Dia 21 di september ta e dia mundial unda ta dedica mas atencion na Alzheimer’s, cual ta un tipo di ‘demencia’ cu ta afecta e comportamento, memoria y pensamento. E sintomanan di e malesa aki pro eventualmente crece asina hopi cu esaki por stroba e bida diario di e persona afecta.

Un di e partinan esencial riba e dia aki ta comprension di kico Alzheimer’s realmente ta. Hopi biaha nos tin e impresion o pensamento cu simplemente e ta un malesa cu ta afecta e memoria, sinembargo e realidad ta uno hopi mas compleho y detaya cu esaki.

Alzheimer’s ta e forma mas comun di demencia, un termino general pa e perdida di memoria y otro habilidadnan cognitivo cu ta suficientemente serio pa interferi cu e bida diario. Alzheimer’s ta responsable pa 60 pa 80% di e casonan di demencia.

Algo di nota segun Fundacion Alzheimer’s Aruba su comunicado den celebracion di e di 24 aniversario di Teal Ribbon Week, ta cu aunke ta usa e termino demencia, clinicamente e termino aki awo ta considera anticua; E termino preferi awo ta Major Neurocognitive Disorder (MND).

E cambio aki ta provee un cuadro mas preciso, mirando cu desorden neurocognitivo ta refleha di un miho manera e disminucion den habilidadnan cognitivio – un estorbo den e funcion di e cerebro – y ta aplica na ambos forma leve y severo di descapacidad den tur grupo di edad. Na diferencia di e otro termino, ‘demencia’, cual hopi biaha ta asocia primeramente cu adultonan mayor y ta percibi como un malesa specifico, pa motibo cu e raiz den latin di e palabra, demens, ta insinua cu bo ta “loco,” cual no ta e caso ora ta papia di Alzheimer’s.

Calculacionnan actual ta sugeri cu mas di 6 miyon Mericano di 65 aña of mas por tin Alzheimer’s. Edad ta e factor di riesgo mas conoci pa Alzheimer’s. y tasa di e malesa ta anticipa di aumenta mientras e poblacion ta keda bira mas grandi.

Tambe ta comun pa mira demencia mescla den personanan, cual ta un combinacion di varios tipo di demencia. Por ehempel, algun persona por tin ambos Alzheimer’s y demencia, cual ta reforsa e necesidad di tin un distincion entre ambos.

Mientras cu e sintomanan di Alzheimer’s ta varia, problemanan cu e memoria ta tipicamente un di e prome señalnan di problemanan cognitivo relaciona cu e malesa. Varios persona ta ripara un disminucion den e funcion di otro habilidadnan cognitivo tambe. Posiblemente nan ta haya problema pa haya e palabranan corecto, dificultad visual of espacial y tambe problemanan di rasonamento of huicio. Tur esaki por ta señalnan trempan di e malesa.

Personanan cu Alzheimer’s por tambe tin problema cu haci tareanan diario manera stuur un auto, cushina un cuminda of te hasta paga nan recibonan. Nan por haci e mesun preguntanan varios biaha, perde cu facilidad, perde cosnan of pone nan na lugarnan poco comun, of te hasta yama cosnan simpel confuso. Mientras e malesa ta empeora, algun persona ta preocupa, no por descansa of ta agita.

Dia Mundial di Alzheimer’s

Manera nos por a lesa, Alzheimer’s ta un malesa cu ta afecta no solamente memoria, sino varios funcion di e cerebro y e bida diario di esunnan afecta, te na e cosnan cu nos ta considera mas simpel. Pa e motibo aki, tin un gran importancia riba no solamente tin un diagnosis na tempo y trempan, sino uno confiabel.

E lema pa e aña aki su Dia Mundial di Alzheimer’s ta ‘Tur adulto mayor tin derecho di un diagnosis confiabel.’

Segun un comunicado Fundacion Alzheimer’s Aruba tocante e fecha aki, ta pasa cu hopi frecuencia cu un adulto mayor ta ricibi un diagnosis di “Alzheimer’s Dementia” y no sa kico ta sigui. Te hasta ta mira cu e diagnosis no ta duna por escrito na e pashent ni tampoco ta haci esaki ora cu nan pidi. Tin tambe e custumber di atrasa e diagnosis, sin busca causanan posible y ta scoge pa warda te ora e condicion empeora pa asina yega na conclusion. Mientrastanto, e persona ta ricibi conseho pa bay un centro di cuido, unda e mester comporta adecuadamente of e lo ser saca pa motibo di no ta apto pa keda na e sitio aki, ora cu e funcionnan te ainda ta leve.

Si e condicion ta empeorando, e persona acompañante di e pashent lo ser bisa pa cuminsa e preparacionnan pa ingresa e pashent un cas di cuido pa adultonan mayor y esey ta e fin di e storia.

Keda sin ricibi un diagnosis cognitivo confiabel por resulta den consecuencianan sumamente negativo, incluyendo perde e oportunidad di haya tratamento apropia y na tempo y un empeoracion di e sintomanan. Problemanan cognitivo por tin un impacto riba e funcion fisico, manera balans y mobilidad. Un falta di diagnosis ta atrasa intervencion tambe cu por preserva e funcionnan aki y preveni, entre otro, caida cu por resulta den herida y tambe ta causa daño psicologico, aumento den e presion riba e dunador di cuido, posibel consecuencianan financiero y atraso den plan pa e futuro di e individuo y famia afecta pa e condicionnan aki.

Banda di esaki, un falta di diagnosis cla por causa resentimento, tiramento di culpa y frustraccion den otronan ora cu un persona cu tin discapacidadnan cognitivo comete algun eror, cual ta aumenta e sentimentonan di isolacion y mal comprension. E falta di habilidad pa compronde y atende e problemanan aki por disminui na un manera significante e individuo su habilidad di por ehecuta tareanan diario, causando frustracion y un reduccion den e calidad di bida.

Un falta di diagnosis por stroba funcion diario, reduci e calidad di bida di un persona y causa sufrimento cu por preveni ademas di un aumento den e falta di confiansa den e sistema di cuido di salud. E falta di confiansa aki pro afecta tanto e individuo y su famia como publico en general.

Pa por obtene un diagnosis confiabel un evaluacion clinico detaya y profundo ta necesario, Den esaki, mester inclui e historial for di un informante confiable of partner di cuido, un examinacion, screening, di e estado mental cu test congnitivo manera MoCA of MMSE pa establece un linea base y potencialmente mas test manera imagennan neurologico y test di laboratorio pa identifica e causa.

Un evaluacion trempan ta recomenda pa cualkier cambio nobo y compronde cu un desorden neurocognitivo ta un termino amplio cu varios causa, incluyendo condicionnan reversibel, ta importante pa maneho apropia. Un diagnosis confiable ta necesario pa sigura un diagnosis di e condicion di e cerebero, manera desorden cognitivo of heridanan traumatico den e cerebro, cual por yuda distingui esaki for di envehecimento normal of otro condicionnan manera depresion.

Tambe esaki pro provee informacion cu ta crucial pa plan di e tratamento, monitor e progresion di e malesa, identifica e partinan fuerte y e debilidadnan pa por mehora e calidad di bida, mientras ta establece tambe e linea base pa comparacion den futuro.