Dia 4 di mei, Aruba, hunto cu tur otro pais den Reino Hulandes, lo conmemora cu respet, tur esnan cu a perde nan bida defendiendo libertad y dignidad humano durante Segunda Guera Mundial. E fecha aki ta sirbi como un recordatorio di e gran sacrificio di nos antepasadonan pa proteha e balornan mas fundamental: libertad.
Pa honra e momento solem, Comision Celebracion Dianan Nacional (CCDN) ta organisa un ceremonia oficial na Plaza Defensornan di Aruba (Adriaan Lacle Boulevard), dia 4 di mei di 5or pa 6or y mey. Ta invita comunidad pa forma parti di e ceremonia, den union y respet pa nos heroenan cu a perde nan bida.
Durante e ceremonia, lo tuma dos minuut di silencio pa refleha y rindi homenahe no solamente na esnan cu a perde nan bida durante Segunda Guera Mundial, pero tambe na tur soldaat y civil cu a entrega nan bida den un conflicto di guera of mision di paz.
Su Excelecia Gobernador di Aruba, Alfonso Boekhoudt, hunto cu Prome Minister, mr. Mike Eman, Presidente di Parlamento, y miembronan di Parlamento y Conseho di Minister, lo ta presente pa representa nos pueblo y honra e heroenan cu a habri caminda pa e libertad cu nos ta gosa di dje.
Den un acto di respet, S.E. Gobernador lo pone un krans na e Monumento di 5 di mei, un simbolo di liberacion di Europa di e opresion di Nazi. Un grupo di hoben cu a gana competencia Arte di Palabra lo lesa un poesia, familiar y ex-coleganan di e difuntonan lo pone krans, y despues lo sigui cu un discurso di nos Prome Minister.
Presidente di Parlamento di Aruba, Gobierno, Representante di Hulanda na Aruba,Marinierskazerne Savaneta y Dienstnan uniforma tambe lo pone krans. Un grupo di hoben di padvinders lo pone flor como simbolo di speransa y continuacion di nos compromiso pa paz.
Awe mas cu nunca, nos tin e responsabilidad pa honra e sacrificio cu patriotismo y gratitud. Un pueblo sin pasado ta un pueblo sin rumbo; honra e pasado pa guia e futuro.
