Minister di Finanzas, Asunto Economico y Sector Primario, mr. Geoffrey Wever (FUTURO) ta anuncia cu oficialmente e destaho publico pa e renobacion di e pier na Rodger’s Beach den Colony ta habri. Esaki ta bira e di dos pier pa nos piscadonan cu lo keda renoba bao di e maneho di Minister Wever.
Fin di februari a tuma e decision pa aproba e destaho publico di e pier di piscado na Rodger’s Beach y 16 di maart e destaho publico ta inicia y e tur documento lo ta disponibel na oficina di D.O.W y online riba https://www.gobierno.aw/nl/aanbestedingen.
“Un di e enfokenan di mi maneho como Minister di Finanzas, Asunto Economico y Sector Primario ta pa drecha varios pier di piscadornan rond di nos isla y aporta na e Sector Primario. E pier na Rodger’s Beach ta uno sumamente importante pa e comunidad di San Nicolas, e Sector Primario y nos piscadonan di pariba di brug. Cu stapnan concreto, nos ta keda realisa nos compromiso cu e pueblo di Aruba pa tuma pasonan real pa aporta na nos sector primario y nos economia”, segun Minister Wever a bisa den un comunicado di prensa.
Pa varios aña caba, e pier na Rodger’s Beach ta den un estado deplorabel. Scuchando e sector y mirando e importancia di e pier pa nos piscadonan, Gabinete AVP-FUTURO ta tuma pasonan real pa drecha e piernan y contribui na e economia di Aruba y e comunidad di piscado. E piernan tin importancia no solamente pa e piscadonan, pero tambe pa e comunidad di San Nicolas.
E pier di Rodger’s Beach ta bira e di dos pier pa wordo renoba, cual ta forma parti di e plan di Minister Wever pa aporta na Sector Primario y pa drecha e piernan rond di nos isla. E prome pier cu a renoba tabata e pier di ex-Brisas del Mar na Savaneta.
