Mientras mundo ta observa Dia Internacional di Derechonan Humano riba 10 di december, Aruba ta sigui nabega un set compleho di asunto di derechonan humano forma pa migracion regional y expectativanan internacional cu ta desaroya. Conoci manera e “One Happy Island”, Aruba tambe ta maneha realidadnan cu ta bin cu hospedahe di un poblacion significativo di migrantenan indocumenta, primordialmente for di Venezuela, y atende cu responsabilidadnan continuo relaciona cu cumpli cu normanan internacional den e area di prevencion y proteccion di traficacion di hende.

E narativa di derechonan humano di Aruba pa hopi tempo a ser forma pa migracion. Amnesty International (AI) su rapport di 2024 tocante e tratamento di refugiado y migrantenan Venezolano na Aruba ta enfatisa con profundamente desplasamento a cambia e isla. Cu un calculacion halto di Venezolano indocumenta cu ta biba na Aruba — mas o menos 159 persona desplasa pa cada 1.000 habitante — Aruba ta clasifica como e anfitrion mas halto di migrantenan Venezolano per capita na mundo. Hopi a huy di represion politico, hamber y collapse economico, solamente pa enfrenta un otro tipo di incertidumbre na yegada.

Un di e debilidadnan structural mas significante, segun e rapport AI, ta e ausencia di un ley dedica pa asilo. Hende cu ta busca proteccion mester nabega proceduranan general di inmigracion cu nunca no a ser diseña pa casonan humanitario. Traha un cita pa registra un peticion di asilo por encera warda siman of lunanan, lagando individuonan indocumenta y expone na aresto mientras nan ta warda nan turno. Algun solicitante entrevista pa AI durante periodo di nan investigacion a informa di a warda dos aña of mas pa un decision. Aunke reglamentonan di Aruba tecnicamente ta permiti solicitantenan di asilo pidi un permiso temporal di trabao, AI a indica di no a haya ningun prueba cu e tipo di permisonan aki ta ser otorga den practica, reforsando e vulnerabilidad economico di un poblacion cu ya caba ta biba den e margennan.

E vulnerabilidad aki ta extende directamente den e sistema di detencion y deportacion di e isla. Migrantenan indocumenta deteni na e isla of intercepta riba lama ta ser hiba na e instalacion di Guarda Nos Costa (GNC), cu AI a vigila ripitidamente. A pesar di mehoracionnan, manera renobacion y camanan nobo, e organisacion a sigui nota condicionnan preocupante: tempo limita pafo, mal ventilacion, falta di actividadnan y acusacionnan di maltrato verbal of fisico. Mas preocupante ainda ta e detencion di menornan di edad. Aunke e politica di Aruba ta bisa cu no mester tene muchanan den detencion di inmigracion, AI a documenta tres caso di menornan Venezolano cu tabata deteni na GNC for di 2020, incluyendo un mucha sin compania.

Tambe tin preocupacionnan documenta tocante e principio di “no-refoulement” — e obligacion internacional pa no debolbe individuonan na paisnan caminda nan ta enfrenta daño serio. AI a cita varios caso den cual Venezolanonan a ser deporta mientras cu ainda tabata apela nan ordo di retiro. Den un caso alarmante, un homber Venezolano a ser deporta a pesar di un peticion di e Comite di Derechonan Humano di Nacionnan Uni pa para su retiro. Despues el a informa di a ser deteni y tortura na su regreso pa Venezuela prome cu el a huy un biaha mas.

Mientras cu e resultadonan di AI ta enfoca riba asilo, detencion y e tratamento di migrantenan, e rapport recien di Departamento di Estado Mericano, Trafficking in Persons Report (TIP), a subraya un otro dimension urgente di e paisahe di derechonan humano di Aruba: traficacion di hende. Di acuerdo cu e rapport Aruba ta sigui cay cortico pa cumpli completamente cu e normanan minimo pa elimina traficacion di hende, aunke e ta tumando pasonan den e bon direccion. E rapport, cu a ser cubri ampliamente pa Bon Dia Aruba, ta remarca cu Aruba ta keda un hurisdiccion di Tier 2. E ranking aki ta reconoce esfuersonan significante di autoridadnan pero ta enfatisa cu faltanan significante ta keda.

Traficacion riba Aruba hopi biaha ta afecta e mesun poblacionnan identifica como vulnerabel den e rapport di migracion di Amnesty International (AI). Hopi victima ta migrantenan indocumenta cu ta traha den sectornan informal of di visibilidad abao manera trabao domestico, construccion, benta of prostitucion. Di acuerdo cu e rapport di TIP di 2025, traficantenan ta explota migrantenan di Venezuela, Colombia, Republica Dominicana, Peru y otro paisnan, probechando di nan miedo di deportacion, falta di status legal y dependencia di dunadornan di trabao cu por retene pago, documentonan of libertad pa move.

Den 2024 Gobierno di Aruba a identifica cinco posibel victima di traficacion, incluyendo un caso di traficacion sexual y cuater di trabao forsa. Tur tabata migrante for di Colombia of Peru. Solamente dos di e cinco aki a ser reconoci formalmente como victimanan di traficacion y a haya permiso di estadia temporal, loke ta sugeri cu e proceso pa identifica y asisti victimanan ta keda inconsistente y fragil.

Un otro debilidad critico identifica pa e rapport di TIP ta regarda servicio pa victima. E refugio specialisa destina pa victimanan di traficacion, cu tin añanan plania, ta keda sin operacion. Victimanan en bes di esey ta depende di palabracionnan temporal cu organisacionnan no gubernamental of actornan priva. E ausencia di un refugio confiabel, maneha pa gobierno, ta mina e habilidad di victimanan pa scapa di explotacion na un manera sigur of coopera den investigacionnan.

Tambe e rapport di TIP ta constata cu coordinacion entre instancianan Arubiano ta keda insuficiente y cu funcionarionan tin biaha ta bruha traficacion cu contrabanda di migrante, un eror cu consecuencianan serio tanto pa ehecucion como pa proteccion di victima. Mientras tanto, e plan di accion nacional contra traficacion di hende a keda sin aproba te na fin di e periodo di rapport.

Tuma hunto, e resultadonan aki di tanto Amnesty International como e Departamentp di Estado Mericano ta describi un pais cu ta luchando cu vulnerabilidadnan cu ta overlap. E falta di trayectonan legal pa solicitantenan di asilo, e riesgonan di detencion y deportacion, y miedo di bin den contacto cu autoridadnan tur ta crea un clima den cual explotacion por prospera. Hopi migrante ta traha informalmente pasobra nan no tin alternativa legal, lagando nan incapas pa raporta abuso, negocia salario, of cana bay for di dunadornan di trabao coercivo. Traficantenan ta beneficia di hustamente e condicionnan aki.

Aruba a haci progreso riba cierto terenonan. Muchanan, sin importa nan status, ta permiti acceso na scol y vacunacion. Organisacionnan no gubernamental, iglesia y organisacionnan internacional manera IOM y UNHCR ta sigui expande nan servicionan pa brinda ayudo na migrantenan. Gobierno a tuma pasonan pa mehora condicionnan fisico na centronan di detencion y a realisa investigacionnan nobo di traficacion.

Toch Dia Internacional di Derechonan Humano ta invita un reflexion mas amplio riba si progreso ta sigui cu necesidad. Un sistema di asilo cu ta funciona, miho garantianan contra detencion arbitrario, proteccion mas fuerte pa victimanan di traficacion y un strategia nacional coordina no ta simplemente reformanan administrativo — nan ta fundamental pa garantisa dignidad, seguridad y husticia pa tur hende cu ta residencia na Aruba.

Pa e isla, e reto dilanti ta cla. Proteha derechonan humano no por ta selectivo. E no por conta solamente pa ciudadano, turista, of esnan cu tin permiso di trabao. E mester extende na e miles cu ta biba y traha trankil den cas, restaurant, hotel y sitionan di construccion di Aruba — hopi biaha sin status legal pero cu e mesun necesidad humano pa seguridad y husticia.

Riba Dia di Derechonan Humano,, Aruba ta para na un momento clave. E pregunta no ta mas si e asuntonan ta existi, sino si autoridadnan insular, partnernan Hulandes y e comunidad mas amplio lo tuma e pasonan decisivo necesario pa sigura cu derechonan humano berdaderamente ta funciona como “everyday essentials” pa tur cu ta yama Aruba nan cas.