Ayera mundo a celebra Dia Internacional di Hubentud, un celebracion cu tin como meta trece asuntonan di hubentud na atencion di comunidad internacional y alabes celebra e potencial di hubentud como partnernan den e sociedad mundial di awendia.

E idea pa Dia Internacional di Hubentud a ser propone na 1991 door di e hobennan cu tabata reuni na Viena, Austria, pa e prome sesion di e Foro Mundial di Hubentud di e Sistema di Nacionnan Uni. E Foro a recomenda pa declara un Dia Internacional di Hubentud, specialmente pa metanan di recauda fondo y promocion, pa sostene e Fondo Hubenil di Nacionnan Uni den cooperacion cu organisacionnan hubenil.

Na 1998, un resolucion cu ta proclama 12 di augustus como Dia Internacional di Hubentud a ser adopta door di e prome sesion di e Conferencia Mundial di Ministernan Responsabel pa Hubentud, cu a ser organisa pa Gobierno di Portugal den cooperacion cu Nacionnan Uni. E recomendacion ey a ser respalda despues pa e di 54 sesion di e Asamblea General, den su resolucion A/RES/54/120 titula “Politica y programanan cu ta envolve hubentud”.

E Asamblea a recomenda pa organisa actividadnan di informacion publico pa sostene e Dia como un manera pa promove miho conscientisacion di e Programa Mundial di Accion pa Hubentud, adopta pa e Asamblea General na 1996.

Resolucion di Conseho di Seguridad 2250 riba Hubentud, Pas y Seguridad ta representa un reconocemento sin precedente di e necesidad urgente pa envolve constructornan di pas hoben den promove pas y contraresta extremismo, y ta posiciona hubentud claramente como partnernan importante den e esfuerso mundial.

Na Aruba tin diferente organisacion ta traha y aporta na desaroyo di hobennan, y un di e organisacionnan aki ta Asociacion Trabou di Hubentud na Aruba (ATHA). Franchesa Heinze, director di ATHA ta conta di e mision di ATHA y ta enfatisa e importancia di e celebracion di Dia Internacional di Hubentud.

Heinze a splica cu ATHA tin 50 miembro cu ta consisti di diferente organisacion cu tin di haber cu mucha y hoben. ATHA ta enfoca riba edad 0 pa 25 aña y ta para pa e bienestar di mucha y hoben aportando na su miembronan.

Banda di esaki e organisacion tres pilar unda cu nan ta sostene gobierno relaciona cu sondeonan, por ehempel, nan ta sostene tambe nan miembronan cu ta e organisacionnan afilia na ATHA y ademas ATHA tambe ta fungi como un organismo supervisor den e veld relaciona cu mucha y hoben.

Pa loke ta trata e importancia di celebra e Dia Internacional di Hubentud, Heinze ta enfatisa cu hopi biaha hopi hende ta enfoca riba e parti di Dia di Mucha cu den teoria ta inclui e hoben tambe pasobra mucha ta te cu edad di 17 aña legalmente, pero di otro banda hendenan no ta wak e diferencia entre esakinan.

El a splica cu e proceso di hoben semper tin un reto cune, un proceso di cambio di mucha caminda e hoben no ta mucha mas y ta den formacion pa bira adulto. Esaki ta trece cune cambionan fisico, hormoon y diferente otro cos nobo cu ta bin cu e cambio aki. “Esaki sigur ta importante tambe pa para keto y celebra como cu ya caba nan ta drentando un etapa di formacion pa cu parti di adulto,” el a remarca.

Heinze a menciona como ehempel e proyecto di ATHA, Poder di Hubentud, den cual nan ta duna e hobennan tur herment pa nan bay crea un proyecto, bay den comunidad y crea un impacto unda cu nan ta yenando e proceso.

El a subraya cu ta importante for di hoben caba nan voz, nan opinion, deseonan, perspectiva di problematicanan den comunidad ser scucha tambe. El a indica cu e tema di Dia Internacional di Hubentud e aña aki a ta enfoca riba e hobennan local relaciona cu Sustainable Development Goals (SDG) como cu e cambio den mundo ta cuminsa den comunidad mes y for di e perspectiva ey e tema aki a ser realisa mundialmente.

Por ultimo, Heinze ta duna un mensahe na e hobennan di Aruba en conexion cu Dia Internacional di Hubentud: “Hoben esaki ta e momento unda cu bo por gara hopi oportunidad, esaki ta e momento pa bo luci, pa bo briya haciendo impacto positivo den comunidad. Hayando mas experiencia como boluntario ta un acto di caridad, acto di amor, e ta yuda bo haci e foutnan cu bo mester haci pa bo por siña, e ta duna bo e espacio eynan, probecha di dje. E ta yuda bo tambe cuminsa crea e pasonan pa bo carera, pa bo futuro unda cu bo ta siña mirando con e adultonan ta haciendo e. Gara bo oportunidad pa asina abo por ser bo miho version y haci e diferencia positivo den comunidad na Aruba.”