Dia 24 di december y 1 di januari lo ta yen di Bonanza cu Edjean Semeleer

Den un entrevista cu Bon Dia Aruba a haci cu Edjean Semeleer, el a bisa cu e cantica Bonanza ta existi for di aña 2020 y ta un composicion di Felix “Chucho” Hoek, cu tambe a compone e cantica ‘For di un distancia’. E dos cantica aki tabata plania pa sali aña pasa, pero un di nan no por a sigui, manera el a sigura.

Pa e motibo ey, nan a tuma e decision di graba e cantica Bonanza e aña aki caminda cu Semeleer a conta cu ademas di esey, nan tabata planeando graba un concierto di Pasco y un otro concierto pa Aña Nobo pa nan por wordo estrena na TV y riba rednan social, incluyendo e grabacion di Bonanza den tur e trabou aki cu na final nan a dicidi di uni tur y yama nan Bonanza.

El a afirma cu ta Chucho esun cu a scoge e palabra aki pa motibo cu e no ta wordo usa hopi den papiamento y ta e tipo di mensahe cu kier trece dilanti cu “e ser humano durante su historia a pasa den hopi desafio pero di un manera of otro ta surpasa y a conoce bonanza tambe, e idea ta cu via e proyecto y e cancion, nos ta purba pa bonanza manifesta su mes”, Semeleer a comenta.

E dos concierto cu ta di Pasco y Aña Nobo ta totalmente diferente un di otro manera el a menciona, nan a wordo graba den su cas cu su orkesta cu e idea pa haci un produccion audiovisual pa e por yega na mas hende cu ta posibel riba dianan 24 di december y 1 di januari.

Semeleer a expresa cu tur aña e ta presenta su proyectonan di Fin di Aña y e miho manera pa e midi exito di e proyecto ta e reaccion di e publico, reaccion di alegria, inspiracion, gradicimento, “cu nos ta pensa riba expone nos musica na un publico grandi y esey ta eigenlijk e inspiracion di mas grandi pa por sigui haci e proyectonan aki, vooral di Fin di Aña cu ta un temporada cu den comunidad a bira algo extra special y bo kier aporta na eleva e celebracion a traves di musica, cu bo ta alegra curason, bo ta inspira, bo ta motiva hende y specialmente den temporada aki cu hopi hende ta desafiante, nos como artista y musico ta convenci cu a traves di musica nos por alivia e pena di hopi hende, un tiki pa un rato”, el a señala.

E proceso creativo pa e proyecto aki a bay cu un tiki di desafio di loke tin normalmente segun loke el a conta, pa motibo cu nan a dedica hopi tempo den e concierto di Jossy Brokke “T’ami ta Jossy” cu tabata un proyecto extra cu a test nan creatividad y nan energia un tiki mas “pero nos ta contento y agradecido cu esaki tabata un exito grandi y esey a pone tambe cu bo mester dedica mas energia y tempo pa pensa con bo ta bay haci cu e proyecto di Fin di Aña, cu ta diferente na esunnan cu a presenta tur añanan atras” Semeleer a declara.

Cu mas innovacion, contenido, creatividad, cu e mes a sigura cu nan a logra esey debi cu e produccion vooral di Pasco di e aña aki ta bay ta un tiki diferente den nivel di actuacion, lo tin un pelicula chikito prome cu e concierto mes cuminsa lo cual a desafia su hermentnan di actuacion, cu ta haci e produccion mas interesante pa e televidente.

Na e momentonan aki nan ta den proceso di post produccion unda cu el a comenta cu mañan 23 di december nan lo por ta cla cu e produccion pa Pasco.

Semeleer ta describi su musica como un deseo di semper purba pone esun cu ta ricibi e musica pa sinti algo, e por ta nostalgia, alegria, tristesa, realisacion di algo cu kisas e persona no tabata pensa prome, pero e ta describie como “un intencion pa laga e otro ser humano cu ta scucha e musica, sinti algo”, el a afirma.

Asina mes, el a conta cu si den su bida el a haya e oportunidad di graba of habri un concierto cu un di su artistanan faborito e ta scoge e cantante Canades Michael Buble cu tambe ta hopi popular cu su special di Pasco y Aña Nobo, aunke e tin varios artista cu e ta admira na nivel local y internacional, “e iniciativa di comparti scenario ta algo cu semper ta presente cerca mi, por ehemplo, den concierto di Pasco di e aña aki mi ta compartiendo cu un duo cu no ta conoci na Aruba y cu mi a conoce nan riba Tik Tok”.

Semeleer a yega di dedica varios cantica na personanan special den su bida segun el a confirma, “mi talento pa skirbi ma want’e semper limita, nunca mi a purba pa desaroya e habilidad pa skirbi y pa hopi biaha un of dos compositor di custumber ta traha mi cancionnan pa mi, unda mi splica nan kico mi ta deseonan den e cancion, pero varios cancion ma yega di dedica na hende special den mi bida, vooral cancionnan di amor”, Semeleer a manifesta.

Pa finalisa, el a duna algun palabranan di gradicimento na esunnan cu semper ta duna su apoyo na dje pa por presenta nan proyectonan y cu “mi deseo ta pa e ultimo dianan di 2021 por ta yena di Bonanza y cu 2022 ohala e por ta yen di salud, hopi abundancia y bendicion, Bonanza ta tur loke bo kier pa ta bon den bo bida”.