino door di e implementacion y aplicacion den practica diario, riba cada beach, pa cada ciudadano.