Ayera, 9 di october, ta celebra Dia Mundial di Post. Prome minister di Aruba, Evelyn Wever-Croes a comparti un mensahe di felicitacion pa Post NV.
“Awe ta dia mundial di POST. Mi ta hopi orguyoso cu desde mas cu un aña nos ta trahando cu Post NV pa un stampia special pa dia di bestia, cu pintura di nos muchanan”, minister president a comparti. “Nos a tene un concurso di pintamento y e pintura di e 4 ganadornan awor ta riba stampia oficial y lo biaha rond di mundo. Asina nos ta mustra cu nos ta un pais cu ta stima su mascotanan.”
El a continua: “Y diamars ultimo nos a ricibi e prome stampia. Post y stampia no ta conceptonan cu nos muchanan ta custuma cune pero e ta na nos pa inculca esaki den nan. Mi ta hopi contento y orguyoso cu mi por tabata parti di esaki. Danki na plataforma Plan Nacional di Cacho pa organisa esaki un Biaha mas y danki na Post NV pa boso cooperacion.”
