E deseo di husticia tabata mas grandi cu e cantidad di hende cu por a expresa nan preocupacion den e manifestacion contra abuso sexual di menor, lidera pa e ciudadano Yury Bracho.

Entrega manifiesto
E grupo di manifestante a haci nan prome parada dilanti di parlamento, unda no tabata presente ni e presidente tampoco e vice presidente di parlamento, y menos e lidernan di e fraccionnan.

Pero si dos parlamentario, Setty Christiaans-Yarzagaray (MEP) y Mervin Wyatt-Ras (AVP), kende a ricibi un manifiesto for di man di Bracho, kende a exigi un fecha cu nan lo por haya contesta riba nan manifiesto. Christiaans-Yarzagaray a expresa cu como miembro di parlamento tabata dificil p’e duna contesta. Pero unabes cu e tin contacto cu e presidente di e organo legislativo aki, e lo pone na haltura di e manifiesto.

E di dos parada di e manifestacion tabata dilanti di Bestuurskantoor, unda tres minister di e gobierno di coalicion a baha pa ricibi e manifiesto, Andin Bikker (POR), Otmar Oduber (POR) y Rudy Lampe (RED). Nan a expresa cu di parti di gobierno ta existi un compromiso, pero di parti di comunidad den su totalidad mester existi un responsabilidad conhunto pa proteha nos muchanan. “Ami como minister di husticia, di mi banda y den nomber di gobierno di Aruba, nos ta haci compromiso cu nos lo cambia tur e leynan cu mester wordo cambia…” Bikker a bisa.

Den nan manifiesto, e manifestantenan ta pidi entre otro, fortalece nos ley ya cu no mester tin mas mucha abusa. Nan ta consciente cu cambio di ley no kiermen cu e delito aki ta bay stop. Pero si e ta un instrumento legal pa protege e victima y castiga e abusado. Nan ta pidi den nan manifiesto pa aumenta e castigo contra pedofiel. Igualmente, nan ta pidi pa bin cu un website unda e pedofiel su potret ta aparece, pa tur hende sa kende nan ta. Tambe nan ta haya necesario pa prepara e empleadonan y fortalece e team cu ta traha den instancianan manera Voogdijraad y departamento di Asunto Social.

Compromiso
E tres mandatarionan a expresa nan solidaridad cu e preocupacion expresa durante e manifestacion, y te hasta nan a elogia e forma civilisa con e manifestantenan a vocifera nan preocupacion.

Bikker a compromete cu otro siman e lo duna contesta por escrito riba cada punto expresa den e manifiesto. El a declara cu dia 1 di juni e prome paso ta wordo tuma pa e meld code cu ta wordo introduci den instancia Sostene Mi, pa garantisa e anonimidad di e persona cu ta denuncia e tipo di delito aki. E ta bin compaña –segun e mandatario- cu shete articulo di nos codigo civil.

Tambe lo bin cu henter un plan, cu fecha concreto, pa bin cu cambio pa reforsa nos ley conhuntamente cu parlamento y impone un castigo minimo. Esaki pa evita cu un persona cu a haya culpabel ta haya un par di luna so como castigo, pues nan lo bin cambio riba articulo 31 y 37 di nos codigo penal pa no bin na remarca riba rebaho di pena. Tambe bin cu un registro publico cu por ta accesibel via Facebook, di personanan cu a wordo condena pa e tipo di delito aki. “Pa nos duna un señal cu un persona culpabel un acto asina a wordo condena, no por bay simplemente desapercibi den comunidad,” el a bisa. E propuesta aki a cay den bon tera cerca e manifestantenan, cu di biaha a cuminsa bati man.

Di su banda, Lampe a bisa cu lo duna charla den diferente MFA pa asina prepara nos comunidad pa ataca e problema aki. Tambe na scol publico, pero den otro scol lo duna charla pa nos muchanan sea alerta y duna nan tips riba cualkier hende cu tin mal intencion riba nan. Oduber a expresa su preocupacion tambe, y a bisa cu ‘gobierno tin full atencion pa e dolor aki.’

Tabata un manifestacion pacifico unda adultonan, hobennan y muchanan a participa aden, acompaña cu algun di e personahenan clasico di e mundo infantil di Disney, entre nan Mickey, Minnie, Pluto y Cinderella. Meymey di e inocencia di e personahenan aki, e manifestantenan tabata exhibi borchinan cu leyenda cu ta refleha un problema: “Traha ley pa proteha e mucha y no e pedofiel.”

Den e manifestacion aki a participa e lider sindical di FTA, Hubert Dirksz, kende a expresa cu durante nan congreso extraordinario, nan a expresa nan solidaridad cu e lucha cu Bracho ta lidera contra abuso sexual di mucha.