Ayera durante dia, ciudadanonan di Aruba a tuma nota cu cantante Colombiano famoso, Carlos Vives, tabata na diferente sitio di Aruba grabando contenido. Riba su rednan social, e artista a comparti un potret confirmando cu tabata grabando “un sorpresa” na Aruba.
“Postalnan di Aruba y algun sorpresa cu nos ta grabando pa boso,” Vives a bisa den su post riba Facebook.
Vives ta preparando pa e lansamento di su album nobo, El Ultimo Disco. E tabata na Aruba pa participa den Vibra Latina Festival, dia 28 di februari. Durante su presentacion, el a anima esnan presente pa participa den un video cu e ta grabando na nos isla, cu lo ta parti di e album nobo, segun corant El Tiempo a publica. Cu e imagennan comparti riba rednan social, expectativa pa e video aki ta halto, ya cu lo resalta e beyesa natural y paisahenan unico di nos isla.
