Artista Australiano basa na Alemania, Joseph Marr, ta famoso pa su expresion unico di arte. Su esculturanan ta impactante y inusual, ya cu nan ta traha di un material cu ta tanto comun como stima: sucu. Despues di exhibicionnan exitoso rond mundo, incluyendo na Hulanda, e ta cla pa trece su arte pa Aruba.
Desde 2009, Marr ta traha cu sucu pa crea escultura cu ta parce glas. Su trabaonan mas notable ta inclui un curason anatomico, di 800kg, titula Open Heart. E ta usa 3D scanning y 3D printing pa crea molde den cual e ta pone e sucu pa crea su arte.
Su esculturanan ta trata temanan di deseo humano y consumerismo, usando sucu pa simbolisa tentacion.
Algo cu a haci su esculturanan famoso ta e hecho cu hopi biaha durante exhibicion, hende ta lembe e arte.
Aunke e no a revela ainda ki tema su exhibicion na Aruba lo por tin, el a bisa cu “lo ta intersante” pa inclui un figura politico.
E anuncio a hala hopi atencion den circulonan di arte, cu ta anticipa otro obra bunita – y delicioso – di Marr.
