Ayera mainta a tuma lugar un accidente di trafico riba caminda Grapefield, cu lamentablemente a resulta den un fatalidad. Cu esaki, Aruba a conoce su di tres morto den trafico.
Diaranson mainta pa 8:30, central di polis ta wordo notifica via di Alarm Central cu un accidente mester a tuma lugar patras di KIA, riba e caminda pa Grapefield. Central di Polis a despacha patruya , ambulance y tambe departamento di trafico.
Na yegada di e patruya ta bin topa cu un pick up Nissan color shinishi cu tres hende homber envolvi. Un di nan tabata mustra basta grave, na unda cu na yegada di ambulance a dun’e asistencia medico; pero lamentablemente no por a haci nada mas p’e.
Na e sitio di sucedido a presenta hefe di trafico, altocomisario Arnhem y Slachtofferhulp.
Departamento di Trafico ta haciendo su investigacion pa sa kico exactamente a pasa.
Lamentablemente e accidente ta cobra un victima y ta bira e di tres morto den trafico. Ta trata aki di e homber Pedro Manuel Ochoa Gutierrez, naci na Colombia dia 29 mei 2001 (24 aña).
E dos otro victima den e pick-up a wordo transporta pa ambulance, mirando cu nan tabata levemente herida.
Cuerpo Policial y Bon Dia Aruba ta manda palabra di profundo condolencia na famia di e fayecido.
