Traficacion di hende ta sigui ta un menasa mundial impulsa pa crimen organisa. Mas y mas victima ta ser trafica tur aña, riba distancianan mas grandi, cu violencia mas grandi, pa periodonan di tempo mas largo y pa ganashi mas grandi.

Segun estadistica di Nacionnan Uni for di 2020 pa 2023, tabatin mas cu 200 mil victima detecta globalmente y ta kere cu e cantidad real di casonan no raporta ta significantemente mas halto.

Rednan criminal organisa ta impulsa e victimisacion y explotacion aki, usando fluhonan di migracion, cadena di suministro global, buraconan legal y economico y plataformanan digital pa facilita trafico transfronteriso riba un escala masivo. Nan ta haya ganashi di trabou forsa, explotacion sexual y coersion den actividadnan criminal, manera estafa online y contrabanda di droga.

A pesar di algun progreso, e contesta di husticia penal ta cay cortico den atende cu e crimen aki cu ta desaroyando rapidamente. Pa caba cu traficacion di hende, autoridadnan mester aplica leynan estricto, conduci investigacionnan proactivo, fortalece cooperacion transfronteriso, dirigi riba financiamento criminal, y haci uso di tecnologia pa identifica y desmantela rednan di traficacion.

Traficacion di hende ta un delito serio y un violacion grave di derechonan humano. Tur aña, miles di homber, muher y mucha ta cay den man di traficante, den nan propio pais y den exterior. Casi tur pais na mundo ta ser afecta pa traficacion, sea como pais di origen, transito of destinacion pa victimanan. UNODC, como wardado di e Convencion di Nacionnan Uni contra Crimen Organisa Transnacional (UNTOC) y e Protocolnan di esaki, ta yuda Estadonan den nan esfuersonan pa implementa e Protocol pa Preveni, Suprimi y Castiga Traficacion di Hende.

E Protocol pa Preveni, Suprimi y Castiga Traficacion di Hende ta defini Traficacion di Hende como e reclutamento, transporte, transferencia, of ricibi persona, pa medio di e menasa of uso di forsa of otro formanan di coercion, secuestro, fraude, engaño, di abuso di poder of di un posicion di vulnerabilidad of dunamento di pago of beneficionan pa logra e consentimento di un persona cu tin control riba un otro persona, cu e proposito di explotacion. Explotacion ta inclui, manera minimo, e explotacion di prostitucion di otronan of otro formanan di explotacion sexual, trabou of servicionan forsa, sclavitud of practicanan similar na sclavitud, sirbishi of kitamento di organonan.

Aruba

Na Aruba, segun e Oficina Central di Estadistica a indica den nan ‘Statistical Overview of Aruba 2023’, traficacion di hende ta entre e tres crimennan mas cometi. Den 2023 e crimen di traficacion di hende a reduci cu 25%. Segun estadistica ta sigui informa di 269 prisonero cu tabata cera, 15 di nan tabata en prison pa comete crimen relaciona cu traficacion di hende.

Den luna di juni Unit Mensenhandel en Mensensmokkel (UMM) tabata investigando un caso serio di sospecho pa traficacion di hende. Den e caso aki a haci un entrada hudicial na un parcela na Jucuri y a detene tres persona, segun Cuerpo Policial a informa.

Ta trata di dos hende homber di inicial D.C.T. y J.J.R.C., e hende muher inicial M.L.J.A.J.G. Tur tres ta naci na Aruba. Nan ta wordo sospecha di recluta hobennan di mas o menos 20 aña, door di manipula nan, aisla nan di nan famia y laga e victimanan depende di nan so.

E sospecho ta cu e victimanan tabata wordo obliga pa entrega nan salario y poni bao presion pa traha sin pago.

E team di UMM a haci un investigacion intensivo durante varios siman na unda a haya indicacion di explotacion di hende y mobilisa mesora pa pone man riba e presunto sospechosonan.

Den mesun luna tambe, den otro caso relaciona cu traficacion di hende, hues di Corte Comun a condena N.M.M.U. di nacionalidad Colombiano, di 37 aña di edad y biba na Corsou, na 2 aña y mei di prison (30 luna) pa traficacion y contrabanda di hende . Aki ta trata di cinco victima Colombiano.

E caso aki tabata involucra un red criminal entre Colombia, Corsou y Aruba, segun un comunicado di Cuerpo Policial. Muhenan Colombiano a ser recluta y poni bou presion pa traha den prostitucion na Aruba y Corsou. E contrabanda a tuma luga via aeropuerto di Aruba.

E investigacion a cuminsa na luna di Mei 2024 pa e team dedica di Unit Mensenhandel en Mensensmokkel (UMM) di Cuerpo Policial Aruba y a ser manda pa Ministerio Publico na luna di November 2024. Adicionalmente, e caso a ser reforsa cu inteligencia dentro di e IICP-war room, caminda e red a ser identifica y amplia.

Un di e retonan mas grandi cu Aruba ta enfrenta ta e crisis migratorio, y un aspecto hopi tristo y peligroso di e crisis migratorio ta e fenomeno di traficacion y contrabanda di hende. Traficacion di Hende, no solamente mester keda reconoci como un delito of crimen, pero e ta un violacion profundo contra derecho humano. Cooperacion internacional, esfuerso di cuerpo policial y legislacion fuerte ta importante combati e crimen global aki.

Nacionnan Uni ta encurasha particularmente instancianan di aplicacion di ley, incluyendo departamentonan di polis, seguridad di frontera, instancianan internacional, y forsanan di tarea specialisa, pa tuma un rol activo door di usa plataformanan online y conduci alcance den persona na areanan di trafico halto manera centronan di transporte pa asina alcansa y conscientisa publico y promove canalnan di melding pa casonan sospechoso di traficacion.