Dia 20 di juni mundo ta conmemora Dia Mundial di Refugiado, un dia internacional designa pa Nacionnan Uni pa honra refugiadonan rond mundo. Riba e dia aki mundo ta celebra e forsa y curashi di hendenan cu a ser forsa pa huy for di nan pais natal pa scapa di conflicto of persecucion. Dia Mundial di Refugiado ta un ocasion pa construi empatia y comprension pa nan situacion dificil y pa reconoce nan resiliencia den reconstrui nan bida.

Segun datonan oficial di Nacionnan Uni (UN) cada minuut 20 hende ta laga tur cos atras pa scapa di guera, persecucion of teror. Tin varios tipo di persona cu a ser forsa pa bandona nan pais.

Refugiado: Un refugiado ta un hende cu a huy for di su cas y pais debi na “un miedo bon funda di persecucion pa motibo di su rasa, religion, nacionalidad, miembresia den un grupo social particular, of opinion politico”, segun e Convencion di Refugiado di Nacionnan Uni di 1951. Hopi refugiado ta den exilio pa scapa di e efectonan di desasternan natural of causa pa hende.

Solicitantenan di Asilo: E solicitantenan di asilo ta bisa cu nan ta refugiado y a huy di nan cas mescos cu refugiadonan ta haci, pero nan reclamo pa status di refugiado no ta evalua definitivamente ainda den e pais unda nan a huy.

Personanan Desplasa Internamente (IDP): Esaki ta e personanan cu no a crusa un frontera internacional pero a muda pa un region diferente for di esun cu nan ta yama cas dentro di nan mesun pais.

Personanan sin Estado: E personanan aki ta personanan cu no tin un nacionalidad reconoci y no ta pertenece na ningun pais. Situacionnan di sin estado por lo general ta ser causa pa discriminacion contra cierto gruponan. Nan falta di identificacion — un certificado di ciudadania — por exclui nan di acceso na servicio importante di gobierno, incluyendo cuido di salud, educacion of empleo.

Repatriadonan: E repatriadonan ta ex-refugiadonan cu ta regresa nan propio pais of regionnan di origen despues di tempo den exilio. Repatriadonan mester di sosten continuo y asistencia di reintegracion pa garantisa cu nan por reconstrui nan bida na cas.

E Convencion di Refugiado di 1951 di Nacionnan Uni y su Protocol di 1967 ta yuda proteha e refugiadonan. Nan ta e unico instrumentonan legal mundial cu ta cubri e aspectonan mas importante di bida di un refugiado. Di acuerdo cu nan provisionnan, refugiadonan merece, como minimo, e mesun normanan di trato cu otro ciudadanonan stranhero ta disfruta di dje den un pais determina y, den hopi caso, e mesun trato cu ciudadanonan.

E Convencion di 1951 ta contene un cantidad di derecho y tambe ta resalta e obligacionnan di refugiadonan pa cu nan pais anfitrion. E piedra angular di e Convencion di 1951 ta e principio di “no-refoulement”. Di acuerdo cu e principio aki, un refugiado no mester ser debolbi na un pais caminda e ta enfrenta menasanan serio pa su bida of libertad.

E proteccion aki no por ser reclama pa refugiadonan cu ta ser considera un peliger pa e seguridad di e pais, of cu a ser condena pa un crimen particularmente serio, cu ta ser considera un peliger pa e comunidad.

E derechonan den e Convencion di 1951 ta inclui:

E derecho pa no ser expulsa, cu excepcion di cierto condicionnan estrictamente defini;

E derecho pa no ser castiga pa entrada ilegal den e teritorio di un Estado contratante;

E derecho di traha;

E derecho riba vivienda;

E derecho riba enseñansa;

E derecho riba alivio y asistencia publico;

E derecho riba libertad di religion;

E derecho di acceso na e cortenan;

E derecho riba libertad di movecion dentro di e teritorio;

E derecho pa ser emiti documentonan di identidad y biahe.

Algun derecho basico, incluyendo e derecho di ta un refugiado protegi, ta conta pa tur refugiado. Un refugiado ta haya derecho riba otro derechonan mas largo e keda den e pais anfitrion, loke ta basa riba e reconocemento cu mas largo e keda como refugiado, mas derecho e mester.

Aruba

Den luna di october 2024 e organisacion Amnesty Internacional a publica un rapport cu ta contene e hallazgonan di su prome investigacion tocante e situacion di Venezolanonan buscando proteccion na Aruba. A enfoca e investigacion riba e proteccion cu Aruba ta brinda na refugiadonan Venezolano.

Manera ta conoci Venezuela tin bastante aña ta pasa den un crisis profundo di derechonan humano. Violacionnan masivo di derechonan civil, politico, economico y social ta keda refleha den un escasez y falta di acceso na cuminda y remedinan, un deterioro di servicionan medico, y violencia y represion politico di parti di e estado.

Na 2023 y 2024, e crisis di derechonan humano na Venezuela a intensifica miyones di Venezolanonan a huy, loke ta pone cu esaki ta un di e crisisnan di desplasamento forsa di mas grandi den mundo. Aproximadamente 7,77 miyon Venezolano a huy for di e pais desde 2015, loke ta representa 25% di henter e populacion di e pais.

Aruba ta mara na e Convencion di Nacionnan Uni relaciona cu e Status di Refugiadonan (UN Refugee Convention) y mester respeta e obligacionnan cu e convencion aki ta establece, incluyendo e principio di non-refoulement, cu ta prohibi cualkier traspaso di individuonan na luganan caminda nan ta core riesgo di persecucion, tortura of otro violacionnan serio di derechonan humano.

A pesar di ta someti na e Convencion di Refugiadonan di Nacionnan Uni, Aruba falta legislacion specifico tocante di asilo, y esnan cu ta busca proteccion ta someti na e leynan comun di inmigracion. Tampoco tin politica specifico dedica na mucha cu ta busca proteccion, loke ta pone cu mucha ta ser someti na e mesun proceduranan di asilo cu adultonan.

Esnan cu kier busca asilo na Aruba por hacie di varios manera, pero debi na e hecho cu desde 2018 a pone restriccionnan di frontera cu ta preveni trafico aereo directo entre Venezuela y Aruba, Venezolanonan ta someti na rekisitonan di visa y otro documentacion pa drenta Aruba, loke pa mayoria di e Venezolano ta dificil pa obtene na Venezuela.

Debi na e complicacionnan aki, tin hopi Venezolano cu no ta mira otro opcion cu emprende un biahe peligroso via lama, poniendo nan bida na peliger, pa asina yega Aruba di manera iregular. Sinembargo, ta considera entrada iregular un violacion di e leynan local di Aruba, y p’esey ta entrega Venezolanonan intercepta na e autoridadnan local y ta detene nan automaticamente den e centro di detencion di inmigracion di Guarda Nos Costa (GNC).

Amnesty International ta opone e detencion di inmigracion di ciudadanonan Venezolano, y ta considera cu nan deportacion ta ilegal. Ademas e ta haya cu no mester debolbe Venezolanonan na nan pais. Amnesty tambe a evalua e condicionnan di detencion y a identifica preocupacionnan durante tres bishita na e centro di detencion di inmigracion di GNC na 2021, 2022 y 2023.

A pesar cu Amnesty International a mira mehoracionnan den e condicionnan den e centro cu e transcurso di e bishitanan aki, nan ta keda preocupante. E preocupacionnan ta inclui e falta di ventilacion, e falta di actividadnan recreacional, y e movecion restringi, ya cu solamente tres biaha pa dia ta permiti e detenidonan sali for di nan celnan pa aproximadamente 30 minuut cada biaha

Amnesty International tambe a documenta casonan di asistencia medico insuficiente den detencion, manera e hecho cu no ta duna detenidonan oportunidad pa consulta un dokter a pesar cu nan tin problemanan di salud.

Amnesty International ta opone e deportacion di Venezolanonan y ta keda preocupa tocante di e proteccion cu Aruba ta brinda nan. A pesar di e esfuersonan di Aruba pa mehora e politicanan y pa mehora e condicionnan di detencion, y su colaboracionnan cu organisacionnan internacional, Amnesty International ta keda cu preocupacionnan serio tocante di e trato di Venezolanonan cu ta busca proteccion na Aruba.