Siman cu a pasa, durante tratamento di presupuesto, nos a bin topa cu algun ehemplo clave con leu e deterioro den maneho gubernamental ta, sin cu nos ta tende o lesa di ningun periodista o politico un comentario. E prome ehemplo cu a bin dilanti ta e bista cu ministro encarga cu Infrastructura a duna di e fechorianan di e colaboradonan di e anterior ministro encarga cu e cartera aki, cu tabatin acceso di dia y anochi, y weekend, na e despacho di departamento di Infrastructura y Planificacion, unda na tabata haci liber uso di e facilidadnan, specificamente di uza e computernan y papel membreta di e departamento, pa traha cierto conseho cu e ministro tabata desea, haciendo esey aparenta como documento autentico di e departamento. Nos no a tende ni sikiera un comentario di un asombro, o miho ainda, un repudio pa e manera di traha aki. Di unda e deterioro den manera di opera aki a sali?
Un binti aña pasa, algo asina lo tabata imposibel y inaceptabel. Ningun director ‘in his right mind’ ta duna colaborado di ministro ni yabi, ni otro forma di acceso. Den e añanan ey a yega di sucede incidente, unda cu cierto colaborado tabata pretende cu e ta drenta e departamento dia y ora cu e ta desea, y cu e director no tin nada di bis’e. Te cu e director a bay papia cu e ministro, y dun’e di comprende cu si e ministro kier pa e como director ta responsabel pa tur cos cu ta pasa den e departamento, tambe fuera di ora di oficina, e no por permiti ningun hende di cana drenta ora nan kier, djis pasobra nan ta traha na despacho di ministro. Den e caso aki e ministro a bay full di acuerdo y a prohibi su coordinador pa pone un pia den e departamento, si no ta a base di algo cu a palabra entre e ministro y e director. E coordinador no a gusta e cuenta y poco tempo despues a kita di trabao. “No love lost there.” Mester bisa acerca cu algun tempo prome cu e incidente, tabatin empleado cu tabatin copia ilegal di e entrada, y tabata abusa di e facilidadnan di copia fuera di ora di oficina. E director mester a tuma medida pa sigura cu ningun alma tabatin acceso na e lugar, manera mester ta pasobra ta e ta responsabel pa integridad di tur cos, documento, sistema digital, etc. Anto awor nos a yega na e nivel aki di ta bandido, unda tur regla y criterio di fatsoen den gobernacion a bay perdi?
Nos ta sumamente contento cu e actual ministro a trece e ehemplo dilanti, y nos ta spera cu no pa su ministerio so, pero pa tur e otronan, esaki ta un wake up call cu tin cierto cosnan di drecha den e manera di anda entre mandatario y e aparato gubernamental, cu mester traha lealmente cu cualkier mandatario, independiente di color politico, pero tin cu tuma nan tarea na serio como cuidado di e administracion publico, poni den nan man. Ta straño tambe pa no ta tende nunca mas di directornan cu ta lanta para y bisa un ministro cu e no ta acepta cierto abuso; ta parce cu tur hende ta biba den un temor eterno pa e nivel ministerial. Asina nunca un aparato gubernamental por funciona.
Pero, e problemanan aki no a stop di existi cu e gabinete anterior. Continuamente nos ta tende observacion cu hende ta kere cu un mandatario ta todopoderoso y cu tur hende mester tembla y haci exactamente loke e mandatario bisa, sino… Den parlamento siman pasa tambe, nos ta tende di e ministro encarga cu asunto social y labor, cu e tin su staff completo den e asunto di E problema social, pa cual gobierno a pone un suma grandi disponibel pa ataca e asunto aki. Esey no ta ningun problema, pero si cu e base di operaciona muda pa su despacho, unda su colaboradonan ta subi den auto y ta bay atende keho, etc. Segun e mes ta conta, talbes den su santo inocencia, e directora di e departamento concerni a bisa e mandatario cu e no sa mas na unda e departamento ta situa, cerca dje o na e despacho di e ministro. Contrario na otro hende cu kizas ta haya esey comico, nos tin gran preocupacion unda e manera di traha aki ta bay termina. Ta pesey e cantidad di colaborado mester a bay di 13 pa 27 persona, incluyendo tur e rumannan? No ta e mesun partido aki a yega di publica cu nan ta contra ‘nepotismo’? Y no ta e mesun ministro aki algun tempo pasa kier a cuminsa un loket pa keho na su despacho, na luga di pone e servicio concerni funciona drechi?
Gobernacion adecua tin hopi faceta, y no tur anomalia di pasado ta disparce por arte de magia. Nos ta realistico suficiente pa sa cu esey ta asina. Pero si e parti consciente di prensa no ta cuminsa indica e cosnan aki na tempo, nos no ta yuda drecha nada nunca. Nos ta spera ansiosamente pa e Integriteitskamer bira un realidad.
