Diamars mainta, Minister di Husticia, Integracion, Transporte Publico y Energia, mr. drs. Arthur Dowers (AVP) a haci un bishita na Centro Ortopedagogico Dakota den contexto di celebracion di Dia di Himno y Bandera.

Durante e bishita, e minister a tuma e oportunidad pa inspecciona e trabaonan di renobacion cu a cuminsa algun siman pasa, y a expresa satisfaccion cu e progreso visibel, cu e cushinanan awor completamente cla.

Den comienso di su tercer termino como minister di Husticia, Dowers a haci su bishita di introduccion na e facilidad di OC Dakota, unda e a constata un situacion serio y inaceptabel. Segun un comunicado di gobierno, e minister anterior a laga e centro den un estado deplorabel, cu espacionan di uso diario pa e hobennan yen di schimmel, dak cu ta lek ora di yobida, y presencia di comehein cu a causa daño significativo na e infrastructura, incluyendo cabinetnan di cushina. Segun minister Dowers, esaki no ta un situacion digno pa ningun persona, y sigur no pa un facilidad bao responsabilidad di gobierno.

Confronta cu e situacion aki, minister Dowers a tuma paso inmediato hunto cu directiva di OC pa crea un plan di accion concreto pa drecha e situacion. Awe, e resultado ta visibel: cada blok ta conta cu un cushina completamente nobo, a trata e murayanan pa preveni humedad, y tin control temporal riba e situacion di comehein, mientras cu ta sigui traha riba solucionnan structural.

Actualmente, OC Dakota ta atende 15 hoben cu ta sigui un programa di guia y coreccion. Cu cada paso di mehoracion, dignidad ta bolbe poco poco den e facilidad, tanto pa e hobennan como pa e profesionalnan cu ta traha den circunstancianan dificil.

E siguiente fase di e proyecto ta enfoca riba reparacion di e daknan cu ta lek den varios blok y elimina e problema di comehein sistematicamente. Despues, lo sigui cu mehoracion di e espacionan di descanso y otro espacionan funcional den e facilidad.

Minister Dowers a expresa su gratitud profundo na e empleadonan di Centro Ortopedagogico Dakota, reconociendo nan compromiso, determinacion y profesionalismo, a pesar di e circunstancianan dificil den cual nan a sigui cumpli cu nan tarea di gran importancia social.