Despues di segundo debate electoral oranisa pa KvK: 86 porciento di encuestado ya a dicidi ken pa vota

Diahuebs anochi a tuma luga e segundo debate electoral organisa pa Camara di Comercio. Durante y despues di e debate, riba website y pagina di Facebook di KvK a realisa algun encuesta cu ta duna un bista di e sentimento entre e votadornan pa e proximo eleccion.

E prome tanda a consisti di tres pregunta, y un total di 3204 persona a participa den e encuesta.

Riba e prome pregunta, ‘Kico abo ta pensa tocante e derecho di privacidad di registro di votadornan?’, 3104 persona a contesta, y di esakinan, 67% a indica cu ‘Mi no ta di acuerdo pa partidonan politico ricibi e registro di votadornan’ mientras 33 porciento a indica cu si tabata di acuerdo.
Riba e segundo pregunta, ‘Bo ta di acuerdo pa contribui cu un ‘eigen risico’ pa cu seguro medico AZV?’, 3056 persona a responde, y di esakinan, 51 porciento no tabata di acuerdo mientras 49 porciento si.

E tercer pregunta, ‘Cua lider a resalta mas durante tanda 1?’ a wordo contesta pa 3031 persona, y 43 porciento di nan a indica cu lider di MEP, actual prome ministro demisionario, Evelyn Wever-Croes tabata esun cu mas a destaca. Na segundo lugar tabata lider di AVP, Mike Eman y na tercer lugar lider di MAS, Marisol Lopez-Tromp.

Igualmente e segundo tanda tambe a consisti di tres pregunta, y 3575 persona a participa den e encuesta.

Riba e prome pregunta, ‘Abo ta pensa cu implementacion di e landspakket por resulta bon pa Aruba?’, 3140 persona a duna un contesta, y di esakinan, 78 porciento a vota si, mientras 22 porciento a vota no.

3075 persona a contesta e segundo pregunta, ‘Bo ta di acuerdo cu e meta pa mehora nos situacion financiero ta esun principal den e landspakket?’. 80 porciento a contesta si, mi ta di acuerdo, y 20 porciento a contesta cu no tabata di acuerdo.

E tercer pregunta, ‘Cua lider a resalta mas den tanda 2?’ a ricibi 3075 contesta, y di esakinan, 42 porciento a scoge lider di partido MEP, 14 porciento a scoge lider di AVP, y na tercer luga, cu 10 porciento di voto tabata lidernan di Accion 21 (Miguel Mansur) y RAIZ (Ursell Arends).

E tercer tanda tambe tabatin 3 pregunta y a ricibi contesta di 3434 encuestado.
Riba e prome pregunta, ‘Bo ta di acuerdo pa idioma Hulandes bira un idioma stranhero (vreemde taal)?’, 2979 persona a vota, y di esakinan, 44 porciento si tabata di acuerdo mientras 54 porciento no tabata di acuerdo.

Riba e segundo pregunta, ‘Bo ta di acuerdo cu suspension di un persona riba lista politico, den caso cu e ta sospechoso?’, 2961 persona a contesta, y di esakinan, 86 porciento a indica cu ta di acuerdo cu e ponencia, mientras 14 porciento a contesta cu no.
E tercer pregunta, ‘Cua lider a resalta mas den tanda 3?’, a ricibi 2935 contesta. Di esakinan, 51 porciento a scoge lider di MEP, mientras 15 porciento a scoge lider di AVP. Na tercer luga, cu 9 porciento di voto cada un, tabata lider di MAS y lider di RAIZ.

E ultimo preguntanan a ser haci na final di e debate. E cantidad di votadornan cu a contesta e tanda final tabata 3408. Riba e pregunta ‘Ken segun bo a gana e debate?’, 3047 persona a respone, y alrededor di mita (54%) a scoge lider di partido MEP como ganador di e debate. Riba e segundo pregunta, ‘Awor si bo sa pa cua partido bo ta bay vota?’, 2892 persona a contesta, y 86 porciento di esakinan a responde cu si.