Dia 6 di januari 2025, Aruba a despedi di Aruba su prome Minister President Sr. Henny Eman. Riba e mesun fecha, pero un aña despues, Gabinete AVP-Futuro, riba peticion di Stichting Henny Eman, a honra un visionario grandi den politica di Aruba nombrando un di e careteranan principal di Aruba na su nomber.

Parti di e caminda conoci pa decada como L.G. Smith Boulevard cu ta inicia na e rotonde di Mahuma te cu e rotonde di Sun Plaza, ta bira oficialmente Henny Eman Boulevard. E caya largo aki ta pasa dilanti di Aeropuerto Internacional Reina Beatrix, dilanti di Parlamento di Aruba y e oficina principal di Gobierno di Aruba y conecta cu e area di turistico principal cu tabata parti di e vision di Henny Eman.

Presidente di Stichting Henny Eman, Sr. Tico Croes a hiba palabra diamars atardi tambe durante e desvelo di e borchi di Henny Eman Boulevard. Sr. Croes a comparti cu tur presente cu no por lubida con Henny Eman a enfrenta varios reto den nos turismo. “Henny a convence pueblo, pa den tres luna , pueblo haci un esfuerso di bay un banco; entrega e Florin Antiano y busca un florin Arubiano” Sr. Croes, cu tambe a fungi como minister den Gabinete Eman II y Eman III a cataloga esaki como un muestra con un lider ora e ta visionario, ora e por convece su comunidad cu e por cambia e motivacion individual pa motivacion y accion colectivo.

James Hepple, un experto den turismo na Aruba a repasa varios cifranan di nos turismo durante e ultimo decadanan “Lidernan manera Henny Eman no ta maneha djis economia, pero nan ta re-imagina e intensidad di nos isla.” Sr. Hepple a remarca pa nos sigui enfoca riba turismo y tuma tur accion necesario pa garantisa nos turismo sigui florece.

Minister-president mr. Mike Eman a comparti varios anecdota durante e bahada di solo despues cu e devela e borchi di Henny Eman Boulevard. “Awe si nos por disfruta di nos turismo ta Danki na Henny Eman su vision” Henny Eman como prome minister a declara 30% di Aruba como parke nacional, asina visionero Henny Eman tabata no solamente den e aspecto economico pero tambe den e identidad di kico ta mara nos n’e suelanan aki.

Fraccion di AVP den Parlamento di Aruba a participa diamars atardi na e ceremonia oficial di desvelo di e dedicacion di Henny Eman Boulevard, ubica na inicio di e caminda principal aki, cerca di e rotonde banda di aeropuerto. Tabata un honor grandi pa por ta testigo di e momento historico aki, unda un di e lidernan mas renombra di e partido a keda reconoci postumamente cu un distincion di e caliber aki.

E dedicacion di un caminda asina importante den infrastructura di Aruba ta un señal duradero di respet, gratitud y reconocimento pa un persona cu a marca historia di nos pais, segun un comunicado di Fraccion AVP. E acto solemne tabata asisti pa un gran grupo di famia, colega politico, amigo, miembro distingui di sociedad, representante di prensa y dignatarionan local.

Fraccion AVP ta kere cu ta di gran relevancia pa Aruba sigui reconoce nos gran estadistanan, y particularmente den e caso di Henny Eman. Como e prome Prome Minister despues di Status Aparte, el a hiba un responsabilidad inmenso riba su schouder y a demostra liderato den un periodo dificil pa nos economia, specialmente despues di e cierre di refineria.

Banda di esaki, Henny Eman ta reconoci como un pionero den introduccion di e plan general di salud (AZV) y financiamento di estudio den exterior (studielening), entre otro logro importante cu te dia di awe ta forma parti di e progreso di nos pais y e bienestar di nos ciudadanonan.

Fraccion AVP ta destaca cu e legado di Henny Eman no ta limita na pasado, sino cu ta sigui bibo den e base di e sistema social y economico di Aruba, y den e balornan di servicio publico, vision y compromiso cu el a representa.

Na ocasion special aki, Fraccion AVP ta felicita y comparti e orguyo di e momento y ta reafirma nos compromiso pa honra e legado di nos lider historico door di sigui traha na beneficio di pueblo di Aruba.