Awe marduga, den careda di 3.30am a sosode un accident entre un scooter y un auto na altura di La Granja Savaneta, cu a cobra bida di un hoben. Segun informacion no oficial lo ta trata di e hoben Edmard Lampe di 23 aña, yiu di un personahe publico cu ta labora na radio.
Segun por a constata te na e momento aki, e hoben tabata biniendo abou di pariba (San Nicolas) y lo a bay den e banda contrario, dal den un Mitsubishi cu lo tabata bayendo ariba riba un velocidad halto. Despues di esaki e lo a bay dal den un otro auto marca Suzuki cu tambe tabata bayendo direccion abou. Testigonan a conta cu un banda di brasa di e hoben lo a ranca di su curpa y a bay para algun meter leu. Ambulance a presenta y a hiba e hoben hospital pero debi na slanan fuerte, no por a haci nada mas pe. Pa 4.39am dokter a constata morto di e hoben.
A aresta ambos chauffeur di e dos autonan debi cu ora a pone nan supla, nan tabata tin alcohol den nan curpa; cuanto nan a supla no ta conoci. Te cu awe mainta ainda polis tabata tin e sitio di accident cera pa investigacion, unda lo mester bay scucha testigonan y tambe wak camara di seguridad pa saca afo ta kico lo a pasa.
Cu e morto di e hoben Lampe, ta bira e di 7 morto den trafico. Potret ta cortesia di e website www.arubanative.com.
