Bo tabata sa cu casi 1 di 4 mucha muhe hoben entre 15 y 19 aña na henter mundo no ta ricibi educacion, trabao of capacitacion, compara cu cada 1 di cada 10 mucha homber?

Na aña 1995, na e Conferencia Mundial di Hende Muhe na Beijing, paisnan a adopta e Declaracion y Plataforma di Accion di Beijing e cual ta trata di e plan hopi progresista cu hamas a wordo realisa pa promove e derechonan, no solamente di hende muhe, sino tambe di muchanan muhe. E declaracion di Beijing ta esun cu a yama na prome instante pa e derechonan di mucha muhe.

Dia 19 di december di 201,1 Asamblea General di Nacionnan Uni a adopta e resolucion 66/170 pa declara e dia 11 di october como Dia Internacional di Mucha Muhe y reconoce e derechonan y desafionan unico cu nan ta enfrenta na henter mundo, como tambe promove empoderamento y cumplimento di nan derechonan humano.

Adolescentenan tin derecho na un bida sigur, cu educacion y salud, no solamente den añanan aki di formacion, sino tambe a medida cu nan ta crece y bira hende muhe. Si nan ta ricibi apoyo durante nan adolescencia, muchanan tin e potencial di cambia mundo, muchanan muhe lo por ta hende trahado, mamanan, entrepreneur y lidernan politico den futuro, entre otro.

Muchanan muhe ta kibrando e limitenan di stereotipo y exclusion, incluyendo muchanan cu necesidad special y esnan cu ta biba den comunidadnan cu menos recurso. Como entrepreneur, innovador y fundador di movementonan global, muchanan muhe ta creando un mundo cu ta relevante pa nan y pa e futuro generacion.

Agenda 2030 pa Desaroyo Sostenibel y su 17 meta, cu lidernan mundial a adopta na aña 2015, a incorpora un caminda pa niun hende por keda atras.

Logra igualdad di genero y empoderamento di hende muhe ta un parti integral di cada un di e 17 obhetivo, garantisando e derecho di hende muhe y muchanan muhe den tur obhetivo pa por yega na husticia y inclusion, economia por funciona pa tur hende y mantene un ambiente comparti for di awo pa e futuro generacionnan.

Cada dia, centenares di mucha muhe na henter mundo ta sufri di maltrato fisico of psicologico cu e conocemento di nan mayornan of familiarnan, y si no tuma medidanan urgente, e situacion lo por bira pio.

Na aña 2020 Fondo di Poblacion di Nacionnan Uni a publica un rapport principal yama “Estado di Poblacion Mundial 2020” e cual ta examina e origen y extension di practicanan dañino y kico tin cu haci pa stop nan.

Tin tres practica particular cu ta general y persistente, a pesar cu ta conta cu e condena universal, cual ta mutilacion femenino, matrimonio infantil y union trempan, y preferencia pa yiu homber.

Tin persona na mundo cu ta somete nan yiunan muhe na dañonan severo y duradero, incluso por yega na e morto di e mucha, por ehemplo, matrimonio infantil y e preferencia pa yiu homber.

Matrimonio infantil por tin como obheto sigura e futuro di e muchanan muhe ora nan ta responsabilisa nan di e cuido di nan casa. Por mirele tambe como un manera di protege nan di violencia sexual of di salvaguardia nan reputacion si nan sali na estado.

No obstante, e practicanan aki ta nifica cu e mucha muhe mester bandona scol y su amigonan pa bay casa. Of por enfrenta problema di salud pa e resto di su bida debi na mutilacion realisa como un ritual, algo cu ta hopi comun den algun pais cu tin diferente cultura of religion, manera e rapport aki a sigura.

Na nivel mundial e cantidad di mucha muhe afecta pa mutilacion ta hopi impresionante. Te aña pasa e cifra tabata papia di 4.1 miyon di mucha muhe cu tabata den riesgo pa sufri di e practica aki.

Covid-19 a trece hopi reto y un di nan ta e aumento di e cantidad di matrimonio infantil y abuso sexual. E pandemia a trece cune dificultadnan economico, ceramento di scolnan, te e perdida di acceso na servicionan di salud y programanan comunitario.

Nan ta calcula cu den proximo 10 aña lo por tin 2 miyon di caso di mutilacion femenino cu por wordo preveni y 13 miyon di matrimonio infantil lo por tuma lugar, segun investigadonan.

A pesar di e desafionan aki, mundo a mira hopi señal, e iniciativanan cu por demostra cu ta posibel pa pone fin na e practicanan aki, di cual hopi muhe y mucha muhe ta sufri.

Ta p’esey cu Fondo di Poblacion di Nacionnan Uni a publica e rapport aki, cu tin como obhetivo yuda e organisacionnan y comunidadnan logra cambionan den e norma social na escala grandi.

No ta un secreto cu na Aruba abuso sexual y maltrato di hende muhe a aumenta. Comunidad tambe a cuminsa bira un tiki mas consciente di e efectonan cu esey ta trece pa muchanan pa henter nan bida. Tin cu cuminsa haci un diferencia, nos ta mira personanan influyente riba diferente medionan di comunicacion, no solamente lidernan politico y figuranan publico di e sociedad cu tambe por uni, pa asina crea muchanan muhe mas fuerte y resiliente pa evita maltrato y abuso.

 

 

LEAVE A REPLY

Please enter your comment!
Please enter your name here